1 I tan, Bɛtɛlɛmi-Efarata taana,

i tan xurun Yuda taane tagi,

koni naxan mangayaan ligama Isirayila xun na

n tan xa, na minima i tan nin.

A bɔnsɔnna fɔlɔxi xabu waxati danguxine yi,

xabu singe ra fonne waxatina.

2 Nanara, Ala Isirayila yamanan nabeɲinma nɛn

han naxan diin barima na yi diin bari.

A ngaxakeden dɔnxɛne mɔn yi xɛtɛ Isirayila yi.

3 A kelima nɛn, a yi a xuruse kurun naba

Alatala sɛnbɛni,

Alatala xili binyeni, a Ala.

E luma nɛn bɔɲɛ xunbenli,

amasɔtɔ a binyama nɛn han bɔxɔn danne.

4 A tan yɛtɛɛn nan findima e bɔɲɛ xunbenla ra.

Asiriya kaane na fa en ma bɔxɔni

e yi so en ma manga banxine kui,

en yɛɛrati solofere nan nakelima e xili ma

hali yamaan kuntigi solomasɛxɛ.

5 E mangayaan ligama nɛn Asiriya yamanani

silanfanna ra e yii, e Nimirodi bɔxɔn tongo.

Mangana en xunbama nɛn Asiriya kaane yii,

e na sa so en yamanani

e na e sanna ti en ma bɔxɔni.

6 Nayi, Yaxubaa yamaan muxu dɔnxɛne luma nɛn

siya wuyaxin yɛ,

alo xiila naxan kelixi Alatala ma,

alo tulen naxan sama sɛxɛn yii ra,

naxanye mako mi adamadiine ma,

e yengi mi sese ma muxune yii.

7 Nayi, Yaxuba bɔnsɔnna muxu dɔnxɛne luma nɛn

siyane nun yama wuyaxine yɛ,

alo yatan burunna subene yɛ,

alo yata sɛnbɛmaan xuruse xunxurine yɛ.

A na dangu, a e suxu, a e yibɔ,

muxu yo mi e bama a yii.

8 Ɛ yiini te ɛ yaxune xili ma,

alogo ɛ yaxune birin xa raxɔri.

9 Alatalaa falan ni ito ra, a naxa,

"Na lɔxɔni, n ni i ya soone bama nɛn i konni

n yi i ya wontorone ralɔ ayi.

10 N na i ya taane kalama nɛn i ya yamanani,

n yi i ya yire makantanxine birin nabira.

11 N kɔɛrayaan bama nɛn ɛ yɛ.

Yiimatone mi fa luma ɛ yɛ.

12 N na ɛ suxurene nun ɛ kide gɛmɛne bama nɛn ɛ yii.

Ɛ mi fa ɛ xinbi sinma ɛ yii funfun bun ma.

13 N na ɛ Asera kide gbindonne bama nɛn ɛ yii,

n yi ɛ taane halagi.

14 N fitinaxina n gbeen ɲɔxɔma nɛn xɔlɔni

siyane birin na naxanye mi n xuiin namɛxi."