1 N yi n yɛɛn nakeli n yi fe toon ti alo xiye. Feri naanin yi n yɛtagi. 2 Malekan naxan yi falan tima n xa, n yi na maxɔdin, n naxa, "Nanse itoe ra?" A yi n yabi, a naxa, "Sɛnbɛne nan e ra naxanye Yuda nun Isirayila nun Yerusalɛn raxuyaxi ayi."

3 Na xanbi ra, Alatala yi xabu naanin yita n na. 4 N yi maxɔdinna ti, n naxa, "Itoe faxi nanse ligadeyi be?" A yi n yabi, a naxa, "Fenni itoe nan Yuda raxuyaxi ayi fefe, han muxu yo mi fa nɔɛ a xunni tɛ. Koni xabuni itoe tan faxi e magaxudeni, e yi siya gbɛtɛne sɛnbɛne rabira, naxanye kelixi Yuda bɔxɔn xili ma alogo e xa Yuda kaane raxuya ayi."

5 N yi n yɛɛn nakeli n yi fe toon ti alo xiye. Se maliga lutin yi suxi muxuna nde yii. 6 N yi a maxɔdin, n naxa, "I sigan minɛn?" A yi n yabi, a naxa, "N Yerusalɛn nan maligama, alogo n xa a yigboon nun a kuyan kolon."

7 Malekan naxan yi falan tima n xa, na yi siga, koni maleka gbɛtɛ yi fa na ralan. 8 A yi a fala a xa, a naxa, "I gi, sa a fala banxulanni ito xa, a Yerusalɛn kaane nun xuruseene wuyama ayi nɛn han! Yinna mi fa nɔɛ taan nabilinɲɛ. 9 Alatalaa falan ni ito ra, a naxa, ‘N tan yɛtɛna a kantanma nɛn alo tɛɛna a rabilinni, n yi n nɔrɔn nagodo a yi.’ "

10 "Ɛ xɔdɔxɔ de!

Ɛ gi kɔmɛn fɔxɔn yamanan bun!"

Alatalaa falan nan na ra,

"Bayo n na ɛ raxuya ayi nɛn

bɔxɔn tongon naaninne ma."

Alatalaa falan nan na ra.

11 "Ɛ xɔdɔxɔ!

Siyon kaane, ɛ gi,

ɛ tan naxanye dɔxi Babilɔn yi."

12 Alatala Sɛnbɛn Birin Kanna naxa iki:

"A bata n xɛ binyeni siyane ma

naxanye fuxi ɛ ma,

bayo naxan na a yiin din ɛ ra,

a luxi nɛn

alo na bata a yiin din Ala yɛ diin na.

13 N kelima nɛn e xili ma yati,

e konyine yi e yii seene birin tongo yɛngɛni.

Nayi, ɛ a kolonma nɛn

a Alatala Sɛnbɛn Birin Kanna nan n nafaxi.

14 Ɛ xuini te sɛwani,

ɛ tan Siyon kaane,

bayo n fama nɛn,

n yi lu ɛ tagi."

Alatalaa falan nan na ra.

15 Siya wuyaxine fama nɛn Alatala ma na lɔxɔni

e yi findi n ma yamaan na.

N luma nɛn ɛ tagi,

ɛ yi a kolon

a Alatala Sɛnbɛn Birin Kanna nan n nafaxi ɛ ma.

16 Yuda mɔn findima nɛn Alatala gbeen na,

yamana sariɲanxina,

a mɔn yi Yerusalɛn sugandi.

17 Adamadiin birin xa a dundu Alatala yɛtagi,

amasɔtɔ a bata keli mini a yire sariɲanxini.