1 Gathi gag be’ nib mil fag ngog? Ma gathi gag reb e apostel? Ma gathi kug guy Jesus ni Somol rodad? Ma gathi gimed wenegan e maruwel rog ni fan ngak Somol? 2 Yugu ra dabi ta’boch e girdi’ ni gag reb e apostel, ma gimed e gimed ra tay ni gag reb e apostel! Ya ngongol romed nrogon girdi’en Somol e be micheg ni gag reb e apostel.

3 Fa’anra thibthib nigeg e girdi’, ma ba’aray rogon ni gu ma ayuwegneg nma lungug: 4 Gur dariy mat’wug ni ngan pi’ e ggan nge garbod ngog ni bochan e maruwel ni gu be tay? 5 Gur dariy mat’wug nrayag ni gu rin’ e tin be rin’ e tin kabay e apostel, nge fapi pumo’on ni walagen Somol, nge Peter, ni aram e nggu fek be’ ni le’engig ni girdi’en Kristus ngi i un ngog i yan ko milekag? 6 Fa kemus ni go’ Barnabas nge gag e nggu muruwliyew e salpiy ni fan ko par romow? 7 Mini’ e cha’ ni ka’a yigi rung’ag murung’agen ba salthaw ni ir e be pi’ puluwon e tin nge yag ngak? Ara be’ ni be woldug nde unum e grape ko grape rok nike yung? Ara be’ ni ir e be gafaliy e saf nde fek e milik ko saf rok nge unum?

8 Gathi kemus ni pin’ey ni yibe rin’ ni gubin e rran e ir e rayag ni gu dag riy ngomed, ya ku ireray e n’en ni be yog e Motochiyel. 9 Gadad be be’eg u lan e Motochiyel rok Moses ni be ga’ar e Motochiyel, "Dab ni m’ag l’ugun e garbaw ko ngiyal’ ni be yot’yot’ wom’ngin e woldug ni yima ngongliy e flowa riy ni aram e be gunugunuy." Gur i leamnag Got e garbaw? 10 Fa gathi gadad e be yip’ fadad nnap’an ni yog e re bugithin ney? Bmuduwgil nni yoloy e re bugithin ney ni fan ngodad! Ya en ni be gi’ e milay’ nge en ni be t’ar wom’ngin fare woldug nike el e susun e ra bagayow ma be ngongliy e maruwel rok ni be finey ni ngan pi’ e birok’ e f’oth ko fare gi woldug. 11 Kug weregew e awoch nga fithik’med ni aram fare thin rok Got. Gur yugu ra gel e gafgow ngomed ni fa’an gamow ra fek romed e tin bay fan ngomow ban’en? 12 Fa’anra bay mat’wun boch e girdi’ ni ngam rin’ed e ren’ey ngorad, me ere gathi gamow e bay mat’awmow ni ka ba ga’ ngorad?

Machane dawor gu maruwelgow ko ren’en ni mat’awmow ney. Ya kug kadan’gow u gubin ban’en ni bochan e nge dab gu tew ban’en nra magawonnag e girdi’ ngalan kanawo’en fare Thin Ni Bfel’ ni murung’agen Kristus. 13 Ri gimed manang ni pi’in yad ma maruwel u Tempel e yad ma fek garad u Tempel, ma pi’in yad ma pi e pi maligach u daken e altar e yad ma fek e birorad e f’oth ko fapi maligach. 14 Ma ku aram rogon nike yog Somol ni pi’in yad be machibnag ko girdi’ fare Thin Ni Bfel’ e ngar feked riy e tin ni nge yag ngorad ni fan ko par rorad.

15 Machane dawor gu maruwel nga reb e pin’en ni mat’wug ney, ara gu be yoloy e re bugithin ney e chiney ni fan e ngan pi’ ngog e pin’en ni mat’wug nem ni nge yib fan ngog. Ku gub adag ni gu ra yim’! Dariy be’ ni nge n’ag fan mat’wug ni bay nrayag ni gu weliy murung’ageg! 16 Dariy mat’wug ni nggu uf ni bochan e gu be machibnag ngak e girdi’ fare Thin Ni Bfel’. Ya bbugithin nike yog Got ngog ni nggu rin’. Fa’an mang e da gu machibnag ngak e girdi’ fare Thin Ni Bfel’ ma ri gu ra gafgow! 17 Fa’an mang e gu be muruwliy e re maruwel ney ni gag e gu leamnag ni nggu muruwliy, me ere rayag ni gu leamnag ni ngan pi’ puluwog riy; machane bochan e gu be ngongliy ni bochan e ri maruwel rog nike pi’ Got ngog ni nggu rin’, ma aram fan ni nggu muruwliy nib maruwel ni ka ni pi’ ngog. 18 Mang puluwog ni be yib riy ngog? Felfelan’ ni be yib riy ngog ni bochan e gu be machibnag ngak e girdi’ fare Thin Ni Bfel’ ndariy puluwon ni yad be pi’ ngog, ma mat’wug ni bay ni nga ni pi’ puluwog ni bochan e gu be wereg fare Thin Ni Bfel’ e dagur yog.

19 I gag e mmil fag ngog, ni gathi gag e sib rok be’; machane kug teg ni gag e sib rok urngin e girdi’ ni fan e nge yag ni gu thapeg ngak Kristus urngin e pi’in nrayag rog. 20 Nap’an ni gu be maruwel u fithik’ piyu Israel e gu par ni gu bod be’ u Israel ni fan e nggu yag nagrad ngak Kristus; ni yugu aram rogon ndagur par u tan e Motochiyel rok Moses, machane ug par ni bod rogon ni gu bay u tan ko ngiyal’ ni ba’aram ni gu be maruwel u fithik’ e pi’in yad bay u tan e re Motochiyel nem, ni bochan e nggu yag nagrad ngak Kristus. 21 Ere ku aram rogon ni ngiyal’ ni gu bay rok e pi’in gathi yad piyu Israel e gu be par ni gu bod bagayad, ni gu bay u wuru’ e Motochiyel rok piyu Israel, ni bochan e nggu yagnag e pi’in gathi yad piyu Israel ngak Kristus. Ren’ey e gathi aram e dagur fol ko motochiyel rok Got, ya gag e riyul’ ni gu bay u tan e motochiyel rok Kristus. 22 Ma fa’anra gu be par u fithik’ e pi’in nib me’waer mu gu me’waer nigeg, ni fan e nggu yag nagrad ngak Kristus. Ere kug mang urngin mit e girdi’ ngak urngin mit e girdi’, ni fan e nggu yagnag boch i yad ngak Kristus u rogon e re mit i kanawo’ nrayag riy.

23 Urngin e pin’ey ni gu be rin’ e yigo’ fan ko fare Thin Ni Bfel’, ma fan e ngki fel’ rogog ko birog e f’oth ni bay riy. 24 Ri gimed manang ni yira tay reb e sagreng ko mil ma urngin fapi girdi’ nra milgad e ri ta’ab bagayad e rayag puluwon ngak. Ere mmilgad ni aram rogon nge yag puluwon ngomed. 25 Ra be’ ni be fol gosgos ma be fol ko motochiyel ko fare gosgos ni be rin’; ni be rin’ ni aram rogon ni fan e nge yag nte’eliyawnag nga ba te’eliyaw ni gathi bayi par ni dabi kireb; machane gadad e gadad be rin’ ni fan nga reb e te’eliyaw nra par ni dariy n’umngin nap’an. 26 Aram fan ni gu be mil i yan nib k’iy kanawo’eg ko gin ngan mus riy; aram fan ni gu bod be’ ni girdi’en e tug nder adbey e tug rok. 27 Kug gelnag dowag ko tug ni be aw ngay ke yan i par ni be fol rog, ni fan e nge dab nn’igeg u tomuren ni kug pining boch e girdi’ ni ngar uned ko re gosgos nem.