1 Ma aram me m’ug reb e pow ni ba ga’ u lan e tharmiy, ni be’ ni bpin, ni mad rok e yal’ ma ba’ e pul u tan e rifrif u ay, ma ke te’eliyaw nga ragag nge l’agruw i t’uf. 2 Ni be n’en ni nge gargel, mi i yor ni ba ga’ laman ni bochan e amith nge gafgow nma yib ngak e gargel.

3 Miki m’ug reb e pow u tharmiy, ni ba dragon nri ba ga’ nib rowrow ni medlip lolugen ma ragag e gagey rok, nra reb i lolugen ma bay reb e te’eliyaw riy. 4 Me girngiy ba guruy u dalip e guruy ko t’uf u lanelang nga p’ebuk’ nge yin’ nga daken e fayleng. Me sak’iy ngam’on rok fare pin, ni bochan e nga yigi gargel fare pin me longuy fak. 5 Ma aram me gargeleg fare pin bochi pagel, ni ba ley i wasey e bayi gagiyegnag urngin e pi nam ngay. Machane min leag fare tir ngan fek ngak Got nga tagil’ Got. 6 Me mil fare pin nga daken e ted ko gin ke fal’eg Got rogon ni nge par riy; ni aram e gin ni bay ni ayuweg riy ni ragag nge l’agruw mir’ay nge nel’ i ragag e rran.

7 Ma aram mi ni mael u tharmiy! Me cham Maikal nge tirok’ e engel ngak fare dragon, me cham fare dragon nge tirok’ e engel ngorad; 8 machane me me’waer fare dragon, ma da ni pag fare dragon nge tirok’ e engel ni ngar pired u tharmiy. 9 Mi nin’ fare dragon nri ba ga’ nga wuru’ e tharmiy! I ir fare porchoyog nike kakrom, ni kan tunguy fithingan ni Mo’onyan’, ara Satan, ni ir fa’anem ni bannag e girdi’ nu fayleng ni polo’. Mi nin’ u lang nga daken e fayleng, nib mu’un urngin e pi engel rok ngak.

10 Mu gu rung’ag ba lam ni ba ga’ u lan e tharmiy ni be ga’ar, "Ke taw ngal’an ni nge thapeg Got e girdi’ ngak! Chiney e ke dag Got gelngin ni ir e Pilung! Chiney e ke dag e Messiah rok gelngin! Ya fa’anem nma egnag pi walagdad nma yib i sak’iy nga p’eowchen Got ngi i thibthibnagrad ni rran nge neap’ e ka nin’ nga wuru’ e tharmiy. 11 Ke gel pi walagdad ngak u daken racha’en fare Fak e Saf, ngu daken e thin nib riyul’ ni ur wereged; ma bm’agan’rad ngay ni ngar paged fan e pogofan rorad ngarm’ad. 12 Ere mu felfelan’gad e pi tharmiy, ni gimed urngin e pi’in ni gimed be par u wur! Machane ri bayi gafgow e fayleng nge day! Ya ke yib fare Mo’onyan’ ngomed ni kari damumuw, ya manang ndaki n’uw nap’an ni nge par."

13 Ma fa’ani nang fare dragon ni ka nin’ u lang nga daken e fayleng, ma aram me lek fare pin ni fa’ani gargelnag fachi pagel. 14 Ma fare pin e kan pi’ pon ni l’agruw raba’ ni bod pon ba arche’ ni eagle ni ba ga’ ni bochan e nge yag ni changeg nge yan ko gin ntafen u daken e ted, ko gin ni bay ni ayuweg riy ndalip e duw nge baley, ndabiyag ni nge yib fare porchoyog i cham ngak. 15 Ma aram me pag fare porchoyog e ran u l’ugun nge yib nga but’ ni gowa ba lul’ ni be lek fare pin, ni bochan e nge un fare pin ko fare lul’ nge fek. 16 Machane me ayuweg e but’ fare pin; yi fal e but’ l’ugun nge ful’ fapi ran ni keb u l’ugun fare dragon. 17 Me ri damumuw fare dragon ngak fare pin, ma aram me yan ni nge cham ngak e pi’in yad bay ni owchen fare pin, ni urngin e pi’in yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang. 18 Me sak’iy fare dragon nga dap’e l’ay.