REVELATION 8

Fa bin medlip e hang

1 Ma fa’ani th’ab fare Fak e Saf e bin medlip e hang, ma daki non be’ u tharmiy ni gonap’an e baley e awa. 2 Mu gguy fa medlip i engel ni yad ba sak’iy u p’eowchen Got; ni medlip e rappa ni kan pi’ ngorad.

3 Me yib reb e engel i sak’iy nga altar, ni bay baraba’ i ban’en u pa’ nib gol ni yima tay bogi n’en ni bfel’ bon ngay ngan urfiy. Ni bo’or fa pin’en ni bfel’ bon ni yima urfiy ni kan pi’ ngak ni nge puthuy ko meybil ni i pi’ urngin e girdi’ rok Got me pi’ u daken fare altar ni bay u m’on u tagil’ Got. 4 Me yan e ath ko fapi n’en ni bfel’ bon ni be yik’ u pa’ fare engel nib sak’iy u p’eowchen Got ngalang nib cheag e meybil ni i pi’ e girdi’ rok Got ngay. 5 Me fek fare engel fare raba’ i n’en ni yima af fa pin’en ni bfel’ bon ngay nge suguy ko nifiy nu altar, me yin’ nga daken e fayleng. Me chub e dirra’, me yan lingan bogi ban’en, me matmat e uluch, me yib ba durru’.

Fapi rappa

6 Ma aram me fal’eg fa medlip i engel rogorad ni ngar thoyed fa medlip i rappa ni bay rorad.

7 Me thoy e bin som’on e engel e rappa rok. Me yib e ayis nike el nge nifiy u lang nga daken e fayleng nike ma’athuk e racha’ ngay. Me yik’ ta’ab guruy ko dalip guruy ko fayleng, ma ku ta’ab guruy ko dalip guruy ko gek’iy nu fayleng e yik’ nge m’ay, ma urngin gaf i yuwan e pan nib galunglung e yik’ nge m’ay.

8 Me thoy e bin migid e engel e rappa rok. Mi nin’ ban’en ni bod bburey ni ba ga’ ni be yik’ ngalan e day. Ma ta’ab guruy ko dalip guruy ko day e ngal’ ni racha’, 9 ma ta’ab guruy ko dalip guruy u urngin ban’en nib fos u fithik’ e day e yim’, ma ta’ab guruy ko dalip guruy u urngin e barkow e pil.

10 Me thoy e bin dalip e engel e rappa rok. Me mul ba t’uf ni gathi ba’achig u lanelang ni be yik’ ni bod mmol’ me aw nga daken ta’ab guruy ko dalip guruy e lul’ nge alublub ko ran. 11 (Fithingan e re t’uf nem e Mooy.) Me pig reb e guruy ko dalip guruy e ran nge mooy, ma pire’ e girdi’ nra m’ad ni bochan e ra unumed e re ran nem, ya ke piliyeg ke mooy.

12 Me thoy e bin aningeg e engel e rappa rok. Ma ta’ab guruy ko dalip guruy i ram’en e yal’ nge pul nge t’uf e m’ay; ma ta’ab guruy ko dalip guruy ko rran e par nib talumor, ma ku errogon e neap’.

13 Mu gu sap mu gu rung’ag laman ba arche’ ni eagle ni be changeg nib tolang ni be yog ni ba ga’ laman ni be ga’ar, "Gafgow! Gafgow! Ri bayi gafgow urngin e girdi’ ni be par u fayleng ko ngiyal’ nra thoy fa dalip ni kabay e engel e rappa rorad!"