1 Ma aram mu gguy ba engel ni be yib u tharmiy nga but’, ni bay e kiy ko fare abyss u pa’ nge ba chen nib n’uw nib tomal. 2 Me kol fare dragon, ni ir fare porchoyog nike kakrom, ni aram fare Mo’onyan’, ara Satan, me m’ag nge tay ni aram rogon nib biyu’ e duw. 3 Me yin’ fare engel fare mo’onyan’ ngalan fare abyss, me loknag nge mu’ me pag e hang nga daken ni bochan e nge dabkiyag ni nge bannag girdi’en e pi nam nge yan i mada’ ko ngiyal’ nike m’ay fare biyu’ i duw. Ma tomuren e re biyu’ i duw nem e bay kun pag riy nib ngoch nap’an.

4 Ma aram mu gguy tagil’iy nge pi’in ni kar pired nga daken ni ka ni pi’ mat’awrad ni ngar pufthingad. Ma ku gguy e pi’in nli’rad ngarm’ad ni bochan e ur weliyed fapi thin nib riyul’ ni yib i yog Jesus ngan nang nge fare thin rok Got. Ma dar ted fan ma dar meybilgad ngak fare gamanman ara nga ya’an nni ngongliy ni liyos, fa reb e ntay e pow ko fare gamanman nga daken peri’rad ara rifrif u pa’rad. Ra fosgad mu ur pired rok Kristus ni kar manged pilung ma yad be gagiyeg ni reb e biyu’ e duw. 5 (Ma tin ni kabay e yam’ e dar fosgad nge yan i mada’ ko ngiyal’ ni kem’ay fare biyu’ i duw.) Ireray e yay nsom’on nni faseg e girdi’ ko yam’. 6 Pi’in yad ra fos ko yay nsom’on nra ni faseg e girdi’ ko yam’ e yad ra felfelan’ ma ri ba ga’ e fel’ rogon ni yad ra tay. Ya yay ni migid e yam’ nra yib e dariy ban’en nra ki yag ni nge rin’ ngorad; ya bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.

7 Nap’an nra m’ay fare biyu’ i duw min pag Satan bayay u kalbus, 8 ma bayi yan ngi i bannag e pi nam nib wear u daken e fayleng ni polo’, ni aram yu Gog nge yu Magog. Ma bayi kunuyrad Satan nga ta’bang ni fan ko mael, ni yad bod urngin e yan’ ni bay u dap’e l’ay. 9 Miyad wear u daken e fayleng ngar longobiyed e gin ke par girdi’en Got riy nge fare binaw nib t’uf rok Got. Machane me yib e nifiy u lanelang nga but’ nge li’rad ngarm’ad. 10 Ma fare Mo’onyan’ ni ban nagrad e nin’ ngalan fare lipath i nifiy nge sulfur, ni ir e ka nin’ fare gamanman ngay nge fare profet ni yugu ban’en; ma aram e bay ni gafgow nagrad ni rran nge neap’ ndariy n’umngin nap’an.

11 Ma aram mu gguy ba tagil’ e pilung nib ga’ ma ba wechwech nge en nike par ngay. Me mil e fayleng nge tharmiy u p’eowchen nga bayang nge da ku ni guy. 12 Ma aram mu gguy e pi’in ni karm’ad, ni pi’in nib tolang nge pi’in nib sobut’ ni kar sak’iygad u m’on u tagil’ Got. Min pithig e babyor, mu kun pithig ba kaen, ni fare ke babyor ni babyoren e pi’in ni kar fosgad. Ma pi’in ni karm’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy ngalan fa yu ke babyor. 13 Ma aram me pi’ e day e pi yam’ ni bay riy. Ma yam’ nge gin nma par e pi’in ni karm’ad riy e kur pi’ew e yam’ ni bay rorow. Ma yad urngin nni pufthinnagrad ni be yan u rogon e n’en ni ur ngongliyed. 14 Mi nin’ e yam’ nge gin nma par e pi’in ni karm’ad riy ngalan fare lipath i nifiy. (Re lipath i nifiy nem e ireram fa bin l’agruw yay e yam’.) 15 En nda immoy fithingan ni kan yoloy ngalan babyoren e pi’in ni kar fosgad e nin’ ngalan fare lipath i nifiy.