Apocalipse 5

Fare gi babyor ni kan bachiy nge fare Fak e Saf

1 Mu gguy bangi babyor ni kan bachiy ni bay u lan e ba’ ni mat’aw i pa’ fa’anem nike par nga tagil’; ni l’agruw raba’ ma kan yoloy, ni medlip e hang ni kan pag ngay. 2 Mu gguy ba engel nib gel ni non ni ba ga’ lungun ni ga’ar, "Mini’ e bay rogon ni nge guchthuy e pi hang nem nge pithig e re gi babyor nem ni kan bachiy?" 3 Machane dariy be’ nni pir’eg u lan e tharmiy, ara u daken e fayleng, ara bin nu ar e fayleng*5:3 BIN NU AR E FAYLENG: Fare fayleng ko yam’ (mu guy 1:18). nrayag rok ni nge pithig fare gi babyor ni kan bachiy, nge sap ngalan. 4 Mu gu yor nib gel, ya dariy be’ ni kan pir’eg ni bay rogon ni nge pithig fare gi babyor ni kan bachiy, ara sap ngalan. 5 Me ga’ar bagayad fa pi’in pi’ilal ngog, "Dakumur yor. A mu changar! Fare Layon ni yib ko ganong rok Judah, ni fa’anem ni ba sorok ni ir owchen David e ke gel ngak e kireb nrayag ni nge guchthuy fa medlip i hang nge pithig fare gi babyor ni kan bachiy."

6 Ma aram mu gguy ba Fak e Saf nike sak’iy nga lukngun fa gin’en ntagil’ Got nike cholngobiy fa aningeg i n’em ni yad ba fos nge fa pi’in pi’ilal. Re Fak e Saf nem e gowa ka’an li’ kem’. Ma medlip e gagey ni bay u lolugen ma medlip lan mit, ni ireram fa medlip i kan rok Got nnol’oegrad nga gubin yang u fayleng. 7 Me yan fare Fak e Saf nge yan i fek fare gi babyor ni kan bachiy u ba’ ni mat’aw i pa’ fa’anem nike par nga but’ u tagil’. 8 Ma fa’ani yodorom me paraw fa aningeg i n’em ni yad ba fos nge fa rliw’ nge aningeg i pi’ilal nga but’ u p’eowchen fare Fak e Saf. Ma ra bagayad ma bay reb e tatelin e musik u pa’ ni harp, nge baraba’ i ban’en nib gol nib sug nga bogi ban’en ni bfel’ bon ni yima urfiy, ni ireram e meybil rok girdi’en Got. 9 Miyad yin’ ba tang nib be’ech ni ga’ar:

"I gur e bay rogom ni ngam fek fare gi babyor ni kan bachiy

ngam guchthuy fapi hang riy.

Ya nli’em nga mum’, ma racha’em ni map’ u kuruth e ir e mu chuw’iy

e girdi’ ngay ni ngar manged girdi’en Got,

ni girdi’ u urngin e ganong, nge thin, nge gubin mit e girdi’, nge nam.

10 Kam ngongliyrad kar manged ba nam i prist ni ngu’ur pigpiggad ngak e Got rodad;

ma bay ra gagiyeggad u fayleng."

11 Ma fa’ani kug sap bayay mu gu rung’ag laman e pi engel, ni yu biyu’ nge yu ragag i biyu’ urngirad ni kar sak’iygad ni kar cholngobiyed tagil’ fa’anem, nge fa aningeg i n’em ni yad ba fos, nge fapi pi’ilal, 12 miyad tang ni ba ga’ lamrad ni be lungurad:

"Fare Fak e Saf nli’ ngem’ e bay rogon

ni nge mil suwon urngin ban’en ngak, min pi’ e fla’ab ngak, nge gonop, nge gelngin,

min tayfan, min gilnag buguwan, minog e sorok ngak!"

13 Mu gu rung’ag laman urngin e tin nib fos ni sunumiy Got, ntin ni bay u tharmiy, ngu fayleng, nge tin ni bay ko bin nu ar e fayleng, ngu fithik’ e day, ni urngin e tin ni sunumiy Got ni bay u gubin yang nib mu’un e fayleng ngay ni yad be tang ni be lungurad:

"En nike par nga tagil’, nge fare Fak e Saf,

e nganog e sorok ngorow, min tay farow min gilnag buguwrow

ma bay ur pirew nib mil suwon urngin ban’en ngorow ndariy n’umngin nap’an!"

14 Ma fa aningeg i n’em ni yad ba fos e ra fulweged ni lungurad, "Amen!" Me paraw fapi pi’ilal nga but’ ngar siro’gad ngak.