1 Gu be athpeg ni fa’an mang e gur walageg ni pumo’on,

ni chitnag e i tathuth nigem.

Ma aram e fa’an gu ra mada’ nigem u kanawo’,

ma gu ra farey owchem ma dariy be’ nra dabuy.

2 Gu ra fekem ko naun ko chitnag,

ni cha’an ni fil gubin e tin gumnang ngog.

Gu ra pi’ ngom e tin th’abi fel’ lamen e wayin

ma ku arrogon logwen wom’ngin e gek’iy.

3 Ah manga gu teyey’ ko ba’ ni gil’ay i pa’am,

ma ga yin’ e ba’ ni mat’aw nga dakenag.

4 Mmicheged ngog, gimed e ppin nu Jerusalem,

ni dab magawon niged e adag romow.

5 Mini’ e re rugod ney ni be yib u daken e ted i yib,

ni yow ba mokol pa’ef e en ni gamaren?

U tan fare ke arfath e ug pugem riy,

ko gin nni gargel nigem riy.

6 Mu ning an’um ko gubin e adag kemus ni birog e ngam bing ngay;

dariy be’ ni ngamun’ ngalan ngorngorem kemus ni go’ gag.

Adag e bod feni gel gelngin e yam’;

amithun e adag e bod feni gel e yam’.

Ma gabulbul e daramram riy

nge gak’ ni bod ba nifiy nib gelmirin.

7 Ran e dabiyag ni nge thang;

ma dariy ba sugbur nra tharey.

Machane fa’anra guy be’ rogon ni nge chuwi’iy e adag ko machaf rok,

ma kemus ni fanenikan e ra yib riy ngak.

8 Bay walagmad ni bpin ni kab bitir,

ni dawori yib thuthun.

Mang e ngad rin’ed ni fan ngak

u nap’an nra par nga puluwon be’?

9 Fa’an mang e ir bang i rungrung,

ma gadad ra toy ba wulyang ni silber ni fen.

Machane fa’an mang e ba garog,

ma gadad ra rungrunguy ko ren ni cedar.

10 I gag e gu bang i rungrung,

ma thuthug e wulyang riy.

Adag rog e manang ni ir

e gu ma pir’eg e felfelan’ nge gapas rok.

11 I Solomon e bay bang i grape ni fi’in

u bang i n’en ni yima yog ni Baal Hamon.

Bay girdi’en e woldug ni yad ma rent nag rok;

nra bagyad mma pi’ puluwon ni bbiyu’ yang e silber.

12 I Solomon e rib m’ag u wan’ e biyu’ rok e salpiy,

ma girdi’en e milay’ e l’agruw mira’ay e birorad e f’oth;

Bay bang e milay’ ni grape nri gag e fi’ig!

13 Adag rog, mu pageg nggu rung’ag lungum u daken e milay’;

pi’in gamad e yad be son ni ngar rung’agged lungum ni ka mu non.

14 Adagen an’ug, moy, ni bod ba gamanman ni gazelle,

fa ba fak e gamanman ni deer u daken e pi burey ni gin ma tugul e spice riy.