DANIEL 11

1 Ke par ni ir e be ayuwegneg mi ir e be yoror rog. 2 Ma n’en ni nggu weliy ngom e chiney e ba riyul’."

Nam nu Egypt ngu Syria

"Kabay dalip e pilung ni bay rabad ngar gagiyeg niged yu Persia, ma bay yib e bin aningeg u tomur rorad, ni kab gel feni fel’ rogon ko tin ba’aram e pilung nib m’on rok. Ma bayi yan i mus nga rogon gelngin nge fel’ rogon rok me mael ngak e nam nu Greece.

3 "Ma aram e bay yib ba pilung nib falu’ ko mael. Ma ba ga’ yang e nam ni bay i gagiyegnag mi i rin’ e tin ni ba’adag. 4 Ma nap’an nra yan i tun gelngin, me wear e gin be gagiyegnag nge par ni aningeg guruy. Ma pi’in owchen e gathi yad e bay ur gagiyeg niged. Ya yugu boch e girdi’ e bay rabad nga luwan ngu’ur gagiyeggad, machane dabiyag ni nge yan i par gelngirad ni bod ir.

5 "Ma pilung nu Egypt e bayi par nib gel. Ma reb e pi pilung ko salthaw rok e bayi par ni kab gel ngak me mang ir e gagiyegnag reb e nam ni ka ba ga’ boch. 6 Ma bayi yan in e duw nga tomuren, me pi’ e pilung nu Egypt be’ ni ppin ni fak ngak e pilung nu Syria nge le’ay ni fan e ngar mangew nga baraba’. Machane gathi bayi par e gal nam nem ni aram rogon, ya fare pin nge figirngin, nge fapi tapigpig rok nra uned ngak ngaram, nge fak e re pin nem, e bay nli’rad ni yad gubin ngarm’ad. 7 Ma dabi n’uw nap’an nga tomuren ma reb pi girdi’en fare pin e ra mang pilung. Ra cham ko fa raba’ i salthaw rok fare pilung nu Syria, nge yan ngalan e gin ni kan yororiy ni fan ko mael, nge li’rad. 8 Ma bayi fek e pi liyos ni ya’an e pi got rorad, nge chagiy nga urngin e pin’en nrib tolang puluwon nni ngongliy ko gol nge silber, me fek nga Egypt. Ma tomuren boch e duw ni i par ni bay e gapas, 9 me yib e pilung nu Syria i m’ag e mael ngak yu Egypt, machane bay ni gel nigey ngak nge sul ko nam rok.

10 "Ma pi pumo’on ni fak e pilung nu Syria e bay ra fal’eged rogorad ni fan ko mael miyad kunuy e salthaw ni pire’ ni pire’. Ma bay rabad ni bod e ran ni sugbur ni dabyag i taleg ngar chamgad i yan ngar tawgad ko yoror ko pi to’ogor rorad. 11 Ma bayi damumuw e pilung nu Egypt nge cham ngak e pilung nu Syria nge kol fapi salthaw rok ni pire’ ni pire’. 12 Ma bayi uf ni bochan e gel nike tay nge bochan e salthaw ni pire’ nike li’, machane dabiyag ni nge par i yan nib gel.

13 "Fare pilung nu Syria e bayi sul nge kunuy e salthaw ni pire’ ko tin ni immoy rok ko som’on. Ma nap’an ni bayi fel’ rogon me sul nike fek e salthaw ni pire’ ni pire’ ma bfel’ rogon talin e cham rorad. 14 Ma pire’ e girdi’ ni bayi togopluw ngak e pilung nu Egypt. Ma boch e pumo’on ko nam rom i gur Daniel, ni yad ba’adag e cham e bay ra togopluwgad ni bochan e ka ni piliyeg e changar rorad kar guyed bogi ban’en, machane bay ni gel ngorad. 15 Ma aram e pilung nu Syria e bayi m’ag e mael nga bbinaw ni ka ni yororiy ni fan ko mael me kol. Ma pi salthaw nu Egypt e bay ra paged e cham; ya mus ko tin th’abi falu’ u fithik’rad ni bay dabkiyag ni ngar chamgad. 16 En nike m’ag e mael ngorad e bayi guy e tin ngi i rin’ ngorad, ndakuriy be’ nra togopluw ngak. Ma bay yib i sak’iy ngalan fare nam, ni micheg Got ko girdi’ rok ni taferad, me par nike milfan nga tan pa’.

17 "Bayi leamnag fare pilung nu Syria ni nge pi’ e salthaw rok ni urngin ngar koled e nam rok e pilung nu Egypt ni ga’ngin. Me ngongliy ba m’ag u thilrow, me pi’ be’ ni bpin ni fak ngak ni nge le’engiy, ya be leamnag ni aram kanawo’en me gel ngak, machane dabiyag ni nge fel’ rogon e tin ke leamnag. 18 Ma bayi m’ag e mael ngak e pi nam ni bay u charen e day me kol bo’or riy. Machane bay ba tolang u reb e nam ni bayi gel ngak me taleg ndabkiyag ni ngi i ufanthin. 19 Ma bayi sul fare pilung ko nam rok ko yungi n’en ni ka ni yororiy ni fan ko mael, machane bayi waer ko mael, ma aram e dabku ni guy bayay.

20 "Ma bay yib yugu reb e pilung nga luwan, ni bayi l’oeg be’ ni ngi i kunuy e tax ya nge yo’or e salpiy ko nam rok. Dabi n’uw nap’an min li’ fare pilung ngem’, machane gathi bay nli’ ko mael."

Fare pilung nu Syria nib kireb

21 Me ul ul fare engel ngay nge weliy ni be ga’ar, "Bin migid e pilung nu Syria e be’ nib kireb ndariy mat’wun ni nge pilung, machane yugu ra ni gin ma ke pilung u fithik’ e sasaliyeb. 22 Demturug be’ nra togopluw ngak, ni mus ko fare Prist rok Got ni Th’abi Ga’, ma yira chuwegrad nga ni thirifrad u but’ 23 Bay i ngongliy e m’ag u thilrad yugu boch e nam ni aram e be ban nagrad, ma bay i gel i yan, ni yugu aram rogon ni ba nam nib achig e be gagiyegnag. 24 Bayi m’ag e mael nga bangi nug ni bfel’ rogon e girdi’ riy ma yad be par u fithik’ e gapas, ngi i rin’ bogi ban’en ntin ni kakrom e pi chitamngin ma de rin’ bagayad. Chugum nge binaw nike kol ko mael e bayi wereg u pa’ e girdi’ nib fol ngak. Ma bay i leamnag rogon ngi i m’ag e mael ko yungi n’en ni ka ni yororiy ni fan ko mael, machane ba ngoch nap’an.

25 "Ma bayi athamgil nge kunuy e salthaw ni pire’ ni fan e ke leamnag ni nge m’ag e mael ngak fare pilung nu Egypt, ma re pilung nu Egypt nem e bayi kunuy e salthaw ni pire’ ni pire’ nge yag baraba’ i salthaw ngak ni ba ga’ ma ba gel, me fal’eg rogo’rad ni ngar chamgad. Machane bay ni bannag fare pilung nu Egypt ma dabi gel. 26 Pi tafanow ni th’abi chugur ngak e yad e yad ra kirebnag. Ba yo’or e salthaw rok nra yim’ ma raba’ i salthaw rok nem ni palo’ e yira thirif u but’. 27 Ma aram e bayi par e gali pilung nem nga ta’ab tebel ngar abichgow, machane ra bagayow ma tin ntagan e be leamnag, miyow par ngu’ur lifithew l’ugunrow ngorow. Ma dabiyag ngorow e tin yow be finey, ya dawori taw nga nap’an. 28 Pilung nu Syria e bayi sul nga tafen nike fek urngin e chugum ni fek u fithik’ e mael, ma ke duwgiliy u wan’ ni nge kirebnag fare m’ag nib thothup ni bay u thilin Got nge tirok Got e girdi’. Bayi rin’ e tin ba’adag nge mu’ me sul ko nam rok.

29 "Ma bayi munmun miki sul bayay nge m’ag e mael ngak yu Egypt, machane dabiyag ni nge bod fa yanem. 30 Ma bay yib piyu Roma u barkow ngar maelgad ngak, ma bay i rus ngorad.

"Ma aram e bayi sul ni kari damumuw me guy rogon ni nge kirebnag fare m’ag nib thothup ni bay u thilin Got nge tirok Got e girdi’. Ma bayi fol ko thin rok e pi’in ni kar pi’ed keru’rad ko re m’ag nem. 31 Boch e salthaw rok e bay ra ta’ay niged fare Tempel. Bay ra taleged e maligach ni yu rran miyad suweg ngalang Fare N’en ni Th’abi Dabuy*11:31 FARE N’EN TH’ABI DABUY: Ku arrogon ni bay ko 9:27✝11:31 Dan 9:27; 12:11; Mat 24:15; Mrk 13:14 32 Ma bayi sabanbannag fare pilung e pi’in ni kar pi’ed keru’rad ko fare m’ag rok Got ngar manggad ngak, machane girdi’ ni yad be folwok rok Got e bay rchamgad ngak. 33 Ma pi’in yad ba gonop ko thin rok Got e bay ra filed e llowan’ rorad ngak bo’or e girdi’. Ma bay ba ngiyal’ ni bay nli’ boch i yad u fithik’ e mael mini urfiy nge yim’, ma bochi yad e ni leag e chugom rorad min tayrad nga kalbus. 34 Ma ngiyal’ ni ba’aram ni yibe thang e pogofan rorad riy, e bay ni pi’ e ayuw ngak e girdi’ rok Got, machane pire’ e girdi’ ni bay yib i un ngorad ni fan e bay e tin yad be chogownag ni nge yag ngorad. 35 Ma boch fapi tayugang’ ni yad ba llowan’ e bay nthang e pogofan rorad. Machane girdi’ e bay ra machalboggad ni bochan e ran’ey. Arrogon ni bay i par i yan ngaram nge mada’ ko tomur, ni aram e ngiyal’ nike duwgiliy Got.

36 "Pilung nu Syria e bayi rin’ nrogon ni ba’adag. Bayi ufanthin ngi i leamnag ni ir e ba ga’ ngak e pi got ngi i weliy ni kab tolang ngak fare Got ni Ir e Th’abi Tolang. Bay i par ni be rin’ nge mada’ ko ngiyal’ ni bayi pi’ Got e gechig ngak. Ma bayi rin’ Got e pin’en nike duwgiliy ni nge rin’.✝11:36 Ezk 28:2; 2 Thess 2:4; Rev 13:5 37 Ma re pilung nem e bayi fek yathin fare got ni i pigpig e chitamngin kakrom ngak, nge fare got nib t’uf rok e pi’in ppin. Ma bayi fek yathin urngin e got, ya bayi leamnag ni ir e kab tolang ngorad. 38 Machane bayi tay fan fare got nma yoror ko yungi n’en ni kan yororiy ni fan ko mael. Ma bayi pi’ e gol nge silber nge malang nrib t’uf ma ba tolang puluwon nge boch e tow’ath nrib fel’ ngak yugu reb e got ni pi chitamngin ni kakrom e da ur meybilgad ngak. 39 Ma bayi maruwel ngak e girdi’ ni yad ma meybil ngak yugu reb e kan ni yad e ngar matanagiyed e yungi n’en ntafen ni ka ni yororiy ni fan ko mael. Ma bayi tolang nag e pi’in nike fel’ u wun’rad ni ir e ke mang pilung ma bayi tayrad ko pi liw nib tolang, me pi’ e binaw ngorad ni puluwrad.

40 "Nap’an nra ganowrug u puluwon fare pilung nu Syria, me cham e pilung nu Egypt ngak, ma fare pilung nu Syria bayi cham ngak nike musmus gelngin, ni bayi maruwel ko chariot rok, nge pi os, nge barkow ni pire’. Bayi mael nga bo’or e nam ni gowa’ lul’ ni sugbur. 41 Ma ku ra kol fare nam ni micheg Got ko girdi’ rok ni ngar tafned nge thang e pogofan rok yu ragag i biyu’ girdi’en. Machane girdi’ ko pi binaw nu Edom, Moab, nge tin ni magach u Ammon e go’ bay ra thaygad ni dabni kolrad. 42 Bayi m’ag e mael ngak bo’or e nam, ni mus ngak yu Egypt ndabiyag ni ngar thaygad rok. 43 Gol nge silber nike mithag piyu Egypt nge ku boch ban’en nib t’uf ma ba tolang puluwon e bayi fek. Ma bayi m’ag e mael nga Libya nge nga Ethiopia nge kol. 44 Me rus nga murung’agen ban’en ni yib ngak u ngek ngu lel’uch, me mael nike el merin nge li’ pire’ e girdi’. 45 Ma bayi n’uf fapi tent rok ni ba ga’ ni tafen nga bangi n’en ni bay u thilin e day nge fare burey ni bay e Tempel riy. Ma bayi yim’ ndariy be’ u charen ni nge ayuweg."