DEUTORONOMY 13

1 "Ba profet fa be’ nma weliy fan e lik’ay e fa’anra yog ngomed ba pow fa ba maang’ang ni bayi m’ug, 2 ni fan e nge waliymed ngam ted fan mi gimed pigpig ngak bogi kan ndawor mu ted fan biid, ku manga ra yib i m’ug ni riyul’ e tin ke micheg ngomed, 3 ma dab mu telmed ngak, ya SOMOL ni Got romed e be maruwel ngak ni nge sikeng nagmed, nge guy ko rib t’uf SOMOL romed u polo’ i gumircha’med fa dangay. 4 Mu leked SOMOL ni Got romed mi i par madgun u wun’med. Mu ted nga tagil’ e tin keyog ni ngu’um rin’ed, mi gimed fol u lungun, mu’um pigpiggad ngak mi gimed par ni gimed ba yul’yul’ ngak. 5 Mi gimed thang e fan rok e en ni be weliy fan e lik’ay fa ba profet ni be yog ngomed ni ngam togopluwgad ngak SOMOL, ni ir e chuwegmed u Egypt, ni um pired ni gimed e sib riy. Ya mitney e girdi’ e ba kireb e leam rok ma be guy rogon ni nge waliymed nga orel ko bin e par ni yog SOMOL ngomed ni ngam pired riy. Ere thingar ni thang e fan rok, ya nge yag ni chuw e biney e kireb u fithik’med.

6 "I mus ngak walagmed ni pumo’on, fa fakmed ni pumo’on fa bpin, fa le’engimed nib t’uf romed, fa fager romed nri gimed ba pach e rayag ni nge liyabnag nge pi’ lanin’med ngam ted fan yugu boch e got, ni bogi kan ni gimed nge pi chitamangimed ni kakrom e dariy bigimed ni ka e tay fan. 7 Bochiyad e rayag ni nge pi’ lanin’med ngam ted fan boch e got rok e girdi’ ni gimed ma par nib chugur fa boch e kan rok boch e girdi’ ni gimed ma par nib palog. 8 Dab m’inggad ngorad fa motoyilgad ngorad, fa mu rungyed ya’arad, fa mu yororgad rorad. 9 Ngan thang e fan rorad! Gimed e som’on ni nga mu paged e malang ngorad, mfini pag e girdi’ e malang ngorad. 10 Ngan malang nagrad ngarm’ad! Ya yad be guy rogon ni ngar waliyed gimed nga orel rok SOMOL ni Got romed, ni ir e chuwegmed u Egypt, ni gin ni um sibgad riy. 11 Ma aram e gubin e girdi’ nu Israel ni bay rrung’aged e n’en ke buch; ma bay rrusgad, ma aram e dakriy be’ nra rin’ bayay e binem e kireb.

12 "Ngiyal’ ni gimed be par u lan fapi binaw nike pi’ SOMOL ni Got romed ngomed, ma fa’anra mu rung’aged 13 ni boch e pumo’on ko nam romed nib m’ayfarad e kar waliyed e girdi’ nu lane binaw rorad ni ngar tedfan boch e got ndawor mu tedfan bi’id. 14 Fa’an gimed ra rung’ag ni aray rogon ni kanog, mi gimed muruwliy ngar mu nanged; ma fa’anra ba riyul’ nike buch e biney e kireb, 15 ma aram mi gimed thang e pogofan rok urngin e girdi’ nu lan e re binaw nem ni kub mu’un urngin e gamanman rorad ngay. Mu gathayed e re binaw nem ni ga’ngin. 16 Mu kunuyed nga ta’bang urngin e chugum rok fapi girdi’ ni yad ma par u rom ngam ulungyed nga lulukngun fare binaw. Ma aram migmed orfeg fare binaw nge urngin e tin bay riy ni aram e ba maligach ngak SOMOL ni Got romed. Thingar ni pag fare binaw ndakuriy wotan u but’, ma dab kun ngongliy bayay. 17 Dab mu cha’riyed ban’en ni ngam faned ko fapi chugom ni kan turguy ni ngan gathey, nge yag ni pi’ SOMOL keru’ ko damumuw rok nrib gel nge dag e runguy rok ngomed. Bayi runguymed me yo’or nagmed, ni bod ni micheg ngak e pi ga’ romed ni kakrom. 18 Ni fa’an gimed ra fol ko urngin e tin ke taychilen ni kugog ngomed e daba’, ma gimed rin’ e tini yog ni ngan rin’.