Deuteronômio 3

Piyu Israel nra Gelgad ngak Og ni Pilung

1 "Ma gadad yan u rom ko lel’och ni gadad be sor i yan nga Bashan. Me yib Og ni Pilung nu Bashan ni yad e pi salthaw rok ni cham ngodad u charen fare binaw nu Edrei. 2 Me ga’ar SOMOL ngog, ‘Dab mu rusgad ngak. Bay gu pi’ ngomed, nge pi salthaw rok, nge ga’ngin fare gi nug ni tafen. Ma n’en ni mu rin’ed ngak Sihon ni Pilung rok e pi Amorite ni i gagiyeg u Heshbon e ku aram e n’en ni ngam rin’ed ngak Og.’

3 "Ma aram miki pi’ SOMOL Og ni Pilung nu Bashan nge pi girdi’ rok ngalan pa’dad, magdad thang e pogofan rorad ni yad gubin. 4 Ma ku aram e ngiyal’ nda koled urngin e pi yochi binaw rok — dariy ta’reb e binaw rok nda paged. Nel’ i ragag u gubin e binaw nda koled — ni aram e ga’ngin yang yu Argob, ni gin i gagiyeg Og ni Pilung riy. 5 Urngin e pi binaw ney ma yi go’ kan yororiy nib tolang, ni bay e pi garog riy, nge yu ley i dubchey ni yima man’nag e pi mban e garog nem ngay, nge ku boch e binaw ndariy e yoror riy. 6 Magdad gathey fa yochi binaw ni urngin, ma gadad thang e fan rok urngin e pumo’on, ppin, nge bitir, ni bod rogon nda rin’ed u lan fapi binaw rok Sihon ni Pilung nu Heshbon. 7 Magdad fek e yu ran’ i gamanman rorad ma gadad gathey fa yochi binaw.

8 "Ere ngiyal’nem e da feked rok fa gali pilung nu Amor fare nam ni bay nga ba’ ni ngek fare lul’ ni Jordan, ni tabab ko lul’ ni Arnon me yan i mada’ ko burey ni Hermon. ( 9 Fare burey ni Hermon e ma yog piyu Sidon fithingan ni Sirion, ma piyu Amor e yad ma yog fithingan ni Senir.) 10 Ma gadad fek ga’ngin yang fare gi nug ni tafen Og ni Pilung nu Bashan ni aram e binaw nu daken fa gi flang, nge ga’ngin yang yu Gilead nge Bashan, me yan nge mada’ ngalan e ngek ko fapi binaw nu Salekah nge Edrei."

( 11 I Og ni Pilung nu Bashan e ir e magey ko girdi’ ni Refaim. Kahol rok e ni ngongliy ko malang ni nel’ e fit radan ma ba chugur ni nge gaman e ragag nge aningeg e fit n’umngin, nrogon ni kan turguy ko fol e ngiyal’nem. Ku rayag ni ngan guy e chiney u lan e binaw nu Rabbah ni tafen e pi Ammonite.)

Pi Ganong nra Tafned e Ba’ ni Ngek ko Jordan

12 "Nap’an nda feked fare nam ni ngad tafned, mu gu pi’ ngak e pi ganong rok Ruben nge Gad fare binaw ni bay nga lel’och ko fachi binaw nu Aroer, u charen fare lul’ ni Arnon, nge bang ko fare gi binaw ni go’ burey u Gilead nib mu’un e pi nochi binaw riy ngay. 13 Mu gu pi’ e gin kabay u Gilead ngak balay e ganong rok Manasseh nge ga’ngin yang yu Bashan, ni i gagiyeg Og riy, ni aram ga’ngin yang e nug nu Argob."

(Bashan e yimnang ni binaw ko Refaim. 14 Me Jair ni be’ ko fare ganong rok Manasseh e fek e nug nu Argob ni ga’ngin yang, ni aram yu Bashan. Re gi nug nem e yan nge mada’ ko mathil nu Geshur ngu Maakah. Me tunguy fithingan ko fapi binaw. Kiyi manang ket’aw ko chiney ni pi binaw nem e binaw rok Jair.)

15 "Mu gu pi’ yu Gilead ngak fare ke girdi’ rok Makir ni be’ ko fare ganong rok Manasseh. 16 Ma fa gal ganong rok Ruben nge Gad e gu pi’ fare gi binaw ni tabab u Gilead me yan i mus ko lul’ ni Arnon. Mathil rorad ko yimuch e lukngun fare lul’ ni Arnon, ma mathil rorad ko lel’och e fare lul’ ni Jabbok fithingan, ni bang riy e mathil rok e pi Ammonite. 17 Mu ba’ ni ngal fare gi binaw ntaferad e yan nge mada’ ko lul’ ni Jordan, ni tabab u lan e lel’och ko lipath ni Galilee. Me yan ko yimuch nge yan i taw ko Dead Sea, me yan ko ngek nge mada’ nga enggin fare burey ni Pisgah.

18 "Kugog ngomed e ngiyal’nem ni lungug: ‘I SOMOL ni Got rodad e ke pi’ ngomed e regi binaw ney ni bay ko ngek ko lul’ ni Jordan ni ngam tafned. Ere chiney e ngam fal’eged rogon e salthaw romed mi gimed l’ograd ngar m’onod rok e pi ganong nu Israel ni kabay ngar th’abed e Jordan nga ba’ nem. Ya ngar ayuweged e pi ganong nem nge yag nra feked fare binaw ngar tafned. 19 Kemus ni pi le’engimed, pi fakmed, nge yu ran’ i gamanman romed — ya gumnang ni bo’or yu ran’ i gamanman romed — yad e ngar pired ko yochi binaw ney ni kug pi’ ngomed. 20 Mu ayweged e tin kabay e girdi’ nu Israel nge taw ko ngiyal’ ni kar pired ko fare binaw ni nge pi’ SOMOL ngorad u ba’ ni ngal e lul’ ni Jordan. Ni aram e ke taw ko ngiyal’ nike tayrad SOMOL u rom ni ngar pired u fithik’ e gapas, ni bod nike rin’ u ba’ ney e lul’ ni fan ngomed. Ma aram e fin rayag ni ngam sulod ko re but’ ney ni kug pi’ ngomed.’

21 "Ma aram mu gog ngak Joshua e ngiyal’nem, ni lungug: ‘Kam guyed urngin e tin nike rin’ SOMOL ni Got romed ngak fa gali pilung, ni Sihon nge Og; ma ku bay i rin’ ni aram rogon ngak urngin e girdi’ ni bay mu koled e binaw rorad. 22 Dab mu rusgad ngorad, ya SOMOL ni Got romed e bayi cham ni pa’med.’

Moses nde Un nga langgin yu Kanaan

23 "Re ngiyal’ i nem e gu meybil nib gel,✝3:23 Num 27:12–14; Deu 32:48–52 24 ‘SOMOL ni Th’abi Tolang, kugnang ni kam tabab i dag ngog feni sorom nge feni gel gelngim. Ya dariy ba got u tharmiy fa but’ nrayag rok ni nge ngongliy e pi maang’ang ni kam rin’! 25 SOMOL, mpageg nggu th’ab e Jordan nga ba’ nem, ngug guy fare binaw nib yong’ol ni bay u ba’ nem, ni go’ burey ni bfel’ ya’an nge fapi Burey nu Lebanon.’

26 "Machane bochmed e pi girdi’ nir me damumuw SOMOL ngog ma daki motoyil ngog. Ya ga’ar, ‘Ka yag! Dab kum sul bayay u daken e pi thin ney! 27 Man nga p’ebugul fare Burey ni Pisgah ngam changar ngalan e lel’och nge lan e yimuch, nge lan e ngek nge lan e ngal. Ma ga fal’eg i yaliy e tin ga ra guy, ya ri dab mu th’ab e Jordan nga ba’ nem. 28 Mu fonownag Joshua. Ngam pi’ e athamgil nga laniyan’ nge gel e leam rok, ni bochan e ir e bayi pow’iy e pi girdi’ ney ngar th’abed nga ba’ nem ngar tafned fare binaw ni ga be guy.’

29 "Ma aram magdad par u rom u lan fare loway ni bay nga barba’ fare binaw nu Beth-peor."