EZRA 10

Rogon i Dareg fa yuwu’ i Mabgol

1 Ngiyal’ nib garbug Ezra ni be meybil u mit fare Tempel, ni be yor ma be weliy e pi denen ney, me yib ba ulung nib ga’ u Israel ni — pumo’on, ppin, nge bitir — ngarabad ra liyeged u but’, ni yad be yor nib gel. 2 Ma aram me ga’ar Shekaniah nib mo’on ni fak Jehiel ni be’ ko fare ke girdi’ rok Elam ngak Ezra, "Da kug folgad rok Got kug le’engiyed e pi ppin ney nu bang. Machane yug aray rogon ma kabay e lagan’ rok yu Israel. 3 Ere chiney e thingar da micheged ngak e Got rodad ni bay da n’iged e pi ppin ney nge pifakrad ngar chuwgad u roy. Bay gu rin’ed e n’en ni ga be yog nge fa tinef e girdi’ ni riyul’ ni yad ma tay u gil’ e motochiyel rok Got e karoged ngomad ni nggu rin’ed ni aray rogon. Bay gu rin’ed e n’en ni bay ko motochiyel rok Got. 4 Ezra, I gur e maruwel rom ni ngam mithmith. Gamad bay u wuryal rom, ere mman ngam mu’nag."

5 Ma aram me tabab Ezra i yog ngak e pi tayugang’ rok e prist, nge pi Levite, nge tin kabay e girdi’ ni ngar micheged ni yad ra rin’ e n’en nike yog Shekaniah. 6 Ma aram me yan u mit fare Tempel ngalan e gin nma par Jehohanan riy nib mo’on ni fak Eliashib, nge par u rom e re nep’ nem ni be yornag feni de yul’yul’ e pi girdi’ nem ni un kalbus nagrad u bang. De kay ma de unum ban’en.

7 Ni wereg bbugi thin u ga’ngin yu Jerusalem nge Judah ni gubin e pi’in kar sulod ko kalbus u wuru’ e nam ma ngar mu’ulunggad nga Jerusalem 8 nike yog e tayugang’ rok e pi girdi’ nem. Fa’anra yan dalip e rran ndawori m’ug be’, ma gubin e pin’en nib milfan ngak e go’ yira fek rok, ma yira fek rok mat’wun ni be par ni ir reb i girdi’en fare ulung. 9 U lan fa dalip i rran, ko rofen ni rliw’ ko pul ni mereb, ma gubin e pumo’on ni yad ma par u lan e gin nib milsuwon ngak Judah nge Benjamin e go’ rabad nga Jerusalem ngarbad ra mu’ulunggad ngalan e yoror ko fare Tempel. Ma be aw e n’uw nib gel, ma bochan e lang nga feni ga’fan fare mu’ulung ma yad gubin ni yad be t’on.

10 Me sak’iy Ezra ni prist ngalang nge non ngorad. I ga’ar, "Gimed e ka mu th’abed e motochiyel rok Got ka mu girngiyed e kireb nga daken yu Israel ni ga’ngin ko mabgol ni ka mu ted e ppin nu bang! 11 Ere chiney e ngam weliyed e kireb romed ngak SOMOL, ni fare Got rok e pi ga’ romed, mi gimed rin’ e tin ni bfel’ u wan’. Mu pithged gimed rok e girdi’ nu boch e nam ni yad be par u lan e nam rodad mi gimed n’ag pi le’engimed ni girdi’ nu bang."

12 Me fulweg fapi girdi’ ni yad be tolul, "Demturug e tin ga ra yog ma gamad ra rin’." 13 Machane miki lungurad, "Kay gi ga’ ere ulung ney, ma be aw e n’uw nib gel. Dabkiyag ni ngu’ud sak’iygad u roy u wean ni aray rogon. Ren’ey e gathi ban’en nrayag ni ngan mu’nag u lan reb e rran fa l’agruw, ni bochan e bo’or i gadad e ke rin’ e re denen ney. 14 Mu pag e pi tolang romad ngar pired u Jerusalem nge milfan e re pa’ i oloboch ney ngorad. Ma aram e en ni le’engin reb e bpin nu bang e nge yib ko ngiyal’ ni kanog, ngar mada’gad e pi tayugang’ nge pi tapuf oloboch u lan e binaw rok. Aray rogon kanawo’en me chuw e damumuw rok Got ko re oloboch ney."

15 Dariy be’ ni togopluw nga rogon ni ngan rin’ e ren’ey, kemus ni Jonathan nib mo’on ni fak Asahel nge Jahzeyah nib mo’on ni fak Tikvah, me tay Meshullam nge Shabbethai tangirow ni l’agruw i Levite.

16 Fa pi’in ni ur kalbusgad u bang ni kar sulod e m’ag u wan’rad fare puruy’, ere mel’eg Ezra ni prist e pi pumo’on u fithik’ e pi’in lolgen fa yuke girdi’ nge yoloy fithingrad. Me yan i rofen ni m’on ko pul ni ragag miyad tabab i gaweg e pi’in ni kar mabgolgad nga reb e nam 17 mu lan e dalip i pul ni migid e ra pir’eged murung’agen gubin e pumo’on ni bay le’engirad ni ppin nu boch e nam.

Pumo’on nra le’engiyed e ppin nu bang

18 Ba’aray fithingan e pi pumo’on ni kar le’engiyed e ppin nu bang:

Pi prist, nni yoloy ni ba kan e girdi nge ba kan:

Fare ke girdi’ rok Joshua nge pi pumo’on ni walagen, pi pumo’on ni pifak Jehozadak: Maaseyah, Eliezer, Jarib, nge Gedaliah. 19 Yad e ra micheged ni yad radar pi le’engirad, ma yad ra pi’ ba saf ni pumo’on ni maligach ni fan ko denen rorad.

20 Fare ke girdi’ rok Immer: Hanani nge Zebadiah

21 Fare ke girdi’ rok Harim: Maaseyah, Elijah, Shemayah, Jehiel, nge Uzziah

22 Fare ke girdi’ rok Pashhur: Elioenai, Maaseyah, Ishmael, Nethanel, Jozabad, nge Elasah

23 Pi Levite:

Jozabad, Shimei, Kelaiah (ni ku yima pining ni Kelita), Pethahiah, Judah, nge Eliezer

24 Girdi’en e Musik:

Eliashib

Matnag u Tempel:

Shallum, Telem, nge Uri

25 Nge Ku Boch:

Fare ke girdi’ rok Parosh: Ramiah, Izziah, Malchijah, Mijamin, Eleazar, Malkijah, nge Benayah

26 Fare ke girdi’ rok Elam: Mattaniah, Zekariah, Jehiel, Abdi, Jeremoth, nge Elijah

27 Fare ke girdi’ rok Zattu: Elioenai, Eliashib, Mattaniah, Jeremoth, Zabad, nge Aziza

28 Fare ke girdi’ rok Bebai: Jehohanan, Hananiah, Zabbai, nge Athlai

29 Fare ke girdi’ rok Bani: Meshullam, Malluk, Adaiah, Jashub, Sheal, nge Jeremoth

30 Fare ke girdi’ rok Pahath Moab: Adna, Kelal, Benayah, Maaseyah, Mattaniah, Bezalel, Binnui, nge Manasseh

31,32 Fare ke girdi’ rok Harim: Eliezer, Isshijah, Malkijah, Shemayah, Shimeon, Benjamin, Malluk, nge Shemariah

33 Fare ke girdi’ rok Hashum: Mattenai, Mattattah, Zabad, Elifelet, Jeremai, Manasseh, nge Shimei

34-37 Fare ke girdi’ rok Bani: Maadai, Amram, Uel, Benayah, Bedeyah, Cheluhi, Vaniah, Meremoth, Eliashib, Mattaniah, Mattenai, nge Jaasu

38-42 Fare ke girdi’ rok Binnui: Shimei, Shelemiah, Nathan, Adayah, Maknadebai, Shashai, Sharai, Azarel, Shelemiah, Shemariah, Shallum, Amariah, nge Josef 43 Fare ke girdi’ rok Nebo: Jeyel, Mattithiah, Zabad, Zebina, Jaddai, Joel, nge Benayah

44 Gubin e pi pumo’on ney ni kar le’engiyed e ppin nu bang. Go’ rdargad pi le’engirad, miyad l’oeg pi le’engirad nge pifakrad ngar chuwgad u rom.