EXODUS 17

Ran ni yib ko fare War

1 Me chuw urngin e girdi’ nu Israel u daken e ted ni desert u Sin, ngu’ur pired u bang ngu bang u tan lungun SOMOL. Rabad ra pired nga Refidim, machane dariy e ran u rom ni yira unum. 2 Miyad welthin nib togopluw ngak Moses ni be lungurad, "Mpi’ e ran ngomad nggu unumed."

Me fulweg Moses ni ga’ar, "Mang ni gimed be togopluw ngog? Mang ni gimed be sikengnag SOMOL?"

3 Machane kari gel e belel ngak e girdi’, mu ur gun’gun’ niged Moses. I lungurad ngak, "Mangfan ni mfekmad nga wuru’ yu Egypt? Bochan e ngam li’mad nriyul’ ko belel, nge pifakmad, nge gamanman romad?" 4 Mri meybil Moses ngak SOMOL ni ga’ar, "Mang e nggu rin’ ngak e pi girdi’ ney? Ya ke chugur ni ngar malang nigedgag nggum’." 5 Me ga’ar SOMOL ngak Moses, "Mfek boch e pi’in yad ma yog e thin rok piyu Israel ngar uned ngom, ngam m’onod rok e girdi’ i yan. Ma ga fek fare ley i sog nge un ngom ni fa’an mu toy ko lul’ ni Nile. 6 Ma bay gu sak’iy nga p’eowchem u rom u daken fare war nu Horeb. Ma ga toy fare war nge yib e ran riy nga but’ nge unum e girdi’." Me rin’ Moses ni aram rogon u p’eowchen e pi’in yad ma yog e thin rok piyu Israel. 7 Min tunguy fithingan e gin’em ni Massah nge Meribah,*17:7 MASSAH . . . MERIBAH: Gali fithingan ney ni Hebrew e fan e "Sikeng" nge "Togopluw." ni bochan e i togopluw piyu Israel, ni aram e kar sikeng niged SOMOL ko fa ngiyal’ nra fithed ni lungurad, "Gur bay SOMOL rodad fa de moy?"

Mael ni tay piyu Israel nge yu Amalek

8 Me yib girdi’en yu Amalek ngar maelgad ngak piyu Israel u Refidim. 9 Me ga’ar Moses ngak Joshua, "Mmel’eg boch e pumo’on mi gimed yan ngam maelgad ngak e yu Amalek gabul. Bay gu sak’iy nga daken e burey ni bay fare ley i sog u pa’ag ni yog Got ni nggu fek." 10 I rin’ Joshua ni bod ni yog Moses ngak me yan ni ngar maelgad yu Amalek, me yan Moses nge Aron nge Hur nga p’ebugul e burey. 11 Ma n’umngin nap’an ni be par Moses nike k’iyag pa’ ngalang e be par piyu Israel ni yad be gel ko mael, ma nap’an nra tay pa’ nga but’ me gel yu Amalek i yan. 12 Ma nap’an ni magaf pa’ Moses, me fek Aron nge Hur ba malang ngar tew nga but’ nge par Moses nga daken, miyow sak’iy nga to’oben nge bagayow me kol baraba’ i pa’. Mi yow tay pa’ ni aram rogon nge aw e yal’. 13 Mri gel Joshua ngak fapi Amalek.

14 Me ga’ar SOMOL ngak Moses, "Mu yoloy e ran’ey nga babyor nge par ndab ni pag talin, ma gog ngak Joshua ni bay gu gagiyegnag yu Amalek ngar pired nike math murung’agrad."✝17:14 Deu 25:17–19; 1 Sa 15:2–9 15 Me toy Moses ba altar me tunguy fithingan ni ga’ar, "I SOMOL e Flak rog." 16 Me ga’ar, "Ngan tining ngalang e flak rok SOMOL! Ya SOMOL e bayi cham ngak yu Amalek u reb e mfen ngu reb."