EXODUS 27

Fare Altar

1 "Mu ngongliyed ba altar ko gek’iy ni acacia. Re altar ney e ta’reb n’umngin nga radan, ya medlip nge baley e fit n’umngin, ma ku medlip nge baley e fit radan, ma aningeg nge baley e fit tolngin. 2 Ma aningeg i tabthung riy e ngam ngongliyed ya’an e gagey ko gamanman u daken. Pi gagey ney e ba peth ko fare altar, mi gimed ing e re altar ney ni ga’ngin ko wasey ni bronze. 3 Mu ngongliyed bogi th’ib ni ngu’un tay e awat nga langgin, nge boch e sebel, nge bogi dabiy, nge bogi fok nib ga’, nge yu raba’ i fen e fek nifiy. Gubin e pin’ey ma ngam ngongliyed ko bronze. 4 Mu ngongliyed bangi nug ni waya ko wasey ni bronze, mi gimed yin’ aningeg i luwaw nib ga’ ko pi tabthung riy. 5 Regi waya ney e nga mon’ed nga tanggin fare altar; nra taw taban nga lukngun fare altar. 6 Mu ngongliyed ruwley i mat’ ko gek’iy ni acacia mi gimed ing ko wasey ni bronze, 7 mi nin’ baley u lan reb fa gal luwaw u barba’ fare altar, ma baley ngalan reb u barba’ u nap’an ni ngan fek. 8 Mu ngongliyed e re altar nem ni bod ya’an ba kahol ni dariy ban’en riy, nri bod rogon ni gu dag ngam guyed u daken fare burey.

Rungrung ko fare Tent rok SOMOL

9 "Re Tent nem ni bay u p’eowcheg e ngam ngongliyed lan e yoror riy ko kateng ni wech. Ba’ ni yimuch riy e wugem e yard n’umngin e pi kateng ni rungrung riy, 10 ni kan the’ nga rliw’ i rumog ni bronze ni kan ayliy nga daken e pi ayal riy nib bronze ni ku rliw’ yang, ni bay e pi lam nge ralap u p’ebugul nni ngongliy ko silber. 11 Ma ku aram rogon e tin ngam ngongliyed ni fan ko ba’ ni lel’och e rungrung. 12 U lay ni ngal e ngkun tay e kateng riy ni rliw’ nge lal e yard n’umngin, ma ragag ley e rumog riy ma ku ragag e ayal riy. 13 Ma ba’ ni ngek riy, ni aram e gin ni yima yib riy, e rungrung riy e ku rliw’ nge lal e yard radan. 14,15 Ma nga barba’ nge nga barba’ i langan e gin ni yima yib riy, e kateng riy e medlip nge balay e yard radan, ni bay dalip e rumog riy ma dalip e ayal riy. 16 Ma gin ni yima yib riy e bay bang e kateng riy ni ragag e yard n’umngin nni ngongliy ko mad ni wech, ma kan lifith bunu’en e saf u fithik’ nib ra’en mak’ef, purple, nge row ni kan sisyunag ni bfel’ ya’an. Re gi kateng ney e ngan the’ nga aningeg ley i rumog ni kan ayliy nga dakene ayal riy ni ku aningeg. 17 Gubin ler e rumog nib liyeg e re yoror nem e go’ ba peth ko yuley i ralap ni silber, ni bay e lam ko kateng riy nikun ngongliy ko silber ma pi enggin e go’ bronze. 18 Re yoror nem e wugem e yard n’umngin, ma rliw’ nge lal e yard radan, ma l’agruw nge baley e yard tolngin. Ma yungi kateng riy e ngan ngongliy ko mad ni wech, ma pi ayal riy e go’ ngan ngongliy ko bronze. 19 Gubin mam’en fare Tent, nge gubin e pi yuluy ko fare Tent nge yoror riy e go’ ngan ngongliy ko bronze.

Rogon i Ayweg fare Magal

20 "Mu reg e thin nge yan ko girdi’ nu Israel ngar feked i yib ngom e tin th’abi fel’ ko pi gapgep rorad ni olive ngan fanay ko fare magal, ya nge yag nni gal’ ni gubin e blayal’. 21 I Aron nge pi pumo’on ni fak e yad e ngu’ur faleged rogon fare magal u lan fare Tent ko gin gu bay riy. Re magal ney e ngan tay nga ba’ ni wuru’ fare gi kateng u m’on ko fare Kahol ko M’ag. Mu rom u p’eowcheg e nge yik’ e re magal nem riy ni blayal’ nge mada’ ko kadbul. Biney e nge par nib gam’ing ni ngi i rin’ piyu Israel u reb e mafen ngu reb ni dariy n’umngin nap’an.