Êxodo 18

17 Ma aram me ga’ar Jethro, "Gathi arogon e ran’ir ni ngam rin’ ma bfel’. 18 Ra aw parwom riy ma ku arrogon e pi girdi’ ney. Kay gi tomal ngom ni go’ gur. 19 Are chiney e nggu pi’ boch e fanow ni bfel’ ngom, me Got e ngi i par rom. Bmat’aw ni ngu’um man ni owchen e girdi’ nga p’eowchen Got, ma ga fek e tin yad ma lu’ag e thin riy i yan ngak. 20 Ma thangar um machib nagrad ko tin keyog Got ni ngan rin’, ma ga be tamilangegrad u rogon ni ngu’ur pired nge n’en thingar ur rin’ed. 21 Ma tin kabay ni ngam rin’, e ngam mel’eg boch e pumo’on u fithik’ e pi girdi’ ney, ni bay madgun Got u wun’rad, ma rayag ni nge pagan’uy ngorad, ma daburad e sasalap. Ma ga ta’rad ni yad e ga’ ko yu ulung i girdi’ ni yu biyu’, nge yu ra’ay, nge yu wugem, nge yu ragag. 22 Ma ga pagrad ngu’ur pithiged e oloboch u puluwon e girdi’ ni gubin ngiyal’. Yu pa’ i oloboch nib ga’ ma ba mo’maw’ e ngar feked i yib ngom, machane yad e ngar pithiged urngin e yoch pa’ i oloboch. Ya ngar uned ngom i chibiy gilbam nge mom ngom. 23 Fa’an ga ra rin’ e ran’ey ni rogon nike yog Got, ma dab i aw parwom riy, ma gubin e pi girdi’ ney ni yad ra yan nga taferad nike puf urngin e yupa’ i oloboch u puluworad."