Êxodo 24

Fare M’ag nni pag e hang ngay

1 Ma ke ga’ar SOMOL ngak Moses, "Mired Aron, nge Nadab, nge Abihu, nge medlip i ragag u fithik’ fapi girdi’ ni yad ma yog e thin rok piyu Israel nga daken e burey; ma nap’an e ki gimed bay nga orel, mi gimed siro’ nga but’ ni gimed be liyor. 2 Kemus ni gur e ga ra yib nga to’obeg; ma dariy bagyad e pi’in kar uned ngom nra yib nga to’obeg, ma tin ke magey e girdi’ e dab ra uned nga daken e burey."

3 Me yan Moses nge weliy ngak e girdi’ urngin e tin ngan rin’, nge urngin e pi motochiyel rok SOMOL. Me fulweg urngin e girdi’ nta’abyay ni lungurad, "Bay gu rin’ed gubin e tin keyog SOMOL ni nggu rin’ed." 4 Me yoloy Moses nga but’ urngin e tin keyog SOMOL ni nge rin’ e girdi’ nu Israel. Me od Moses nri kakadbul, nge ubung ba altar u enggin fare burey, me suweg ragag nge l’agruw i malang, nra reb fapi malang ma fen reb fa ragag nge l’agruw i ganong nu Israel. 5 Ma aram me l’oeg e pagel nu Israel ngar pi’ed e maligach ni ngan urfiy ni polo’, ma ku er rogon nra li’ed e garbaw ni ngan pi’ ni maligach ngak SOMOL, ni fan e nge aw e gapas u thilrad nge Got. 6 Me fek Moses baley u racha’en fapi gamanman nge tay ngalan yu raba’ i dabiy; me wereg e tin ke magey nga daken e altar. 7 Me fek fare ke babyor ni babyoren fare m’ag u thilin Got nge piyu Israel nge be’eg ngak piyu Israel ni ba ga’ laman, me ga’ar piyu Israel, "Bay gu rin’ed urngin e tin keyog SOMOL ni nggu rin’ed; bay gu folgad rok." 8 Me fek Moses fa yu raba’ i dabiy ni bay e racha’ riy nge wereg e racha’ riy nga daken piyu Israel. Me ga’ar, "Ireray fare racha’ ni hang ko fare m’ag ni ngongliy SOMOL u thilmed u nap’an ni pi’ e pi motochiyel ney."✝24:8 Mat 26:28; Mrk 14:24; Luk 22:20; 1 Kor 11:25; Heb 9:20; 10:29

9 Me yan Moses, Aron, Nadab, Abihu nge fa melip i ragag e pi’in yad ma yog e thin rok piyu Israel nga daken fare burey, 10 miyad guy fare Got rok piyu Israel. Tan e rifrif u ay e ba’ ban’en riy ni bod ba wo’ nni gad ko malang ni sapphire, ni ra’en e bod feni mak’ef lanelang. 11 Got e de bit’ ngak fapi pumo’on ni yad ma yog e thin rok piyu Israel; ra guyed Got, ma aram miyad abich miyad garbod u ta’bang.

Moses u daken e burey ni Sinai

12 Me ga’ar SOMOL ngak Moses, "Moy ngog nga daken e burey ngam par u roy. Ya nggu pi’ ngom fa gal yang i malang ni kug yoloy ni bay fapi motochiyel riy nge tin ngan rin’, ni kug yoloy ni nge fonownag e girdi’ nu Israel." 13 Me fal’eg Moses rogon, ma ku aram rogon ni rin’ e tapigpig rok i Joshua, miyow yan nga daken e burey rok Got. 14 Me ga’ar Moses ngak fapi pumo’on ni yad ma yog e thin, "Mu son niged gamow u roy nge mada’ ko ngiyal’ ni bay gu sulow riy. Nge par Aron nge Hur romed u roy; ra yib e oloboch nga puluwon be’ ni ngan pithig me yan ngorow."

15 Me yan Moses nga daken e burey, me ing e manileng fare burey. 16 Me yib ram’en SOMOL nga daken e burey ni Sinai, me ing fare gi manileng e re burey nem ni nel’ e rran. Me chirofen ni medlip e rran ngay me non SOMOL ngak Moses u lukngun fa gi manileng. 17 Ma piyu Israel e yad be guy maluplupen SOMOL ni bod ba nifiy ni be daramram u daken p’ebugul e re burey nem. 18 Me yan Moses ngalang ko fare burey nge chuw nga fithik’ fare gi manileng. Me par u rom ni aningeg i ragag e rran nge nep’.