1 Ngan thoy e yabul u lan yu Zion;

ni fare burey nib thothup* rok Got.

Gimed e girdi’ nu Judah mu t’on gad,

ya fare rran rok SOMOL e ke chugur.

2 Ra yan i aw ni ba lumor ma ba lumolang e rofen nem,

nde fel’ lanelang ma der m’ug ram’en e yal’ e re rran nem.

Ma asmen’ing ni pire’ ni pire’ e yad be yan nga m’on

ni bod e lumor nike upunguy e pi burey.

Dariy ban’en ni ka’a ni guy ni aram rogon,

ma dabki yodrom bi’id.

3 Kar longuyed e woldug ni bod rogon e nifiy ni aw ko woldug.

U pulworad nga m’on e but’ riy e bod e milay’ nu Eden,

ma nga keru’rad e kar paged ni bod bangi ted ni desert.

Dariy ban’en nrayag ni nge mil rorad.

4 Yad bod ya’an e os;

yad be mil ni bod rogon e os nma un ko mael.✝

5 Yad be tim’og u daken e pi burey i yan,

ni gowa lingan e pi chariot;

ara bod lingan e pan nib mlik’ ni aw e nifiy ngay.

Kar k’afgad ni bod baraba’ i salthaw ni pire’ ni pire’ ni kar fal’eged rogorad ni ngranod ko mael.

6 Nap’an ni yad ra chugur i yib, ma urngin e girdi’ ni be yim’ ni marus,

ma urngin e owchef ni bayi pig nge m’ay racha’en.

7 Yad ra cham ni bod girdi’en e mael;

ma yad ra gararaw nga daken e yoror ni bod e salthaw.

Yad gubin ni bay ranod u puluwrad nga m’on

ndab ra thiliyeged e gin yad be sor ngay,

8 ara magawon bagayad ngak bagayad.

N’en ni kan tay ni nge magawon ngorad e dabiyag ni nge talegrad.

9 Bay rabad ni yad ba machreg ngarbad ra po’gad ngalan binaw;

miyad yib u daken e yoror nga baraba’;

miyad gararaw nga daken e naun,

miyad yan u winda nga naun ni bod rogon e moro’ro’.

10 Yad ra yib ma but’ ni bay nga m’on rorad e be durru’;

ma be rur lanelang.

Yal’ nge pul e bayi par nike talumor,

ma pi t’uf e dabki m’ug ram’en.✝

11 I SOMOL e bayi yog ngak e salthaw rok e tin ngar rin’ed ni bay yib laman ngorad ni bod lingan e dirra’.

Ma pi’in yad be fol rok

e yad bpire’ ma yad ba gel.

Re rran rok SOMOL nem e rib gel feni kireb!

Mini’ e ra magay riy ni kabfos?✝

12 Me ga’ar SOMOL, ’Mus ko chiney

nrayag ni ngan kalngan’uy ngan pi’ keru’uy ko kireb ni yibe ngongliy ngan sul ngog,

ni kan pag e abich ma yibe yor ma yibe dololoy’.

13 Mu paged lanin’med nike m’ing nge gagyal u dakenmed;

ma gathi kemus ni ngam guchthuyed e mad romed.’

Mu sulod ngak SOMOL ni ir e Got romed.

Ya ba gol ma ba sug ko runguy’;

ya ba gumaen’ mma tay u gil’ e tin ni micheg;

ma gubin ngiyal’ ma ke fal’eg rogon ni nge n’ag fan u wan’ e kireb ma gathi nge gechig.

14 Ma sana ra thilyeg SOMOL ni Got romed laniyan’

nge fal’eg wa’athmed u wom’ngin e woldug romed.

Ma aram e rayag ni ngam pi’ed ngak e grain nge wayin.

15 Mu thoyed e yabul u daken e burey ni Zion;

mogned ni ngan pag e abich mi gimed pining e mu’ulung!

16 Mu kunuyed e girdi’ nga ta’bang;

mu fal’eged rogorad ni fan nga reb e muulung nib thothup;

mu kunuyed e pilibthir;

mu kunuyed e pi’in bitir,

ma ku er rogon e bitir ni kabran.

Mus ngak e pi’in kafini mabgol

ni thingar ra chuwgad u lan e pi senggil rorad ngar uned ko wub.

17 Pi prist ni yad be pigpig ngak SOMOL

u lan e Tempel u thilin langan e mab nge altar

e thingar ra yorgad miyad meybil ni lungurad,

’SOMOL, mu runguy girdi’em.

Dab mu pag yugu boch e nam ngar darifan niged gamad mu ur moning niged gamad

ni be lungurad, ’Bu uw e Got romed?’’

18 Ma aram me dag SOMOL ni be leamnag e nam rok;

ma be runguy e girdi’ rok.

19 Me fulweg ngorad ni ga’ar,

’Chiney e aram e nggu pi’ ngomed

e grain nge wayin nge gapgep ni olive,

ngam chum’er gad riy.

Ma yugu boch e nam e gathi bay kur fananikayed gimed.

20 Bay gu chuweg romed e pi asmen’ing ni karbad ngomed u lel’och,

ma bay gu tuluf boch i yad nga daken e yungi ted nder tugul ban’en riy.

Tin ni bay nga m’on e bay ntulufrad ngalan fa gi day ni Dead Sea fithingan,

ma tin ni bay nga tomur e bay ntulufrad ngalan fa gi day ni Mediterranean fithingan.

Bay ra mel gad.

Bay gu thang owcharad ni bochan urngin e tin kar rin’ed ngomed.

21 ’Pi flang, dab mu rusgad,

machane ngam felfelan’ gad me fel’ lanin’med,

ni bochan e kari pire’ ban’en nike ayuwegmed SOMOL riy.

22 Pi gamanman, dab kum rusgad.

Ya binaw nma tugul e pan riy e ke galunglung,

ma gek’iy e ke k’uf;

ke yo’or wom’ngin e fig nge grape.

23 ’Mu felfelan’gad e girdi’ nu Zion,

mu felfelan’ gad ni bochan e tin ke rin’ SOMOL ni Got romed ngomed.

Ke pi’ ngomed e n’uw ni bfel’ urngin ko ngiyal’ ndabisiy ni nge yag ngomed, ni bod ni i rin’,

ma ke pu’og e n’uw nga but’ u nap’an e garbeb ni fan ngomed,

ma ke pi’ e n’uw u ngal’an e yafang nike tabab e gowel ni bod ni i rin’ ko som’on.

24 Yungi n’en ni yima gunugunuy e grain riy e bayi sug ko grain;

ma pi low u charen e gin yima udiy e wayin nge olive riy e bayi sug nge m’ap nga but’ ko wayin nge gapgep ni olive.

25 Bay gu fulweg ngomed e n’en ke mul u pa’med

u lan fapi duw ni longuy baran’ i asmen’ing e woldug romed.

I gag e gu pi’ e pi asmen’ing nem ni bod baraba’ i salthaw nge yib i togopluw ngomed.

26 Chiney e aram e bayi yo’or ganmed mi gimed par ni kam chum’er gad.

Ma bay mogned e sorok ngak SOMOL ni ir e Got romed,

ni ir e ke rin’ bogi n’en nrib fel’ ngomed.

Girdi’ rog e gathi bay kun fananikayrad bayay.

27 Ma gimed piyu Israel e bay mu nanged ni gu ba’ u fithik’med,

me Gag SOMOL, e Gag e Got romed,

ma dakuriy yugu reb e Got ngabang.

Girdi’ rog e gathi bay kun darifannagrad bayay.

28 ’Ma tomur riy e bay gu pu’og e Kan Nthothup rog nga daken urngin e girdi’,

ma pi’in pagel romed nge pi’in rugod romed e bay ra weliyed e thin rog ngak e girdi’;

ma pi pumo’on ni kar pilibthirgad e bay i yib e lik’ay ngorad,

ma pi’in pagel romed e bay ni piliyeg e changar rorad ngu’ur guyed bogi ban’en.

29 Re ngiyal’ i n’em e bay gu pu’og e Kan Nthothup rog

ni mus ngadaken e pi’in sib, ni pumo’on nge ppin ma kubmu’un ngay.

30 ’Bay gu tay e pow nga lanelang

nge nga daken e fayleng ni nge ginaeng e girdi’ ko re rran nem;

ni pu’og e racha’, nge nifiy, nge manileng ni ath nib suwon ngalang.

31 Ma bayi lumor e yal’,

ma bayi pig ra’en e pul nge row ni bod e racha’

u m’on ndawori taw e re rran rok SOMOL nem, ni reb e rran ni ba ga’ ma ba gel e gafgow

nra fek i yib.✝

32 Machane urngin e pi’in yad ra wenig ngak SOMOL ni nge ayuwegrad e yad ra fos.

Ni bod nike yog SOMOL ni ga’ar,

’Boch e girdi’ u daken e burey ni Zion

nge yu yang u Jerusalem e bay ra thaygad.

Pi’in kugu mel’egrad e yad ra fos.’ ’✝