2 KRONICLES 21

1 Me yim’ Jehoshafat mi ni k’eyag u lan fapi malangen e yam’ ko pilung u lan e Binaw rok David me Jehoram nib mo’on ni fak e yan nga luwan nge mang pilung.

Jehoram ni Pilung nu Judah

2 Jehoram nib mo’on ni fak Jehoshafat ni Pilung nu Judah e nel’ e pumo’on ni walagen: Azariah, Jehiel, Zekariah, Azariahu, Maikal, nge Shefatiah. 3 Chitamangirad e pi’ e gol ngorad nib yo’or, silber, nge ku boch ban’en nib tolang pulwon, mra reb fapi binaw nu Judah ni kan yororiy nib gel ni fan ko mael ma bagyad e ba milfan ngak. Machane bochan ni Jehoram e th’abi nganni’ me tay Jehoshafat ni ir e nge yan nga luwan nge mang pilung. 4 Nap’an ni kari milfan fare nam nga tan e gagiyeg rok Jehoram, me yog ngan thang e pogofan rok urngin fapi pumo’on ni walagen, nge ku boch e tayugang’ nu Israel.

5 Jehoram e guyey nge l’agruw e duw yangren me mang pilung nge gagiyeg u Jerusalem ni meruk e duw. 6 Me folwok ni kireb rok Ahab ni Pilung nge ku boch e pilung nu Israel, ni bochan e ke le’engiy reb e bpin ni fak Ahab. Me denen Jehoram nib togopluw ngak SOMOL, 7 machane de m’agan’ SOMOL ngay ni nge thirif u but’ e pi’in owchen David, ni bochan e ke ngongliy ba m’ag u thilrow David nike micheg ngak ni pi’in owchen e bay ur gagiyeggad ni gubin ngiyal’.

8 Nap’an e gagiyeg rok Jehoram me cheal yu Edom ngar togopluwgad ngak yu Judah ngar chuwgad u tan pa’ e pilung nu Judah ngar pired rorad. 9 Ma aram me yan Jehoram nge pi tolang rok u chariot ngar m’aged e mael nga Edom. Me longobiyrad fa raba’ i salthaw nu Edom, machane me yan i nep’ me yag ni ngar thaygad ngar milgad. 10 Ma ka aram e par yu Edom ni ka ra chuwgad u tan pa’ yu Judah. Ma ku ngiyal’ i n’em miki cheal fare binaw nu Libnah nge togopluw ngak yu Judah, ni bochan e ke digey Jehoram i SOMOL ni Got rok e pi chitamngirad ni kakrom. 11 Mus ko yungi n’en ni tagil’ e tayfan rok e pi’in ndar nanged Got niki ubung u daken e ted nu Judah me pow’iy e girdi’ nu Judah ngu Jerusalem ngar denengad nib togopluw ngak SOMOL.

12 Elijah ni profet e pi’ bangi babyor nge yib ngak Jehoram, ni be ga’ar: "I SOMOL ni fare Got rok David ni chitamngim, e nge gechig nigem, ni bochan e dam folwok rok e chitamam i Jehoshafat ni Pilung, ara mu folwok rok i Asa ni Pilung ni tutuw rom. 13 Ya n’en ni ka mu rin’ e kam folwok rok e pilung nu Israel ma ka mu pow’iy e girdi’ nu Judah ngu Jerusalem ka ra pired ndakur yul’yul’gad ku Got, ni bod Ahab nge pi’in owchen. Mus ngak pi walagem ni pumo’on ma ka mu thang e pogofan rorad, ni yad ba manigil boch ngom. 14 Ma aram e n’en nra yib riy e ra gechignag SOMOL e girdi’ rom, nge pifakam, nge pi le’engim nib gel, me gathay gubin e pin’en nib milsuwon ngom. 15 Me gur e bayi aw ba m’ar ko gil’iggan rom ngam gafgow riy ko amith ni bay i ubchiya’ ni yu rran."

16 Boch piyu Filistia nge piyu Arab e ur pired u to’oben bang nma par piyu Sudan riy u dap’eday. Me waliyrad SOMOL ngranodnag e mael ngak Jehoram. 17 Miyad m’ag e mael nga Judah ngar feked bogi ban’en u lan fare naun ko pilung, mu ku ra feked pi le’engin fare pilung nge pifak ni pumo’on kemus ni go’ Ahaziah e da nfek, bin wen e pagel u fak.

18 Ma aram nga tomuren e pin’ey, me pag SOMOL ba m’ar ko gil’iggan nge yib ngak fare pilung. 19 Ba chugur ni nge gaman l’agruw e duw ni gel fare m’ar i yan nge mada’ ko ngiyal’ ni yim’ fare pilung u fithik’ e amith. Girdi’ ni ur moyed u tan pa’ e dar urfiyed ba nifiy nib ga’ ni ngan tayfan riy ni bod nrin’ ngak e pi chitamngin.

20 Jehoram e mang pilung ni guyey nge l’agruw e duw yangren, me gagiyeg u Jerusalem ni meruk e duw. Dariy be’ ni kireban’ nap’an ni yim’. Miyad k’eyag u lan fare Binaw rok David, machane dan k’eyag ngalan fapi low ko yam’ rok e pilung.