2 KRONICLES 4

Gathon e Tempel

1 Me yog Solomon ni Pilung ni ngan ngongliy ba altar ni bronze, ni ta’reb n’umngin nga radan ni go’ guyey e fit ma ragag nge lal e fit tolngin. 2 Miki ngongliy ba teng nib bronze ni ba lulbuy, ni medlip nge baley e fit to’marngin, ma ragag nge lal e fit u barba’ nga barba’, ma aningeg i ragag nge lal e fit ga’ngin lukngun ni kan liyeg e fol riy. 3 Mu mirichlen fare teng u wuru’ e bay l’agruw thal i nunuw riy ni bay ba thal nga daken ba thal. Pi nunuw n’em riy e ya’an e garbaw ni pumo’on, ni ka ni ngongliy nib peth ko fare teng. 4 Fare teng e kan tay nga daken keru’ ragag nge l’agruw i garbaw ni pumo’on nib bronze ni yad bmath’ keru’, ra dalip ma ta’bang e yad ba sap ngay. 5 Ma fare teng e dalip e inch duba’gin. Ma merichlen e bod merichlen ba kap, nib bug nga wuru’ ni bod ba flores nike puf. Re teng nem e gonap’an e ragag nge lal e biyu’ e gallon gathon. 6 Mu ku ra ngongliyed ragag raba’ i dabiy, lal raba’ e ngan tay nga ba’ ni yimuch ko fare Tempel ma lal raba’ nga ba’ ni lel’och. Ngu’un luknag yuyang ko fapi gamanman ni kan urfiy ni maligach riy. Ma ran ko fare teng nib ga’ e ngi i fanay e prist ngu’ur maluk niged pa’rad ngay.

7,8 Miyad ngongliy ragag i tagil’ e magal nib gol nrogon ya’an e pi tagil’ e magal ni go’ yima ngongliy, nge ragag e tebel, ngan tay e pin’ey ngalan fare senggil nib ga’ u lan fare Tempel, ra barba’ fare senggil ma lal e tagil’ e magal nge lal e tebel ntay ngay. Mu ku ra ngongliyed ra’ay raba’ e taray nib gol.

9 Miyad ngongliy reb e yoror ni fan ngak e prist ngalan fare yoror nib ga’ ni ku ra ngongliyed u mit fare Tempel. Pi mab u mit e pi garog u thilin fa gali yoror e kan ing ko bronze. 10 Fare teng e ni tay u charen tabthungen fare Tempel ko yimuch ni ngek.

11-16 Miki ngongliy Huram e pi th’ib, nge pi sebel, nge taray. I mu’nag ni gubin e pin’en ni micheg ngak Solomon ni Pilung nra ngongliy ni fan ko fare Tempel:

Fagal duga’

Fa gal raba’ i taray ni kan fal’eg u daken p’ebgul fagal duga’

Fa yukiyi chen ni kan lifith nib nunuw u p’ebugul baley fagal duga’

Fa 400 i ya’an e gek’iy ni pomegranate nib bronze ni kan ayliy ni l’agruw thal nib liyeg p’ebugul fagal duga’

Fa ragag i cart

Fa ragag raba’ i dabiy

Fare teng

Fa ragag nge l’agruw i ya’an e garbaw ni pumo’on nma par fare teng u daken

Fapi th’ib, nge sebel, nge fok

Huram e ir e masta ko girdi’en e mongongol wasay ko gubin e pin’ey nib bronze ni kan gichiy, ni bod nike ta’chiylen Solomon ni Pilung, ni ngu’un maruwel ngay u lan fare Tempel rok SOMOL.

17 En ni pilung e yog ni ngan ngongliy e pin’ey u tagil’ e mongongol wasey u thilin yu Sukkoth ngu Zeredah u lan fare loway ni Jordan. 18 Ere bo’or e pin’en nni ngongliy ndariy ta’abe’ ni manang tomalngin gubin e bronze nni fanay ngay.

19 I Solomon ni Pilung e ki yog ni ngan ngongliy boch ban’en ko gol ni fen fare Tempel: fare altar nge pi tebel ni tagil’ e flowa ni yima ognag ngak Got; 20 nge fapi tagil’ e magal nge fapi magal nib gol ni un urfiy u mit fa Gin Th’abi Thothup, ni bod rogon nturguy; 21 fapi flores ni nunuw, nge fapi magal, nge fen e fek nifiy; 22 nge fen e mathang nifiy ko magal, nge yu raba’ i taray, nge yu raba’ i pilet ni fen e incense, nge yu raba’ i th’ib ni yima fek e nifiy u langgin. Urngin e pin’ey ma ni ngongliy ko gol nib th’abi fel’. Fapi mab nib migid nga wuru’ fare Tempel nge pi mab ni yan ngalan e Gin Th’abi Thothup e ni ing ko gol.