2 KRONICLES 12

Shishak ni Pilung nu Egypt ni kol yu Judah

1 Yug nap’an ni m’ug nike fel’ rogon e lung ni be tay Rehoboam, me ir nge girdi’ rok e go’ ra digeyed e Motochiyel rok SOMOL. 2 U lan e re duw ni lal ko gagiyeg ni i tay Rehoboam mi ni gechig nagrad ni fan e da ur yul’yul’gad ngak SOMOL. Shishak ni Pilung nu Egypt e yib i m’ag e mael nga Jerusalem 3 ni yad barba’ i salthaw ni reb e bbiyu’ nge l’agruw mir’ay e chariot riy, nge nel’ i ragag e bbiyu’ e salthaw ni mayan u os, nge ku boch e salthaw ndakiyag i the’eg, nib mu’un e yu raba’ i salthaw nu Libya ngay, ngu Suk, ngu Sudan. 4 Me kol u fithik’ e mael fapi binaw nu Judah ni kan yororiy nib gel ni fan ko mael nge yan nge taw nga Jerusalem.

5 Shemayah ni profet e yan ngak Rehoboam ni Pilung nge pi’in ma gafaliy yu Judah ni go’ ka ra mu’ulung gad nga Jerusalem ni ngar milgad rok Shishak. Me ga’ar ngorad, "Ba’aray e thin rok SOMOL ngomed: ‘Kam pagedgag, ere chiney e ku gu pi’med nga pa’ Shishak.’"

6 Fare pilung nge fapi tagafal e rogned ni kar denengad, me lungurad, "N’en ni be rin’ SOMOL e bmat’aw."

7 Nap’an ni guy SOMOL e ren’ey, me non ngak Shemayah bayay ni ga’ar, "Bochan ni karogned ni yad e kar denengad, ma aram e dab ku gu thirifrad u but’. Machane nap’an nra yib Shishak i m’ag e mael ngorad, mra chugur ni nge math owcharad. Dab kug gechignag yu Jerusalem nib gel nrogon gelngin e damumuw rog, 8 machane bayi kolrad Shishak u fithik’ e mael, ma bay ra nanged e n’en nib thil ko pigpig ni yad ma tay ngog nge pigpig ni yad ma tay ngak e pi tagagiyeg nu fayleng."

9 Shishak ni Pilung e yib nga Jerusalem nge fek e machaf ko fare Tempel nge fare tafen e pilung. I fek ni gubin nib mu’un fapi shield ngay nib gol ni ngongliy Solomon. 10 Me ngongliy Rehoboam boch e shield ko bronze nge tay nga luwan fa tinem me tay chiylen ngak e pi tolang nib milfan e matnag ko pi garog ko fare naun ko pilung ngorad. 11 Gubin yay nra yan fare pilung nga Tempel me fek fapi matnag fapi shield nge un ngorad nge mu’ miyad fulweg ko fare senggil ni tafen e matnag. 12 Damumuw rok SOMOL e de thirif Rehoboam u but’ ni bochan e m’ing ngak SOMOL, me par yu Judah ni kabfel’ rogon.

Buchu’uw u murung’agen e gagiyeg rok Rehoboam

13 Rehoboam e i gagiyeg u Jerusalem me gel gelngin ko pilung ni i tay. Ir e aningeg i ragag nge ta’reb e duw yangren me mang pilung, me gagiyeg ni ragag nge medlip e duw u Jerusalem, fare binaw nike mel’eg SOMOL u daken fare nam nu Israel ni ga’ngin ni ireram e gin nge mang tagil’ e liyor ni ngu’un tay ngak riy. Chitiningin Rehoboam e Naamah, ni be’ ko fare nam nu Ammon. 14 Rehoboam e rin’ ban’en nib kireb, ni bochan e da i guy rogon ni nge nang e tin nib m’agan’ SOMOL ngay.

15 Gubin e tin i ngongliy Rehoboam ko tobolngin nge mada’ ko tungun nge gubin murung’agen e tabnaw rok e yira pir’eg u lan fare babyor ni Chepin Shemayah ni Profet nge babyor ni Chepin Iddo ni Profet. Rehoboam nge Jeroboam e dar tal gow ko mael ngorow. 16 Me yim’ Rehoboam mi ni k’eyag u lan fapi low ko yam’ ni fen e pilung u lan e Binaw rok David me yan Abijah nib mo’on ni fak nga luwan nge mang pilung.