2 KRONICLES 8

Tin ni Ngongliy Solomon

1 Rliw’ e duw ni toy Solomon fare Tempel nge fare naun ko pilung ni tafen. 2 Miki sunmiy bayay fapi binaw ni pi’ Hiram ni Pilung ngak, me yog ngak boch e girdi’ nu Israel ni ngranod ra pired ko pi binaw nem. 3 Solomon e mael nge kol fa gi nug nu Hamath ngu Zobah 4 me yororiy nib gel ni fan ko mael fare binaw nu Palmyra u daken e ted ni desert. Miki ngongliy bayay gubin fapi binaw nu Hamath ni aram tagil e cha’ar. 5 Miki ngongliy Solomon bayay e pi binaw ni ba’aray: Talang u Beth Horan ngu pe’ning u Beth Horan (i gelnag e yoror ko fapi binaw ni fan ko mael ni yima man’nag e garog riy), 6 nge fare binaw nu Baalath, nge gubin e pi binaw ni tafen e cha’ar rok, nge pi binaw nma tay e os nge pi chariot rok riy. I mu’nag gubin e tini tanomnag ni nge toy u Jerusalem, ngu Lebanon, ngu ga’ngin fare gi nug ni i gagiyegnag. 7 Pi’in nra magachgad ko girdi’ nu Hit, Amor, Periz, Hiv nge Jebus ni gathiyad piyu Israel nde thang piyu Israel e pogofan rorad aram ko somm’on, 8 e yib owcharad ni aram e picha’ ni tayrad Solomon ngi i maruwel ngorad, ku aram rogon ke mada ko biney e rran. 9 Machane Solomon e de maruwel ko girdi’ nu Israel ni sib; yad e ra manged e salthaw rok nge pi tolang ko salthaw, nge pi’in ga’ ko chariot, nge girdi’en e yan u os. 10 Ruwmira’ay nge wugem e pi tolang ko salthaw ni yad be gafaliy e maruwel ko fapi’in yad be maruwliy urngin e pin’en ni yibe toy.

11 Me fek Solomon le’engin ni be’ ni bpin ni fak fare pilung nu Egypt, nge chuweg u lan fare Binaw rok David nge tay ngalan ba naun nike toy ni tafen fare bpin. I ga’ar Solomon, "Thingar dabi par e re bpin ney u lan fare naun rok David ni Pilung nu Israel, ni bochan e gubin yang ni immoy fare Kahol ko M’ag riy ma ba thothup nib tabgul."

12 Me pi’ Solomon e maligach ngak SOMOL u daken fare altar nike ubung u mit fare Tempel. 13 I pi’ e pi maligach ni mo’oruf nrogon ni bay ko Motochiyel rok Moses ni fan ko yu rran nib thothup: pi Sabbath, nge pi Madnom ko M’ug e Pul, nge fa dalip i madnom ni gubin e duw — fare Madnom ko Flowa Ndariy e Is Riy, nge Madnom ko T’ar Wom’ngin e Woldug, nge fare Madnom ko Nochi Naun. 14 Me fol ko pi motochiyel nike ngongliy e chitamngin i David, me yarmiy rogon e maruwel rok fapi prist u reb e rran nge reb ma ku er rogon pi yu Levi ni yad ma ayuweg fapi prist ko tang nge pi maruwel rorad. Miki yarmiy girdi’en e matnag u Tempel ni fan ko pi maruwel rorad u langan e pi garog ni yu rran, ni bod rogon nike yog David, ni fare pumo’on ni bay Got rok. 15 Pin’en ni yog David ngak e pi prist nge pi Levite nib l’ag rogon ko pi naun ni yima cha’ar ngay nge ku boch ban’en e go’ nrin’ ni ribod rogon niyog.

16 I taw ko ngiyal’ney ma gubin e pi maruwel rok Solomon ma go’ kan mu’nag. Gubin e pi maruwel me yan i aw ni bfel’ rogon, ni mus ko def ko Tempel rok SOMOL nni ubung nge yan i mada’ ko ngiyal’ nike m’ay i toy fare Tempel.

17 Ma aram me yan Solomon nga Eziongeber nga Elath, l’agruw i gampek nu dap’el’ay ko fare nguy ni Akaba, nu lan e nam nu Edom. 18 Me pi’ Hiram ni Pilung e pi barkow ni nge yan ngak Solomon, nike tay e pi kapten rok ngay ni ngar gafaliyed, nge pi sala nike n’uw naprad ko sala. Miyad tareg ni yad e pi tolang rok Solomon ngranod ko fare nam nu Ofir ngar feked i yib ngak Solomon e gol nib bachugur ni nge gaman e ragag nge nel’ e ton.