2 KRONICLES 16

Wagey ni yib nga Israel

1 U lan e re duw ni gaman e guyey nge nel’ ngay nike gagiyeg Asa ni Pilung nu Judah, me yib Baasha ni Pilung nu Israel i m’ag e mael nga Judah me tabab i yororiy yu Ramah ni fan ko mael ni bochan e nge yag ni nge ning e kanawo’ ni yan nga Judah nge dabkiyag e yan nga langgin nge nga wuru’ yu Judah. 2 Ma aram me fek Asa e silber nge gol u lan tafen e chubgil ko fare Tempel ngu lan fare naun rok e pilung nge pi’ nge yan nga Damaskus ngak Benhadad ni Pilung nu Syria, ni ba’aray e thin ni chagiy ngay: 3 "Nge yib e tha’ u thildow ngad ta’ab raba’ gow, ni bod e chitamngidow. Re silber nge gol ney e ba tow’ath rom. Ere chiney e ngam th’ab e tha’ u thilmew i Baasha ni Pilung nu Israel, ya nge yib tapgin ni nge chuweg e salthaw rok u lan tafnag."

4 Me ta’reban’ Benhadad ko thin nike yib rok Asa me l’oeg e pi tolang ko salthaw nge salthaw rok ngranod ra m’aged e mael ko fapi binaw nu Israel. Ngar koled yu Ijon, Dan, Abel Beth Maakah, nge gubin e binaw nu Naftali ni aram e yungi n’en yima cha’riy e chugum riy. 5 Nap’an ni rung’ag Baasha ni Pilung e n’en ni be buch, me tal i yororiy yu Ramah me pag fare maruwel. 6 Ma aram me kunuy Asa ni Pilung e pumo’on u daken yu Judah me yog ngorad ngranod ra feked e malang nge ren ni i fanay Baasha ko fare maruwel u Ramah, miyad fanay ngar yororiyed fa gali binaw nu Geba ngu Mizpah.

Hanani ni Profet

7 Ngiyal’ nem me yan Hanani ni profet ngak Asa ni Pilung me ga’ar ngak, "Bochan e fare pilung nu Syria e ka mu gif ngak magathi SOMOL ni Got rom, ma aram e ke mil rom fare raba’ i salthaw rok fare pilung nu Israel. 8 Gathi piyu Sudan nge piyu Libya e immoy yu raba’ i salthaw nib ga’ ni bo’or e chariot rorad nge girdi’en e yan u os? Machane bochan e mu gif ngak SOMOL, me tem ngam gel ngorad. 9 I SOMOL e ma fal’eg i yaliy e re fayleng ney ni ga’ngin, ni nge pi’ gelngin e pi’in yad ba yul’yul’ ngak u gumircha’rad. Gab balyang ko tin ka mu rin’, ere bay um par u fithik’ e mael e chiney i yan e ngaram." 10 Ran’ey e ri damumuw Asa riy ngak fare profet me yog ni ngan m’ag e chen ngak. Ma irera’ e ngiyal’ ni tabab Asa i gafgownag boch e girdi’.

Tungun e gagiyeg ni i tay Asa

11 Gubin e pin’en ni i rin’ Asa u tobolngin e gagiyeg ni i fay nge mada’ nga tungun ma go’ kan yoloy ngalan fare babyor ni Chepin e Pilung nu Judah ngu Israel. 12 U lan e re duw ni gaman e guyey nge mereb nike pilung Asa, me mugutgut u bmar’ ni yib nga rifrifen ay; machane yug’ aram rogon made sap ngak SOMOL nge ning e ayuw ngak, me yan ko togta. 13 Me chuw l’agruw e duw me yim’ 14 mi ni k’eyag ngalan fare low ko yam’ ni ir e ker ni fan ngak u lan fare Binaw rok David. Mi ni bangbengnag ko chubgil ni aram e ka ni tay nga fithik’ e gasliw, mi ni k’oreg ba nifiy nib ga’ ngu’un yornag.