1 Me meybil Jonah ngak SOMOL ni Got rok u rom u lan yin fare nig ni ga’ar:

2 "U fithik’ e buchbuchan’ rog, a SOMOL, mu gu piningem

ma ga fulweg lungug.

U ar u lan e fayleng ko yam’

e gu yornag e ayuw, ma ga rung’ag lungug.

3 Mon’eg nggu wan nga’ar,

nga t’ay e regur,

nge tharayeg e day,

ma pi n’ew rom nib gel e lobeb u dakenag.

4 Ma aram mug ga’ar, "Kan tharbageg u p’eowchem;

gur ku ra gguy bayay e Tempel rom nib thothup?

5 I yib e day nge tharayeg nggu l’ad ngay;

nggu ligil nga’ar,

me ing e lem nu maday chugeg.

6 Gu wan nga’ar nggu mada’ nga enggin fapi burey;

ngalan fa re binaw ni yug ma par e garog riy nib man’ ndariy n’umngin nap’an;

machane gur SOMOL ni Got rog e kam fulwegneg u ar nda gum’!

7 Nap’an ni gu thamiy rog ni nggum’,

ma aram mu gu meybil ngom SOMOL,

ma ga rung’ag lamag ngalan e Tempel rom nib thothup.

8 Pi’in yad be toer ngak fapi liyos ndabiyag ni ngar ayuwegned be’

e kar paged gur ni dakurir yul’yul’gad ngom.

9 Machane bay gu tang nigem ni gu be pining e sorok ngom;

ma bay gu li’ ba gamanman nggu pi’ ngom ni maligach,

tin ni kug weliy ngom e bay gu rin’.

I SOMOL e ma yib e ayuw rok!"

10 Me non SOMOL ngak fare nig, me yib fare nig i thuwag Jonah nga dap’el’ay.