1 Gelngin e damumuw rok Somol me upnguy yu Zion ko lumor.

Feni gamog ni yib u tharmiy e ke pig ke kireb.

Rofen ni damumuw e mus ko Tempel rok me n’ag.

2 I Somol e gathay gubin e yochi binaw u Judah ni de runguyrad

Me buthug nga but’ e yungin kan yororiy nib gel ni fan ko mael u lan fare binaw.

Me m’aynag fan nge thiyernag e binem e lung nge pi tagagiyeg riy.

3 U fithik’ e damumuw rok me waernag gelngin yu Israel;

I siyeg ni nge aywegmad u nap’an ni yib e to’ogor.

I aw ngomad ni bod rogon e nifiy nma kirebnag gubin ban’en.

4 I pulweg gan e gating rok ngomad ni bod ba to’ogor;

Me li’ gubin e pi’in ni gamad ma uf uf ngorad ma gamad ma felan’ ngorad.

Gu thamiyed gawealngin nifiyan e damumuw rok u roy u Jerusalem.

5 I Somol e bod ba to’ogor, ni kirebnag yu Israel;

Ni digey e yungin kan yororiy ni fan ko mael nge tafen e pilung nge mogothgoth.

Ma gafgowan’ ni fek nga daken e girdi’ nu Judah e de tal.

6 Tempel ni gin ug meybilgad ngak riy e pirdi’iy nge yochyang u but’;

Me taleg e pi rran ni thothup nge Sabbath.

Pilung nge prist e ta’reb rogon nra thamiyew gelngin e damumuw rok.

7 I Somol e n’ag e altar nge Tempel rok nib thothup;

Me pag e to’ogor nge buthug e rungrung riy.

Miyad tolulnag e gel ni kar ted ko gin’en ni ud meybilgad riy u fithik’ e felfelan’.

8 I SOMOL e turguy ni fare yoror nu Zion e thangri aw nga but’;

I pag e fol nga daken ni nga ri mich ni nge mogothgoth nib polo’.

Pi wulyang nge rungrung riy e chiney e go’ bay u but’ nike mogothgoth.

9 Pi garog riy e ke mathrow nga chabungen e tin ke puth, ma pi dubchey ko garog e ke m’ingm’ing ke yochyang.

Fare pilung nge pi tolang rok e kan fekrad ni kalbus ngabang.

Fare Motochiyel e daknir machibnag, nge pi profet ni dakir pilyeg SOMOL e changar rorad.

10 Pi pumo’on ni pilibthir nu Jerusalem e kar pired nga but’ nike math gulungrad,

Ni go’ fiyath daken lolugrad ma mad u dakenrad e tutuw.

Ma pi’in rugod e kar’aned lolugrad nga daken e but’.

11 Ke thow owcheg ko meyor; ni kari kireb lanin’ug.

Kethay parwog ko meyor ni bochan e gafgow ko girdi’ rog.

Bitir nge madway e yad be paraw nike ma’ gelingrad u lan e yupa’ i kanawo’ u lan fare binaw.

12 Ma yad be yor nag e mak’iy nge blel ko pi chitiningirad;

Yad be thig nike m’ay gelingrad u lan e yupa’ i kanawo’ ni gowa kar maad’adgad,

Ma yad be yim’ nib sasag’al u pa’ e pi chitiningirad.

13 Ah Jerusalem, gur nri gab t’uf, mang e ku rayag ni nggog?

Urogon ni nggu faleg’ lanin’um? Dariy be’ ni ka’ayib ba gafgow ngak ni bod e biney.

Ya gafgow rom e ba to’ar ni bod lan e regur; ke math e liyab ngom.

14 Pi profet rom e go’ thin ni malfith e yad be yog ngom;

Yad be ban nigem ko machib ni yad be tay ni dariy e ngiyal’ ni ngam guy e kireb rom.

Yad be gagiyeg nigem ngam leamnag nde t’uf ni ngam pi’ ker’um ko denen rom.

15 Girdi’ ni yad be yan u to’bem e yad be changar ngom nga but’;

Ni yad be chichingeg lolugrad miyad be minmin ko mogothgoth ni keta’ yu Jerusalem:

"Irera’ fare binaw ni bfel’usun, ma uf uf rok e fayleng?"

16 Urngin e to’ogor ma yad be moning nagem yad be changar ngom u fithik’ e fananikan.

Ni yad be thilpiriy l’ugunrad ma yad be kirebnag owcharad ma yad be ga’ar, "Kad thirifed u but’!

Irera’ fare rran ni ku’ud son niged!"

17 I SOMOL e ke rin’ n’en ni yog nra rin’:

Ke gechig nagdad ndaki wurngan’, ni bod ni yog ngodad kakrom.

Ke pag e pi to’ogor ke gel ngodad, ni kar uf uf gad ko waer ni kadted.

18 Jerusalem, mu pag e pi rungrung rom ngar yorgad ngalang ngak SOMOL!

Mu pag lu’am nge map ni bod e lul’ ni be yan e ran riy ni nnep’ nge rran.

Nge aw parwom ko meyor nge gafgow ni ga be tay.

19 Numngin e nep’ ni ngu’um od bayay nge bayay ngu’um yor ngalang ngak Somol;

Ni ga be pu’og lanin’um nga but’ ma ga be wenig ngak ni nge wurngan’ nga daken pifakam —

Pi bitir ni be li’ e mak’iy u gubin e pi tam’ing ko kanawo’!

20 SOMOL mu changar! Mangfan ni ga be gechig nagmad ni arayrogon?

Pi’in ni ppin e yad be longuy pi fakrad nrib t’uf rorad!

Prist nge profet e yi be thang e pogogan rorad u lan e Tempel!

21 Fel’ yangren nge pilbithir e go’ yad ba aw’ u lan e kanawo’ ni karmad’.

Pumo’on nge ppin ni bfel’ yangeren, e karm’ad ko saydon rok e pi to’ogor.

Mu thang e pogofan rorad nide wurngan’um ni gelngin e damumuw rom e rofen nem.

22 Mu pining e to’ogor rog nga ba madnom ko k’ar marus u to’obeg i yan,

Ma dariy be’ nrayag ni nge thay nge mil u fithik’ e damumuw rom e rofen nem.

Kar thanged e pogofan rok pifakag, ni ug chugliyrad ni yad ba t’uf rog.