LAMENTATIONS 5

Ba Meybil nifen e wurngan’

1 SOMOL, nge yib woran ngan’um e n’en nike buch romad.

Mu changar ngomad ngam guy feni kem’ay famad kug thiyar gad.

2 Binaw romad e bay u pa’ e milekag;

girdi’ nu bang e be par ko pi tabnaw romad.

3 Pi chitamangimad e ke thang e to’ogor e fan rorad,

ke par e pi chitiningimad ni dakriy figirngirad.

4 Thingar gu pi’ed puluwon e ran ni nggu unumed;

ma thingar gu chuwi’iyed e l’ud ni nggu lum gad ngay.

5 Yibe maruwel ngomad nib gel ni bod e dongki ara kamel,

nike aw parowmad, ma danir pi’ e toffan ngomad.

6 U gu ninged e ggan nga Egypt ngu Assyria,

ni fan e nge dab gu m’ad.

7 Pi chitamangimad kakrom e ra denen gad, ma yad e kar thumur gad,

ma gamad e kug gafgow gad ni fan ko denen rorad.

8 Pi sib e yad e chiney e yad be gagiyeg niged gamad,

ma dariy be’ nra pithigmad u tan gelingrad.

9 Pi tathang pogofan e yad be deraw u wuru’ e binaw;

ngiyal’ ni gamad be gay ganmad e kug dow gad ko pogofan romad.

10 Mak’iy e ke k’aring e gowel nga dakenmad

ke par downgimad nike bod feni gowel ba stof.

11 Pi le’engimad e kan kolrad u gelngiy u daken e burey ni Zion

ngu lan e yochi binaw nu Judah e yibe kol pifakmad ni ppin riy.

12 Pi tayugang’ romad e kan fekrad kan uchliyrad;

ma danir tayfan e pi pumo’on romad.

13 Pagel ni fel’ yangren romad e yibe ma’angach ngorad ni ngu’ur bilged e grain ni bod e pi sib;

yochi sarpagel e yad be dol’dol’ u tan e lud’ ni yad be fek nib tomal.

14 Pi’in ke pumo’on e dakriy e ngiyal ni yad ma par nga but’ u langan e garog ko binaw,

ma pagel ni felyangren e dakiryag e musik rorad.

15 Felfelan’ e ke chuw u lan e yafos romad;

buchbuchan’ e ke fek lon e pi churu’ romad.

16 Dakriy ban’en ni magach ko gubin e tin u gu uf’uf gad ngay.

Ku’ug denen gad, ere chiney e karug gafgowgad.

17 Kug m’ar gad nga lanin’mad

nike mom’aw ni ngguyed ban’en u fithik’ i lu’mad,

18 ni bochan e burey ni Zion e kann’ag ke par ni go’ ir,

pilis ni malboch e be gurul u fithik’ e tin ke mogothgoth.

19 Machane, gur SOMOL e pilung ni dariy n’umngin nap’an

ma bay um gagiyeg nge taw ko tungun.

20 Mangfan ni ar fini n’uw nap’an ni kam fek owchem romad?

Mog kagmad ra yib ngan’um bingyal’?

21 SOMOL! Mu fulwegmad ngom, mfulwegmad!

Mu sulweg nga gil’ e fla’ab romad ni kakrom.

22 Fa ka mu n’agmad ni dariy n’umngin nap’an?

Mog dariy folan e damumuw rom?