JUDGES 13

Samson nni gargeleg

1 Miki denen piyu Israel bayay nib togopluw ngak SOMOL, me pag piyu Filistia nge mang yad e ur gagiyeg niged piyu Israel ni aningeg i ragag e duw.

2 Ma bay be’ nib mo’on ni Manoah fithingan, ni be’ ko fare binaw nu Zorah, ni ir reb i girdi’en fare ganong rok Dan. Ma ka aram n’umngin nap’an ma dawori diyen le’engin. 3 Me yib i m’ug e engel rok SOMOL ngak e re pin nem me ga’ar ngak, "Ka aram n’umngin nap’an i yib ke mada’ ko chiney ma dawori yag ni mu diyen, machane chiney e bay mu diyen ngam gargeleg bochi pagel. 4 Ma ngar mu guy rogon nge dab kum unum e wayin ara rrum, ara mu koy reb e ggan nike yog e motochiyel ndab ni kay, 5 ya bay mu diyen ngam gargeleg bochi pagel. Ma dab mu th’ab piyan lolugen, ya rofen ni yira gargeleg e nga ni pi’ nga pa’ Got ni bod rogon ba Nazirite.*13:5 NAZIRITE: Be’ nike sayin ku Got ndabi unum e wayin ara rrum fa th’ab piyan lolugen fa math ko yam’ (ku arrogon ni bay ko Num 6:1–8). Ya bayi tabab i muruwliy ni nge chuweg piyu Israel u tan pa’ e piyu Filistia." 6 Me yan fare pin nge weliy ngak figirngin ni ga’ar, "Reb e girdi’ rok Got e keb i non ngog, ma ba tamdag ya’an ni bod rogon e engel rok Got. Da gu fith ngak e gin ke yib riy, ma de yog ngog fithingan. 7 Machane keyog ngog ni bay gu diyen ngug gargeleg bochi pagel. Ma keyog ngog dab kug unum e wayin ara rrum, ara gu way e ggan nike yog e motochiyel ndab ni kay, ya chi pagel nem e nge milfan ngak Got ni ir reb e Nazirite u n’umngin nap’an e yafos rok."

8 Me meybil Manoah ngak SOMOL ni ga’ar, "SOMOL, wenig ngom, mu gagiyegnag fare mo’on ni reb e girdi’ rok Got ni kamol’og nge yib ngomow, nge weliy ngomow e n’en nthingar gu rin’ew ngak fachi pagel ko ngiyal’ ni bay ni gargeleg riy." 9 Me rin’ Got e tin ke wenignag Manoah, me sul fare engel nge yib i m’ug ngak fare pin nike par fare pin nga but’ u milay’. Ma de moy Manoah ni figirngin rok. 10 Me mil nge yan i yog ngak figirngin ni ga’ar, "Fare mo’on ni fa’ani yib i m’ug ngog fa binem e rran e ke yib i m’ug ngog bayay." 11 Me sak’iy Manoah nge lek le’engin ngranow. Me yan ngak fare mo’on me fith ngak ni ga’ar, "Mog, i gur fare mo’on ni fa’an um welthin ngak e bpin rog?"

Me ga’ar, "I gag."

12 Ma aram me ga’ar Manoah, "Nap’an nra yib i m’ug nib riyul’ e tin kamog, ma mang e n’en thangri rin’ fachi pagel? Ma uw rogon pangin thangri par ko yafos rok?" 13 Me fulweg fare engel rok SOMOL ngak Manoah ni ga’ar, "Le’engim e thangri guy rogon ngi i rin’ urngin e pin’en ni kug weliy ngak. 14 Thangri dabi kay ban’en ni yib ko grapes; ma thangri dabi unum e wayin ara rrum, ara kay e ggan nike yog e motochiyel ndab ni kay. Thangri rin’ urngin e tin kug weliy ngak."

15,16 Ma dawori nang Manoah ni ir fare engel rok SOMOL, me ga’ar ngak, "Wenig ngom, dab ka’a mman. Ya nggu lithew ba pifak e kaming ni fan ngom."

Machane me ga’ar fare engel ngak, "Fa’anra gu par, ma dab gu way e ggan romew. Machane fa’anra gimew ba’adag ni ngam ngongliyew rogon, me ere mu urfiyew nib maligach ngak SOMOL." 17 Me ga’ar Manoah ngak fare engel, "Mog fithingam ngomow, nge yag ni gon’ew e sorok ngom ko ngiyal’ nike yib i m’ug nib riyul e tin kamog." 18 Me fith fare engel ngak ni ga’ar, "Mangfan ni ga ba’adag ni ngam nang fithingag? Fithingag e nge par nib mith." 19 Me fek Manoah fare pifak e kaming, nge boch e grain nge pi’ ni maligach u daken fare altar ni war, ni aram e ke pi’ ngak SOMOL, nma ngongliy e maang’ang." 20 Nap’an ni be gubulbul e daramram u daken fare altar, me guy Manoah nge le’engin fare engel rok SOMOL nike yan u fithik’ fare daramram ngalan e lang. Miyow paraw nga but’. 21 Ma daki guy Manoah nge le’engin fare engel bayay. Me nang Manoah ni fare mo’on e engel rok SOMOL.

22 Me ga’ar Manoah ngak le’engin, "Ke mich ni ngadmow, ya kad guyew Got!" 23 Me ga’ar le’engin ngak, "Fa’an mang e finey SOMOL ni nge li’dow ngadm’ow, ma dabi fel’ u wan’ e tin kadpi’ew ni maligach; ma dabi dag ngodow urngin e pin’ey, ara weliy ngodow e tin ke weliy e ngiyal’ney."

24 Me gargeleg fare pin bochi pagel me tunguy Samson ngak. Mi i ilal fare tir, me par SOMOL ni be ayuweg. 25 Me tabab fare gelngin SOMOL i gagiyegnag u nap’an ni bay ko gin be par piyu Dan riy e ngiyal’nem u thilin yu Zorah nge yu Eshtaol.