JUDGES 18

Mikah nge Ganong rok Dan

1 Ngiyal’ nem e dariy e pilung nu Israel. Ma ireram e ngiyal’ ni be sapnag e ganong rok Dan bang ni ngar tafned ngar pired riy ni bochan e dawor ni pi’ bang e binaw ngorad u fithik’ fapi ganong nu Israel. 2 Ere me mel’eg e girdi’ rok Dan lal e pumo’on nib pagan’uy ngorad u lan gubin fapi tabnaw ko fare ganong ngan l’ograd ngranod u Zorah ngu Eshtaol ni kanog ngorad ni ngar lekeged ma yad be damiteg. Nap’an nra tawgad nga Efraim ni go’ burey, miyad par u tafen Mikah. 3 Nap’an ni yad bay u rom, miyad poy rogon ni be non fare pagel ni be’ u Levi, mranod ngak ngar fithed ni lungurad, "Mang e ga be rin’ u roy? Mini’ e ke fekem i yib ngaray?"

4 Me fulweg ni ga’ar, "Kug weliyew Mikah ni nggu mang prist rok ma be pi’ puluwog."

5 Me lungurad ngak, "Wenig ngom, mu fith ngak Got ko bfel’ rogon e milekag romad fa danga’."

6 Me fulweg fare prist ni ga’ar, "Dariy ban’en ni nge magafan’med ngay. Be ayuwegmed SOMOL ko re milekag romed ney."

7 Ma aram me chuw fa lal i pumo’on u rom ngranod ko fa chi binaw nu Laish. Miyad guy rogon ni be par e girdi’ ko re binaw nem ndariy ban’en ni be buch rorad ni bod piyu Sidon. Bogi girdi’ ni yad ba gapas, ma yad mmoding, ma dariy e malu’ag thin rorad be’; ma gubin e tin nib t’uf rorad ma go’ bay. Yad ma par nib palog rok piyu Sidon ma ku dariy ba tha’ u thilrad yug boch e girdi’. 8 Nap’an ni sul fa lal i pumo’on nga Zorah nge nga Eshtaol, me fithrad e girdi’ u taferad ko mang e kar piri’egged. 9 Me lungurad, "Mired, ngdarod da maelgad ngak yu Laish. Kug guyed e re nam nem, ma rib manigil. Dab ku mu pired u roy ndariy ban’en ni gimed be rin’; mpapeygad! Mmarod nga langgin ngam koled! 10 Nap’an ni gimed ra taw ngaram, ma gimed ra pir’eg ni dar tunan’rad ni nge buch ban’en. Ba nam nib ga’; ma urngin e tin ba’adag be’ ma bay riy, ma ke pi’ Got ngomed."

11 Ere 600 e pumo’on ko ganong rok Dan e rchuwgad u Zorah ngu Eshtaol, ni kar fal’eged rogorad ni fan ko mael. 12 Mranod nga talang ngar pired e ngiyal’nem ko ngal u Kiriath Jearim u lan yu Judah. Aram fan ni ku yima yog e rengi n’em e chiney ni gin ni Par Dan Riy. 13 Mranod u rom ngar tawgad nga tafen Mikah ni bay u daken e ted u Efraim ni go’ burey.

14 Ma aram e fa lal i pumo’on nranod ra damit niged fare gi binaw nib liyeg yu Laish e lungurad ngak e pi’in yad, "Gimed manang, nu roy u lan reb e pi naun ney e bay ba liyos riy ni yima meybil ngay ni kan ing ko silber? Ma kubay yug boch e liyos ni yima meybil ngay nge ba efod. Ere mang e gimed be leamnag ni ngad rin’ed?" 15 Ere ranod ngalan e naun rok Mikah, ko gin ma par fare pagel nu Levi riy, miyad fith ko ke urogon boch e par rok u rom. 16 Ngiyal’nem ma fa 600 i salthaw nu Dan ni kar fal’eged rogorad ni fan ko mael e yad ba sak’iy u langan e garog. 17 Miy gi yan fa lal i tadamit nga naun ndariy bochi sataltal ngar feked fare liyos ni yima meybil ngay nni ngongliy ko gek’iy min ing ko silber, nge ku boch e liyos ni ku yima meybil ngay, nge fare efod, e ngiyal’nem ni bay fare prist rok fa 600 i pumo’on ni bay e talin e cham rorad u langan e garog.

18 Nap’an ni yan fapi pumo’on ngalan e naun rok Mikah ngar feked fa pin’em nib tabgul, me fithrad fare prist ni ga’ar, "Mang e gimed be rin’?"

19 Me lungurad ngak, "Mu th’ab gulngam. Dabmog bbugithin. Mu’un ngomad ngam mang prist nge tafonow romad. Gathi bfel’ ni ga ra mang prist u ba ganong nu Israel ni ga’ngin ko bin ni ngam mang prist ko tabnaw rok ta’abe’? 20 Mri felfelan’ fare prist, me fek fa pin’em nib tabgul nge un ngorad ngranod.

21 Miyad cheal ngranod, ni pifakrad, nge yuran’ i gamanman rorad, nge chugum rorad e bay nga m’on rorad ni yad be yan. 22 Kranod nike palog ko fare naun, me pining Mikah e pi’in yad bbuguliyoror ni ngranod ko mael. Mranod ra tawgad ko gin ke taw piyu Dan ngay 23 mar tolulgad ngorad. Me cheal piyu Dan u luwrad ngar fithed Mikah ni lungurad, "Mang e ke buch? Mangfan e ulung ney e girdi’?"

24 Me fulweg Mikah ni ga’ar, "Mang e ga be yog ni be lungum e, ‘Mang e ke buch rog?’ Kam feked e prist rog nge pi got ni kug ngongliy, kammarod! Mang e kabay rog?"

25 Me ga’ar piyu Dan ngak, "Kabfel’ ndab kumog ban’en fa ga ba’dag ni nge damumuw e pi pumo’on ney ngar chamgad ngom. Ya ga ra yim’ nge chon e tabnaw rom ni gubin." 26 Ma aram me yan piyu Dan. Ma ke guy Mikah ni dabyag gelngirad rok, ma aram me cheal nge sul nga tafen.

27 Miyad fek e tin ke ngongliy Mikah, nge prist rok ngranod nga Laish, nib binaw nib aw e mocha’ riy ma dar tunan’rad ni bay ni taw ngorad. Ra li’edrad ko saydon miyad urfiy e re binaw nem. 28 Dariy be’ ni yag ni aywegrad ni bochane yad ma par nib palog u Sidon ma dariy e tha’ rorad ngak yug be’. Re binaw nem e bay u bochi loway nib milsuwon nga Bethrehob. 29 Mar thilyeged fithingan yu Laish ngar tunguyed yu Dan ngay, ni aram fithingan e ga’ rorad, ni be’ ni pumo’on ni fak Jakob. 30 Me tay piyu Dan fare liyos ngalang ni ngu’un tayfan, me Jonathan ni be’ ni pumo’on ni fak Gershom ma Moses e tutuw rok, e i pigpig ni prist rok e piyu Dan, ma pi’in owchen e u ra pigpiggad ni prist nge taw ko ngiyal’ nni fek e girdi’ u rom ngar kalbusgad u reb e nam. 31 Fare liyos rok Mikah e par u rom u n’umngin nap’an niki par fare Tent rok Got ni yima tayfan riy u Shiloh.