Mateus 21

Felfelan’ ni tay e girdi’ ngak Jesus ko ngiyal’ ni yan riy ngalan yu Jerusalem

1 Ma nap’an nra chugurgad nga Jerusalem, marbad nga Bethfage, ni bay ko burey nu Olive. Me l’oeg Jesus l’agruw i gachalpen ngar m’onow 2 nike ga’ar ngorow, "Marow ngalan e re binaw ni ba’aram ngam’on romew, ya yugu bay mmarow mi gimew pir’eg ba dongki ni kan m’ag gafan ni bay fak rok. Mi gimew pithig gafrow ngam fekew i yib ngog. 3 Ma fa’anra yog be’ ban’en, mi gimew yog ngak ni lungumew, ‘Bay e tin ni nge rin’ Masta*21:3 Masta; ara En nib mil suwonrow ngak. ngorow;’ ma aram me pagrow ngar unew ngomew."

4 I yodoroy ni fan e nge yib i m’ug nib riyul’ e tin ni yog e profet ni ga’ar:

5 "Mogned ko binaw nu Zion ni nge lungumed:

Chiney e be yib e pilung rom,

ir be’ nib munguy nike af nga daken ba dongki,

ke af nga daken ba fak e dongki."

6 Ma aram me yan i m’on fa gali cha’ ni gachalpen ngranow rrin’ew e tin keyog Jesus ngorow, 7 miyow fek fare dongki nge fare fak e dongki i yib, miyow yin’ wuru’ e mad rorow nga daken fa gal dongki, me af Jesus nga daken reb. 8 Me filath e girdi’ ni pire’ ni pire’ wuru’ e mad rorad nga daken e kanawo’, ma boch i yad e ra th’abed pa’ngin e gek’iy ngar filthed nga daken e kanawo’. 9 Ma fapi girdi’ ni pire’ ni pire’ ni yad bay ngam’on rok Jesus nge fapi girdi’ ni pire’ ni pire’ ni yad be lay u keru’ Jesus e ra tababgad ko tolul ni be lungurad, "Ke sorok Fak David! I Got e nge ayuweg e en ni ir e ke yib ni owchen Somol! Ke sorok Got!"

10 Fa’ani yan Jesus ngalan yu Jerusalem ma ga’ngin yang u lan fare binaw ni yibe tolul riy. Me fith e girdi’ ni be lungurad, "I mini’ e cha’nem?"

11 Me fulweg fapi girdi’ ni pire’ ni pire’ ni be lungurad, "Ireray fare profet i Jesus ni yib u Nazareth nib binaw ni bay u lan yu Galile."