1 Ma nap’an nra chugurgad nga Jerusalem, marbad nga Bethfage, ni bay ko burey nu Olive. Me l’oeg Jesus l’agruw i gachalpen ngar m’onow 2 nike ga’ar ngorow, "Marow ngalan e re binaw ni ba’aram ngam’on romew, ya yugu bay mmarow mi gimew pir’eg ba dongki ni kan m’ag gafan ni bay fak rok. Mi gimew pithig gafrow ngam fekew i yib ngog. 3 Ma fa’anra yog be’ ban’en, mi gimew yog ngak ni lungumew, ‘Bay e tin ni nge rin’ Masta* ngorow;’ ma aram me pagrow ngar unew ngomew."

4 I yodoroy ni fan e nge yib i m’ug nib riyul’ e tin ni yog e profet ni ga’ar:

5 "Mogned ko binaw nu Zion ni nge lungumed:

Chiney e be yib e pilung rom,

ir be’ nib munguy nike af nga daken ba dongki,

ke af nga daken ba fak e dongki."

6 Ma aram me yan i m’on fa gali cha’ ni gachalpen ngranow rrin’ew e tin keyog Jesus ngorow, 7 miyow fek fare dongki nge fare fak e dongki i yib, miyow yin’ wuru’ e mad rorow nga daken fa gal dongki, me af Jesus nga daken reb. 8 Me filath e girdi’ ni pire’ ni pire’ wuru’ e mad rorad nga daken e kanawo’, ma boch i yad e ra th’abed pa’ngin e gek’iy ngar filthed nga daken e kanawo’. 9 Ma fapi girdi’ ni pire’ ni pire’ ni yad bay ngam’on rok Jesus nge fapi girdi’ ni pire’ ni pire’ ni yad be lay u keru’ Jesus e ra tababgad ko tolul ni be lungurad, "Ke sorok Fak David! I Got e nge ayuweg e en ni ir e ke yib ni owchen Somol! Ke sorok Got!"

10 Fa’ani yan Jesus ngalan yu Jerusalem ma ga’ngin yang u lan fare binaw ni yibe tolul riy. Me fith e girdi’ ni be lungurad, "I mini’ e cha’nem?"

11 Me fulweg fapi girdi’ ni pire’ ni pire’ ni be lungurad, "Ireray fare profet i Jesus ni yib u Nazareth nib binaw ni bay u lan yu Galile."

12 Me yan Jesus ngalan e Tempel me tuluf urngin e pi’in yad be chuway’ ban’en nge pi’in yad be folchuway’ nga ban’en u lan e Tempel; me thikiy e tebel ko girdi’ ni be thiliyeg e salpiy, nge chiya rok e pi’in yad be chuway’ ko bulogol, 13 me ga’ar ngorad, "Bay ni kan yoloy u lan e babyor nib thothup nike ga’ar Got, Naun rog e bay nog nib naun ntafen e meybil. Machane gimed be tay ni bangi n’en nma mith e moro’ro’ riy!"

14 Me yib e pi’in yad bmalmit nge pi’in yad bmarwoth ngak ngalan e Tempel me gol nagrad. 15 Ma fa’ani guy e pi tolang ko prist nge pi tamchib ko Motochiyel e pin’em nrib fel’ ni be rin’ Jesus nge bitir ni yad be tolul ma yad be yog ni ba ga’ lamrad u lan e Tempel ni be lungurad, "Ke sorok Fak David!" miyad damumuw. 16 Ma aram me lungurad ngak Jesus, "Ga be rung’ag e n’en ni yad be yog fa danga’?"

Me fulweg Jesus ni ga’ar, "Gu be rung’ag. Dawor mpoyed fa gin’em u lan e babyor nib thothup? Ya be ga’ar, ‘Kam fil ngak e bitir nge bitir ni kabran ni ngar pininged e sorok ni bfel’ rogon.’ "

17 Me pagrad Jesus nge yan nga wuru’ fare binaw me yan nga Bethany, ni aram e gin ni par riy nneap’.

18 Fa’ani reb e rran riy ni kakadbul ni be sul Jesus i yan ngalan fare binaw, ma ke yib e bilig ngak. 19 Me guy ba ke gek’iy ni fig ni bay u to’oben e kanawo’ me yan ngay, ma dariy wom’ngin ya go’ yuwan e bay. Ma aram me ga’ar ko fare ke gek’iy, "Gathi bay ki yib wom’ngim bayay!" Ma ka chingiyal’ nem me mororoy fare ke gek’iy.

20 Ma fa’ani guy pi gachalpen e ren’em me ri yad gin ngay. Miyad fith ni lungurad, "Ke di’in ma ke mororoy e re ke gek’iy nem ni aram feni machreg?"

21 Me fulweg Jesus ni ga’ar, "Dab mpaged talin e re bugithin ni ba’aray! Fa’anra pagan’med nga gelngin Got nder maruwaran’med riy ma aram e rayag ni ngam rin’ed e n’en ni kug rin’ ko re ke gek’iy ney; gathi kemus ni biney, ku rayag ni nge lungumed ko re burey ney, ‘Mpuw ngalang ngam man mu aw nga maday,’ me rin’ ni aram rogon. 22 Fa’anra bmich Got u wun’med ma demturug e n’en ni gimed ra ning ngak ko meybil romed mrayag ngomed."

23 Me sul Jesus nga Tempel; ma nap’an ni be machib, me yib e pi tolang ko prist nge pi’in yad pi’ilal u fithik’ yu Israel ngak miyad fith ni lungurad, "Bu uw mat’wum ni ga be rin’ e pin’ey? Mini’ e ke pi’ mat’wum?"

24 Me fulweg Jesus ngorad ni ga’ar, "Nggu fith ta’a ban’en ngomed, ma fa’an gimed ra pi’ e fulweg riy ngog, mu gog ngomed ko uw e yib mat’wug riy ni nggu rin’ e pin’ey. 25 U uw e yib mat’wun John riy ni ngi i tawfe, i yib rok Got fe yib rok e girdi’?"

Me tabab fa pi’inem i lulu’ag e thin u fithik’rad ni be lungurad, "Mang e ngdogned? Ya fa’an gadad ra fulweg ngak ni Got e pi’ mat’wun John, mra ga’ar ngodad, Ere mangfan nde mich u wun’med e tin ni i yog John? 26 Ma fa’anra lungudad ngak e yib rok e girdi’, ma dad nanged e n’en nra rin’ e girdi’ ngodad, ya kari riyul’ u wan’ urngin e girdi’ ni John e immoy ni ir reb e profet." 27 Ma aram miyad fulweg ngak Jesus ni lungurad ngak, "Da gu nanged."

Me fulweg Jesus ngorad ni ga’ar, "Ere ku er rogog ndab gog ngomed ko uw e yib mat’wug riy ni ngu’ug rin’ e pin’ey."

28 "Uw rogon ni gimed be finey e ren’en ni ba’aray ni nggog? Immoy be’ nib mo’on ni bay l’agruw i pagel ni fak. Me yan ngak e bin ba ilal rorow me ga’ar ngak, Fakag, mman ngam maruwel u milay’ ko grape e daba’. 29 Me fulweg ni ga’ar, ‘Dabug ni nggu wan,’ machane fa’ani ta’aboch me piliyeg laniyan’ me yan ko fa gi milay’ ko grape. 30 Me yan fare matam ngak bagayow ma ku aram e n’en ni yog ngak. Me fulweg ngak ni ga’ar, ‘Kefel’;’ machane de yan. 31 Ere mini’ rok fa gal i nem e rin’ e tin ni ba’adag e chitamngin?"

Miyad fulweg ngak ni lungurad, "Fa bin ba ilal."

Me ga’ar Jesus ngorad, "Ba’aray ban’en ni nggog ngomed ni nge lungug, pi’in ntamukun tax nge pi’in ni ppin ni yad ma chuway’ ngorad e yad be un ko gagiyeg rok Got ni kar m’onod romed. 32 Ya John ni i tawfe e yib ngomed ngi i dag ngomed e kanawo’ nib mat’aw ni ngam marod riy, machane de mich u wun’med e thin rok; machane pi’in ntamukun tax nge pi’in ni ppin ni yad ma chuway’ ngorad e mich u wun’rad e thin rok, ni mus ko ngiyal’ ni ba’aram ni mu guyed yad nike mich u wun’rad ma ku da mpiliyeged lanin’med nga tomuren nge mich u wun’med e thin rok."

33 Me ga’ar Jesus, "Kum telmed nga reb e fanathin. Immoy be’ ni bay e binaw ntafen ni yung bangi grape ngay, me yororiy, nge mu’ me ker ba low ni luwan ban’en ni nge uduy wom’ngin e grape riy, me tay tafen e damit riy nib tolang. Me pi’ fa gi woldug ngak e pi’in kar ninged ngak ni ngu’ur ayuweged ma yad be fek boch i wom’ngin, ma yad be pi’ boch ngak e en ni ir e milay’ rok ni puluwon. Ma aram me yan ko milekag. 34 Ma fa’ani taw nga nap’an ni ngan t’ar wom’ngin fa gi woldug me l’oeg e pi sib rok ngak fa pi’in kar ninged fa gi woldug ni ngar feked e birok’ e f’oth. 35 Me kol fa pi’in kar ninged fa gi woldug fapi sib rok facha’, ngar pirdi’iyed bagayad, miyad li’ bagayad ngem’, miyad malangnag bagayad. 36 Miki l’oeg fare mo’on yugu boch e sib, ni kar yo’orgad ko fa tin som’on, ma ku eram e n’en ni rin’ fa pi’inem ngorad. 37 Ma tomur e l’oeg fak nge yan ngorad, ni be ga’ar u wan’, Rib muduwgil ni yad ra tayfan fakag. 38 Ma fa’ani guy fa pi’in kar ninged fa gi woldug fare pagel ni fak fa’anem me lungurad rorad, ‘Ireray fak fa’anem ni ir e suwon e gi woldug ney. Marod ngad li’ed ngem’, ma gadad tafnay tafen!’ 39 Miyad kol, nga ron’ed nga wuru’ fa gi woldug, miyad li’ ngem’.

40 Me fithrad Jesus ni ga’ar, "Ere fa’anra yib e en nib mil suwon fa gi woldug ngak, ma mang e ra rin’ ngak fa pi’in kar ninged fa gi woldug?"

41 Miyad fulweg ngak ni lungurad, "Rib muduwgil nra li’ e pi girdi’ nem ni yad ba kireb, me pi’ fa gi woldug ngak yugu boch e girdi’, ni yad e yad ra pi’ e birok’ e f’oth u wom’ngin e woldug ko ngiyal’ ni ngan pi’ riy."

42 Me ga’ar Jesus ngorad, "Dawor mpoyed e n’en nike yog e babyor nib thothup? Ya ke ga’ar,

‘Fare malang ni dabun e pi’in yad ma toy e naun ya ra fineyed ndariyfan

e yan i aw ni aram e re malang ni ir e ba th’abi ga’ fan.

Ren’ey e Somol e yodoromnag,

rib manigil e n’en ke rin’ Somol!’

43 Me ul ul Jesus ngay nge ga’ar, "Ere nggog ngomed ni gagiyeg rok Got e bay ni chuweg romed ngan pi’ ngak girdi’en reb e nam ni yad e bay yib wom’engirad ni bfel’." 44 *

45 Ma fa’ani rung’ag fapi tolang ko prist nge pi Farise fapi fanathin nike weliy Jesus miyad nang ni yad e be weliy murung’agrad, 46 ma aram miyad guy rogon ni ngar koled ngar feked; machane yad be tamdag ngak e girdi’ ni pire’ nike mu’ulung, ya kar ted ni Jesus e ir reb e profet.