NEHEMIAH 11

Pi girdi’ ni urpired u Jerusalem

1 Pi tayugang’ e ra pired u Jerusalem, ma tin kabay e girdi’ e ra girngiyed e pow ni nge duwgil reb e tabnaw u fithik’ yu ragag e tabnaw ni nge yan i par ngalan fare binaw nib thothup nu Jerusalem, me par e tin kabay u lan e yug binaw nge yochi binaw. 2 Me pining e girdi’ e sorok ngak gubin e pumo’on ni ka ra og niged yad ni ngar pired u Jerusalem. 3 Boch e girdi’ nu Israel, nge prist, nge pi Levite, nge girdi’en e maruwel u Tempel, nge pi’in owchen e tapipig rok Solomon e ra pired u daken taferad u lan yochi binaw rorad.

Ba’aray babyoren e pi’in yad ma yog e thin ko nug nu Judah ni ur pired u Jerusalem:

4 Chonggin e ganong rok Judah:

I Athayah nib mo’on ni fak Uzziah nib mo’on ni fak Zekariah. Ma ku boch e pi chitamngin kakrom e ba mu’un Amariah ngay nge Shefatiah, nge Mahalalel, ni yad e pi’in owchen Perez nib mo’on ni fak Judah.

5 Nge Maaseyah nib mo’on ni fak Baruk nib mo’on ni fak Kolhozeh. Ma ku boch e pi chitamngin kakrom e ba mu’un Hazayah ngay, nge Adayah, nge Joyarib, nge Zekariah, ni yad e pi’in owchen Shelah nib mo’on ni fak Judah.

6 Ma 468 e pi pumo’on nib gilbuwrad ni go’ yad owchen Perez ni ur pired u lan yu Jerusalem.

7 Chonggin e ganong rok Benjamin:

Sallu nib mo’on ni fak Meshullam nib mo’on ni fak Joed. Ma ku boch e pi ga’ rok e ba mu’un Pedayah ngay, nge Kolayah, nge Maaseyah, nge Ithiel, nge Jeshayah.

8 Me Gabbai nge Sallai e pi girdi’en Sallu ni yad ba chugur.

Yad 928 u gubin e girdi’en e ganong rok Benjamin ni urpired u lan yu Jerusalem. 9 I Joel nib mo’on ni fak Zikri e tagagiyeg rorad, me Judah nib mo’on ni fak Hassenuah e ir e migid ngak ko gagiyeg u lan fare binaw.

10 Prist:

I Jedayah e ba mo’on ni fak Joyarib, nge Jakin.

11 Me Serayah nib mo’on ni fak Hilkiah nib mo’on ni fak Meshullam. Ma pi ga’ rok e ba muun Zadok ngay, nge Merayoth, nge Ahitub ni ir fare Prist ni Th’abi Ga’. 12 Chon e re ke girdi’ ney ni ur pigpiggad u lan fare Tempel e yad 822 u gubin.

I Adayah nib mo’on ni fak Jeroham nib mo’on ni fak Pelaliah. Ma pi ga’ rok e ba muun Amze, Zekariah, Pashhur, nge Malkijah. 13 Chon e re ke girdi’ ney ni yad lolgen e pi tabnaw e yad 242 u gubin.

I Amashsai nib mo’on ni fak Azarel nib mo’on ni fak Ahzai. Ma pi chitamngin kakrom e mu’un Meshillemoth nge Immer ngay. 14 Chon e re ke girdi’ ney ni yad bogi salthaw ni yad ba cheag e yad 128 u gubin. En ni tolang rorad e Zabdiel ni reb i chon ba tabnaw nib ga’ lungun.

15 Levite:

Shemayah nib mo’on ni fak Hasshub nib mo’on ni fak Azrikam. Ma pi ga’ rok ba muun Hashabiah ngay nge Bunni.

16 I Shabbethai nge Jozabad e yow l’agruw Levite nib ga’ farow mab milfan e maruwel u wuru’ fare Tempel ngorow.

17 I Mattaniah nib mo’on ni fak Mika nib mo’on ni fak Zabdi ni be’ ni owchen Asaf. Ir e gafaliy girdi’en e tang u Tempel ngar tang niged e meybil ko ogmagaer.

I Bakbukiah e ir e ta’ayuw rok Mattaniah.

Abda nib mo’on ni fak Shammua nib mo’on ni fak Galal ni be’ ni owchen Jeduthun.

18 284 oren e Levite u gubin ni ur pired u lan fare binaw nib thothup u Jerusalem.

19 Pi matnag u Tempel:

Akkub, nge Talmon, nge girdi’ rorow ni yad 172 u gubin.

20 Ma tin kabay ko pi girdi’ nu Israel nge tin kabay ko prist nge pi Levite e ur pired u daken taferad u lan e binaw nge yochi binaw nu Judah. 21 Pi girdi’en e maruwel nu lan e Tempel e ur pired u lan bang u Jerusalem ni kanog yu Ofel ngay ngu’ur maruwelgad ni Ziha nge Gishpa e yow be yog e n’en ni ngar rin’ed.

22 I Uzzi nib mo’on ni fak Bani nib mo’on ni fak Hashabiah e ir e i tay murung’agen e maruwel rok e pi Levite ni urpired u lan yu Jerusalem. Pi chitamngin kakrom e ba mu’un Mattaniah ngay nge Mika, ma ba mu’un ngalan e ke rok Asaf e girdi’, fare ke girdi’ nib milfan ngorad e musik u Tempel u nap’an e gam’ing u Tempel. 23 Bay rogon nike yog e en pilung ni ngi i thilthil e yuke girdi’ i gagiyegnag e musik u lan fare Tempel ni gubin e rran.

24 I Pethahiah nib mo’on ni fak Meshezabel ko fare ke girdi’ rok Zerah ko ganong rok Judah e ir e yan ni owchen e girdi’ nu Israel nga Persia ni tafen e puf oloboch.

Girdi’ nu lan yug boch e yochi binaw nge yug binaw

25 Bo’or e girdi’ ni urpired u lan e yochi binaw nib chugur ko milay’ rorad. Ma pi girdi’en e ganong rok Judah e urpired u lan yu Kiriath Arba, Dibon, Jekabzeel, ngu lan e yuchi binaw nib chugur ko pi binaw ney. 26 Ma ku’ur pired u lan fapi binaw nu Jeshua, Moladah, Bethpelet, 27 Hazarshual, ngu lan yu Beersheba nge yuchi binaw u charen i yan. 28 Ur pired u lan e binaw nu Ziklag, ngu lan yu Mekonah nge yuchi binaw riy, 29 ngu lan yu Enrimmon, ngu Zorah, ngu Jarmuth, 30 ngu Zanoah, ngu Adullam, ngu lan e yuchi binaw ni bay u charen e pi binaw ney. Ur pired u lan yu Lakish ngu daken e yungi milay’ nib chugur e ngaram, ngu lan yu Azekah nge yuchi binaw riy. Ere aram e pi girdi’en Judah ni urpired u lan e nug u thilin yu Beersheba u lan e yimuch nge fare Loway ni Hinnom u lan e lel’och.

31 Girdi’en e ganong rok Benjamin ni urpired u Geba, Mikmash, Ai, Bethel nge yuchi binaw nib chugur e ngaram, 32 ngu Anathoth, Nob, Ananiah, 33 Hazor, Ramah, Gittaim, 34 Hadid, Zeboim, Neballat, 35 Lod, ngu Ono, ngu lan fare Loway ni Kraftmen. 36 Boch e ulung ko Levite ni urpired u lan e nug nu Judah e ni l’ograd ni ngaran ra pired ngak girdi’en Benjamin.