NEHEMIAH 2

Nehemiah ni yan nga Jerusalem

1 Reb e rran ko fa aningeg i pul nike thumur, nap’an ni be abich Artaxerxes ni Pilung, mu gu fek e wayin i yib ngak. Ma dawori guyeg ba ngiyal’ nib kireban’ug, 2 me fitheg ni ga’ar, "Mangfan nike kireban’um? Dariy e m’ar rom, machane ke kireban’um."

Mu ggin ko ren’em ni yog 3 mu gu fulweg ni lungug, "Pilung, ngam par ndariy n’umngin nap’an! Ra di’in mu gu par ndabi kireban’ug ni re binaw ni ka ni k’eyag e pi ga’ rog riy kakrom e ke mogothgoth ma pi garog riy e kan urfiy?"

4 Me fith fa en ni pilung ngog ni ga’ar, "Mang e gab adag ni nggu ayuwegnem riy?"

Mu gu meybil ngak fare Got nu tharmiy, 5 me lungug ngak fare pilung, "Fa’anra gub fel’ u wun’um i gur pilung ma mm’agan’um ko n’en ni nggu wenignag ngom, me ere mpithig ethin ngog nggu wan nga Judah, ko fare binaw ni kan k’eyag pi ga’ rog riy kakrom, nge yag ni gu ngongliy bayay fare binaw."

6 Fare pilung e m’agan’ ko n’en kug ning. Bay le’engin u to’oben, me ga’ar fare pilung ngog, "Uw n’umngin nap’an ni ngam milekag ma wu’in e ga ra sul?" Mu gog ngak n’umngin nap’an, me fel’ u wan’ ni nge pageg nggu wan.

7 Mu gu wenig ngak e en ni pilung ni nge pi’ e babyor ngog nggu pi’ ngak e pi governor ko ba’ ni ngal e nug nu Eufrates, ni nge yog ngorad u babyor ni ngar paged gag nggu milekag nga Judah. 8 Mu ku gu wenig ngak ni nge pi’ bang e babyor ngog ni nggu pi’ ngak Asaf, ni ir e be guy fapi gek’iy ni fi’in e en ni pilung, ni nge yog ngak u babyor ni nge pi’ e ren ngog ni nga ni fanay ko pi garog ko fare naun ni ka ni yororiy ni fan ko mael ni tafen e salthaw ni matanagen e Tempel, nge ren ni ngan fanay ko yoror ko binaw, nge naun ni nggu par riy. Me pi’ pilung ngog urngin e pin’en ni gu wenignag ngak, ni bochan e ba’ Got rog.

9 Me pi’ fa en ni emperor boch e tolang ko salthaw nge salthaw nma yan u daken e os ngar uned ngog, ma gamad milekag nggu warod ko ba’ ni ngal e nug nu Eufrates, mu gu pi’ ngak e pi governor fapi babyor ni pi’ fa en ni emperor. 10 Sanballat e be’ ko binaw nu Beth Horon, nge Tobiah, ni reb e ga’ ko nug nu Ammon, e fa’an rrung’agew nike yib be’ ni nge maruwel ni fan ngak yu Israel, mi yow dabuy.

11 Mu gu wan nga Jerusalem, mu gu par u rom ni dalip e rran 12 da gog ngak be’ e n’en ke tay Got nga lanin’ug ni nggu muruwliy ni fan ngak yu Jerusalem. Me lukngun e nep’ mu gu od me un in e pumo’on ngog nggu warod. Ta’are gamanman ni gu feked nge un ngomad e re dongki ni ba’aram ni gu af nga daken nggu warod. 13 Kab nep’ mu gu chuw u lan binaw ni gu wan u langan fare garog ni Garog ni Loway fithingan, ni bay ko ba’ ni ngal e yoror ko binaw, mu gu sor riy ngalan e yimuch nggu wan u to’oben fare athang’el ni Dragon fithingan mu gu wan u rom ko fa binem e Garog ni Dow fithingan. Gu be yan ma gu be lekag e yu yang nike puth ko yoror ko binaw nge pi garog nike gathay e nifiy. 14 Ma aram mu gu wan riy ko fa binem e Garog ni Athang’el ko fare Lipath rok e en Pilung; ma de pir’eg fare gamanman ni gu bay u daken bang ni nge yan riy. 15 Ma aram e guwan e re nep nem u charen e loway ni gu be lekag fare yoror; mu gu cheal nggu sul u langan fa binem e Garog ni Loway, nggu wan ngalan binaw.

16 Dariy reb e tolang ni nang e gin gu wan ngay ara n’en ni ug rin’. Aram nap’an i yib ma dawor gu weliy ban’en ngak bagyad e tin ba’aram e Jew, ni pi prist, nge pi’in yad ma yog e thin, nge pi tolang, ara yugu be’ nra un ko re maruwel nem. 17 Ma aram me lungug ngorad, "Kam guyed e gafgow ni kad awgad nga fithik’, ke mogothgoth e binaw nu Jerusalem nge pi garog riy nike kireb! Ngad ubunged e yoror ko re binaw ney nge dab ku un darifannagdad." 18 Mu gu weliy ngorad rogon ni i par Got rog ngi i ayuwegneg, nge n’en nike yog fare pilung ngog.

Miyad fulweg ni lungurad, "Ngad ubunguyed." Miyad fal’eg rogorad ni ngar tababgad ko maruwel.

19 Ma fa’ani rung’ag Sanballat nge Tobiah, nge be’ u Arabia ni Geshem fithingan murung’agen e maruwel ni gamad be tay mu ur minmingad ma yad be moning ngomad. I lungurad, "Be mang e binir e maruwel ni gimed be ngongliy? Mogned, gimed be finey ni ngam togopluwgad ngak e en pilung?"

20 Mu gu fulweg ni lungug, "I Got nu tharmiy e bayi ayuwegmad nge fel’ e pin’en ni gamad be muruwliy, ya gamad e tapigpig rok, ere nggu tababgad ko maruwel. Ma gimed e dariy e f’oth romed ara mat’awmed ara rogomed nga Jerusalem."