1 Be ga’ar SOMOL,

"Nap’an ni kab bitir Israel ma rib t’uf rog;

mu gu pining nga wuru’ yu Egypt ni bod be’ nib mo’on ni fakag.✝

2 Ra yo’or yay ni gu be pining,

me yo’or yay ni be pi’ keru’ ngog.

Girdi’ rog e yad be maligach ngak Baal;

ma yad be urfiy e incense ni fan ngak e pi liyos.

3 Ni yug aram rogon ni gag e gu fil rogon e yan ngak Israel.

I gag e ug dibeyrad e girdi’ rog,

machane dar leam niged ni gag e gu chothowliyrad.

4 U fithik’ e runguy nge t’ufeg rog miyad chuchugur ngog.

Gu chibiyrad ngalang nggu faray owcharad;

gu lumel nga but’ nggu duruw’iyrad.

5 "Ra siyegned ni ngar sulod ngog, ere thingar rsulod nga Egypt, nge mang yu Assyria e ngar gagiyeg niged yad. 6 Mael e bay yan u lan e pi binaw rorad nge t’ar e mab ko garog. Me li’ e girdi’ rog, ni bochan e yad be rin’ e n’en ni yad rorad e yad be leamnag ni bfel’. 7 Ri yad be guy rogon ni ngar pi’ed keru’rad ngog. Bay ra yorgad ngalang ni bochan fare mat’ ni bay u porad, ma dariy be’ nra chibiy nge chuweg rorad.

8 "Israel, uw rogon ni nggu pagem?

Uw rogon ni nggu n’igem?

Gur rayag ni gu thirifem u but’ ni bod ni gu rin’ nga Admah?

Ara gu rin’ ngom e n’en ni gu rin’ nga Zeboyim?

Dabiyag u ngorongreg ni nggu rin’!

Ya ri gab t’uf rog!

9 Dab gu gechig nigem u fithik’ e damumuw rog;

dab kug kirebnag Israel bayay.

Ya Gag Got, ma gathi gag e girdi’.

I Gag fa En nib Thothup e gu bay rom.

Dab gub ngom u fithik’ e damumuw.

10 "Girdi’ rog e bay ra leked gag ko ngiyal’ ni gu ra tolul ni bod ba layon ngak e pi to’ogor rorad. Bay rabad ko ngal i yib ngog ni yad ba gur. 11 Bay rabad u Egypt, nib machreg ni bod e arche’, marbad u Assyria ni bod e dove. Bay gu fulwegrad nga taferad bayay. I Gag SOMOL e gu be non."

12 SOMOL e ga’ar, "Girdi’ nu Israel e kar liyegned gag ko felfel’ llugun nge ban, ma girdi’ nu Judah e ki yad be togopluw ngog, ni Gag fare Got nib yul’yul’ ma ba thothup.