Oséias 4

Pin’en ni yog SOMOL ndabun ni be rin’ piyu Israel

1 I SOMOL e bay e n’en ni nge yog ni ba togopluw ko girdi’ nu Israel ni be par ko re nam ney. Israel, mu telim ko n’en ni be yog ni be ga’ar, "Dariy e yul’yul’ nge t’ufeg u daken e re nam ney, ma dakriy e girdi’ ni be yog ni Gag Got. 2 Girdi’ riy e yad ra micheg boch e thin ni yad ra rin’ ma darir ted nga tagil’; yad ma lifith l’ugunrad, ma yad ma thang e pogofan, ma yad ma moro’ro’, ma yad ma par e pi’in ni gathi mabgol rorad. Pi kireb ni yad be rin’ e be yo’or i yan, yugu yad be pu’og e racha’. 3 Ere bayi m’ay e ran u daken e nam, ma urngin ban’en nib fos e bay yim’, ni urngin e pi gamanman nge pi arche’, mus ko nig ni bayi yim’."

Pin’en ni yog SOMOL ndabun ni be rin’ e pi prist

4 Be ga’ar SOMOL, "Dariy be’ ni nge yog ban’en nib togopluw ngak e yug girdi’ ara puwan’ ngorad, ya tin ndabug ni yibe rin’ e ba sor ngomed e prist. 5 Maruwel ni gimed be tay ni rran nge nep’ e mm’ay fan, ma fapi profet e dariy e thilthil romed. Aram e nggu thirif yu Israel u but’ ni ir e chitiningmed. 6 Girdi’ rog e kan thirifrad u but’ ya dakriy madgug u wun’rad. Gimed e pi prist e kam pi’ed keru’med ngog, are nggu n’agmed ni dabkum manged prist rog. Ma bochan e kam paged talin e motochiyel ko Got romed, ma aram e bay kug pag talin pifakmed ni pumo’on.

7 "Ra be yo’or e prist, ma aram e fini be yo’or e denen ni yad be ngongliy nib togopluw ngog. Tayfan ni yibe tay ngorad e bay gu pingeg ngar pired nike m’ayfarad. 8 Ke yo’or ban’en romed ni bochan e denen ko girdi’ rog, are gimed e gimed ba’adag ni ngu’ur pirednag e denen. 9 Ta’ab gechig e bay mu gafgowgad e girdi’ u tanggin! Bay gu gechig nagmed ngam pi’ed puluwon e kireb romed. 10 Bay mu ked e biromed e f’oth ko maligach, machane dabi m’ay e mak’iy romed. Bay um ted fan fapi got ko yong’ol, machane dabiyag e bbitir ngomed, ni bochan e ka mu pi’ed keru’med ngog ka mu leked boch e got."

I SOMOL ndabun ni yibe tay fan yug boch e got

11 Be ga’ar SOMOL, "Wayin e be chuweg e gonop rok e girdi’ rog ma be balyang nagrad! 12 Yad be de’eriy yungi ren ni nge dag ngorad e tin ni ngar rin’ed! Boch ley i gek’iy e be yog ngorad e tin ni yad ba’adag ni ngar nanged! Kar pi’ed keru’rad ngog; kar pi’ed yad ngak yugu boch e got ni bod be’ ni bpin ni yan ngi i pi’ ir ni chuway’. 13 Yad be pi’ e maligach u p’ebugul e burey ko yungi n’en ni kan tay nib machmach, ma yad be urfiy e incense u tan yu ke gek’iy nib n’uw ma ba ga’ kean ni bay u daken e ted, ni bochan e ba ga’ e tagalul’ u tanggin!

"Ere wenegan nike yib ngomed e ke yan pifakmed ni ppin yad be chuway’ ngorad, ma pi ppin ni le’engin pifakmed e yad be iling. 14 Machane dab gu gechig nagrad ni bochan e ren’ey, ya ku er rogon gimed ni gimed ma yan ngak e pi ppin ni yad ma chuway’ ngorad u tempel,*4:14 PPIN NI YAD MA CHUWAY’ NGORAD U TEMPEL: Pi ppin ney e ni pir’egrad ko pi tempel rok e pi Kanaanite, ni aram e gin ni un tayfan e pi got ko yong’ol riy. Un leamnag ni yira moleg e pi ppin ney me yong’ol e woldug. ngam cheaggad ngorad ngu’um pi’ed e maligach ko pi got ni go’ bogi ban’en. Ni bod fare bugithin ni yima yog nma lunguy, ‘Girdi’ ndariy e nangan’ rorad e yad ra kireb.’

15 "Yugu aray rogon ndamur yul’yul’gad piyu Israel ngog, ma yu Judah e mang e yugu ra pired ndab ra ngongliyed e tin gimed be rin’. Dab marod mu meybilgad nga Gilgal nge nga Bethel, ma dab mmicheged yu bugithin u rom nga fithingan SOMOL ni be par nib fos. 16 Piyu Israel e yad ba gelan’ ni bod feni gelan’ e pi gamanman ni mule. Ere uw rogon ni nggu duruw’iyrad ni bod rogon pi pifak e saf ni bay u bangi garger nib galunglung e pan riy? 17 Girdi’ nu Israel e yad be par u tan gelngin e liyos. Ngan pagrad ngranod ko birorad e kanawo’ 18 Tomuren ni ka ra unumed e wayin nib yo’or ma taban lanin’rad e ngar pi’ed yad ni chuway’, kabm’on u wan’rad ni ngan dariyfan nagrad ko bin ngan tay farad. 19 Nifeng e bayi tayrad nga daken pon nge fekrad, ma bay ra tamra’gad ni bochan e kar pi’ed e maligach ngak bogi got ni go’ bogi ban’en.