1 Irera’ e pi thin ni yog e chitiningin Lemuel ni Pilung ngak:

2 "I gur fakag ni gab t’uf rog, ni taban e pi meybil rog. Mang e nggog ngom? 3 Dabi par ni dake ppin e maruwel rom ma dab mu adbey e salpiy rom ni gubin ko ppin; ya yad e ur kireb naged e pilung. 4 Lemuel, ngam motoyil, pi’in pilung e dabi unum e wayin ara i yim’ ni bochan e rrum. 5 Yad ra unum, miyad pagtalin e motochiyel miyad fek owcharad u mat’wun e girdi’ nike t’uf e ayuw rorad. 6 Alkul e fan ngak e pi’in ngarm’ad, ni pi’in ka ra bilged t’ay e gafgow. 7 Ni pagrad ngar unumed ngar paged talin e gafgow rorad nge kirban’ rorad.

8 "Mu non ni pa’ e girdi’ ni dabiyag e numon rorad. Ma ga ayweg mat’wun urngin e pi’in yad bme’waer. 9 Mu non ni pa’rad ma ga mang ba tapufthin nib mat’aw. Ma ga ayweg mat’wun e gafgow nge pi’in kri t’uf e ayuw rorad."

10 Ri ba mo’maw’ ni ngan pir’eg reb e bpin nib tafolop ni ngan le’engiy! Re bpin nem e kaba thum’ felngin nga wuru’ e tin th’abi fel’ e churwo’ nib tolang puluwon!

11 Figirngin e be par nib pagan’ ngak, ma dabi gafgow figirngin.

12 N’umngin nap’an e yafos rok e re pin nem ni bay i par ni be rin’ e tin ni bfel’ ngak figirngin, ma dabi rin’ ban’en ngak nib kireb.

13 Ma yugu be ngongol ni aram e be fal’eg e mad u bunu’en e saf, nge mad ni wech.

14 Ma be fek e ggan u urel i yib nga tabinaw rok, ni bod e barkow nma fek e chugum i yib.

15 Ma od ndawori tamilang nge ngongliy e ggan ni nge kay e girdi’ ko tabinaw rok, me weliy ngak e ppin ni tapigpig rok e n’en ni ngar rin’ed.

16 Ma be changarnag e binaw nge chuw’iy ko salpiy ni ir e thognag, me yung e woldug ngay.

17 Ma ba madangdang ko maruwel ma ba gel.

18 Ma manang feni ga’fan e pin’en ni be ngongliy, mma maruwel nge n’uw e nep’.

19 Ma finathiy e tret rok me ir e ma lifith e mad rok.

20 Ma ba gol ngak e pi’in gafgow nge pi’in nib t’uf e ayuw rorad.

21 Ra taw nga nap’an ni nge aw e ayis ma der ma magafan’, ya bay e mad nib magowel ni fen gathon e tabinaw rok.

22 Ma ngongliy e mad ni ngan filath nga daken e chob, mma chuw ko mad ni bfel’ ma ba ra’en purple.

23 Ma figirngin e ba ga’ bugwan, me ir reb fapi girdi’ nma yog e thin u lan binaw.

24 Re pin nem e ma ngongliy e mad nge leed, nge pi’ ni chuway’ ngak e pi’in yad ma falchuway’.

25 Me ir be’ nib gel ma yima tay fan, ma der rusnag e pi rran ni bay yib.

26 Ma welthin nib sumunguy u fithik’ e gonop.

27 Ma gubin ngiyal’ ni be par ni be ngongol ma be guy e tin ndabisiy ni nge yag ngak girdi’en e tabinaw rok nge yagnag.

28 Ma pifak e yad ma dag ngak ko ngongol rorad ni yad be pining e magaer ngak u lanin’rad, ma figirngin e ma yog e sorok ngak.

29 Figirngin e ma ga’ar ngak, "Pire’ e ppin nle’engiy ni bfel’, machane gur e th’abi fel’ u fithik’rad."

30 Feni pidorang be’ ni bpin e rayag ni nge ban nigey, ma pidorang e ma m’ay, machane be’ ni bpin ni be par ni bay madgun SOMOL u wan’ e thingar nog e sorok ngak.

31 Nga ni pining e magaer ngak u urngin e pin’en ni be ngongliy, ya bay tapgin ni gubin e girdi’ ni ngar tedfan.