ZEPHANIAH 2

Ba wenig ni ngan pi’ keru’uy ko kireb

1 Gur fare nam ni damur tamra’, mu sulweg lanin’um ngom 2 u m’on ni nge thoyem e nifeng ngam changeg ni bod e chabung ni un ko nifeng, u m’on ni nge yib e damumuw rok SOMOL ni be yikyik nga dakenam, ngu m’on ko fare rran ni nge dag gelngin e damumuw rok. 3 Mu sulod ngak SOMOL, gimed gubin girdi’en fare binaw nib sobut’an’med, ni gimed ma fol ko tin ni yog. Mu rin’ed e tin bmat’aw, mi gimed sobut’ nagmed u p’eowchen SOMOL. Ma aram e sana gimed ra thay ko gechig ko fare rran ni nge dag SOMOL e damumuw rok.

Bilig t’ay e gafgow ni nge tay e pi nam ni yad ba liyeg yu Israel

4 Dariy be’ nra magey u lan fare binaw nu Gaza. Ma fare binaw nu Ashkelon e bay ni pag ndabki par be’ riy. Girdi’ nu Ashdod e bay ni tulufrad nga wuru’ fare binaw u ta’ab ngiyal’. Ma fare binaw nu Ekron e bay kun tuluf e girdi’ riy. 5 Bilig t’ay e gafgow e kam ted e girdi’ nu Filistia, gimed e girdi’ ni gimed ma par u dep’el’ay. Ya SOMOL e ke pag e gechig ni nge aw ngomed. Bayi thang owchamed, ni dabi magay be’ nib fos. 6 Binaw romed u charen e day e bayi par ni yuchuwo’ i pan me sug nag e chumol ko saf nge yochi naun ko pi tagafaliy e saf. 7 Girdi’ nra magey u Judah nib fos e bay ra pired ko binaw romed. Bay ra chugliyed e saf rorad u rom ma yad be mol u lan e naun rok yu Ashkelon. Fare SOMOL ni Got rorad e bayi par rorad nge ayuwegrad nge fel’ rogorad bayay.

8 Be ga’ar SOMOL ni Gubin ma Rayag Rok, "Kug rung’ag ni be yog e girdi’ nu Moab ngu Ammon e thin nib kireb ma yad be moning nag e girdi’ rog. Yad be yog nib sororad ma bay ra koled u fithik’ e yargal e binaw rok yu Judah. 9 Rogon ni gu be par ni Gag SOMOL ni gub fos ni Got rok yu Israel, e gu be micheg nu Moab ngu Ammon e ngan thirif u but’ ni bod yu Sodom ngu Gomorrah. Bayi par nike sug nag e low ni go’ sol ni dabki fel’ bi’id, nike polo’ i pan. Ma tin ni magay ko girdi’ rog e bay ra giliw nigedrad ngar feked e binaw u pa’rad."

10 Ireram rogon e girdi’ nu Moab ngu Ammon ni bay ni gechig nagrad ko tolngan’ rorad nge ferad taf nge fan e ur yab’iyed e girdi’ rok SOMOL ni Gubin ma Rayag Rok. 11 Bayi k’aring SOMOL e marus ngorad. Bayi sobut’eg e pi got nu fayleng nge m’ayfarad, ma aram e gubin e nam ni bay ra meybilgad ngak, ko gin’en ni yad bay riy.

12 SOMOL e ku bayi thang e pogofan rok piyu Ethiopia u fithik’ e mael.

13 I SOMOL e bayi maruwel nga gelngin nge gathay yu Assyria. Ir e bayi tay fare binaw nu Nineveh ni dakriy be’ riy nike mogothgoth, nike daken e ted ni dakriy e ran riy. 14 Bayi par e re gin’em nike mang yu ran’ i saf nge garbaw, nge gabin mit e gamanman e yad be par riy. Arche’ ni owl e bay ra pired ko pi naun nike mogothgoth ngu’ur mayngargad u langan e winda. Pi gap’luw e ku yad ra mayngar u langan e tawo’. Ma yungi ren ni cedar ko pi naun riy e bay ni fathiy ngan chuweg. 15 Irera’ e n’en ni bayi buch ko fare binaw nrib tolngan’ ma rib taf nga gelngin nib gel, ma be leamnag ni dakriy ban’en nra buch rok. Girdi’ riy e yad be leamnag nre binaw rorad nem e ir e th’abi cheag u fayleng. Ere ayugumguyew ko gin bayi yan i aw ngay, ni bayi par ndakuriy be’ riy me mang tagil’ e toffan ko gamanman. Gubin e girdi’ nra yib u charen me m’ing ban’en u yinrad ko morus.