ZECHARIAH 13

1 SOMOL ni Gubin ma Rayag Rok e be ga’ar, "Rataw ko ngiyal’ i n’em ma bayi mab ba alublub ni nge machalbog nag e pi’in owchen David, nge girdi’ nu Jerusalem ko den’en nge liyor ko liyos ni yad be tay. 2 Ma rofen nem e bay gu chuweg fithngan e pi liyos u daken e re nam ney, nge dab ku’urbad ngan’uy. Ma ku bay gu chuweg u daken e re nam ney e pi profet ni go’ bogi ban’en, mug chuweg u wun’uy chogowen e pi liyos ni nga un tayfan. 3 Ma fa’anra m’ug be’ ni be ga’ar e ku ir reb e profet, ma chitamngin nge chitinngin e bay rogew ngak ni aram e thingar nli’ ngem’, ni bochan e be yog ni be weliy e thin rok SOMOL, machane go’ ban e be weliy. Ma nap’an nra yi’iynag ban’en ma chitamngin nge chitinngin e yow ra yip’ ko sarey nge yim’. 4 Rofen nem e dariy ba profet ni ku ra ufanthin ko tin ma pilyeg e changar rok ngi i guy, ara i yan u ya’an e profet, fa chuw nga madan e profet nib matharthar ni fan e nge ban nag e girdi’. 5 Ya ra ga’ar, ‘Gathi gub profet, ya gub girdi’en e milay’ — maruwel u milay’ e gu ma rin’ u n’umngin e yafos rog.’ 6 Ma fa’anra fith be’ ngak ni ga’ar, ‘Mang e tin be’er e maad’ad u daken ngarngorrem?’ Ma ra fulweg ni ga’ar, ‘Ma’ad’ad ni gu tay u tabnaw rok e tafger rog.’"

Ba thin nnog ni ngan li’ ba tagafal saf rok Got

7 I SOMOL ni Gubin ma Rayag Rok e ga’ar, "Saydon, mu od ngam cham ngak fare tagafaliy e saf nma maruwel rog! Mu li’ ngem’, nge wagey fapi saf. Bay gu cham ngak pi girdi’eg, 8 ma girdi’ ni bay yim’ ko re nam ney e l’agruw yay nib yo’or ko tin ra magey. 9 Bay gu sikengnag e tin kar mageygad, ma bay gu be’ech nagrad ni bod e silber ni yima be’ech nag ko nifiy. Bay gu sikeng nagrad ni bod ni yima sikengnag e gol. Ma aram e bay ra meybilgad ngog, mug fulweg taban e meybil rorad. Bay gog ngorad ni yad pi girdi’eg, ma bay roged ni Gag e Got rorad."