Zacarias 14

Jerusalem nge pi nam

1 Fare rran ni bayi par SOMOL nga tagil’ e pufthin e ke chugur. Ma aram e bay ni fek u fithik’ e yargal urngin e tin fen piyu Jerusalem, pi chugom nem ni kan fek u fithik’ e yargal e yira f’oth u p’eowchemed. 2 I SOMOL e bayi kunuy e pi nam nga ta’bang ni ngar m’aged e mael nga Jerusalem. Yira kol fare binaw, min giliw nag urngin e chugum ko pi naun, min mod yargal ko ppin ngan kolrad u gelngiy. Ma baley u gathon fare binaw e bay ni fekrad ni kalbus nga wuru’ e nam, machane pi’in yad ra magey e dab kun nchuwegrad u lan fare binaw. 3 Ma aram e bay yan SOMOL nge cham ko fapi nam ni bod niki i cham ngorad kakrom. 4 Rofen nem e ra sak’iy nga daken fare Burey ni Olive, ni bay ko ngek u Jerusalem. Ma aram e fare Burey ni Olive e bayi sey ko ngek i yan ko ngal nge ruw raba’, me aw ba loway nib ga’ u thilin. Barba’ fare burey e ra kan, ko lel’och, ma barba’ riy e ra kan ko yimuch. 5 Gimed ra mil ngam thumur gad u lan e re loway ney nike ki’eg fare burey ni l’agruw guruy. Gimed ra mil ni bod e pi chitamangimed kakrom u nap’an ni yib fare durru’ fa ngiyal ni Uzziah e Pilung nu Judah. I SOMOL ni Got rog e bay yib nike un urngin e pi engel ngak.

6 Rofen nem e bay dabki yib e garbeb nge ayis, 7 ma ku dabki nep’. Yug bay i par nib rran, ni mus ko ngiyal’ nma nep’ riy. Re ngiyal’ nra yodrom e pin’ey e kemus ni go’ SOMOL e manang.

8 Rofen nem e ra map’ e ran nma pi’ e yafos u Jerusalem, baley ko pi ran nem e bay i map’ ngalan fare gi day ni Dead Sea, ma baley riy e bay i map’ ngalan e day ni Mediterranean. Bay i map’ e re ran ney ni gubin ngiyal’ u gubin e duw, nnap’an e yal’ nge n’uw. 9 Ma aram e bayi mang SOMOL e pilung u fayleng ni ga’ngin; gubin e girdi’ e bay ra liyor gad ngak ni ir Got miyad nang ni ku ireram fithingan.

10 Fagi binaw ni ga’ngin ni mus u Geba ko lel’och, nge mada’ nga Rimmon ko yimuch e bay ni pacheg nge ta’reb foyen. Yu Jerusalem e bayi tolang ngak urngin e pi binaw nib liyeg. Fare binaw nu Jerusalem e tabab ko fare Garog ni Benjamin nge mada’ ko fare Garog ni Tabthung, ko fa gin ni immoy ba garog riy kakrom, miki yan ko fare Wulyang rok Hananel, nge mada’ ko fare n’en ni yima udiy e wayin rok e en pilung riy. 11 Bayi par e girdi’ u rom u fithik’ e gapas, dakuriy be’ nra yib nag e cham ngorad.

12 I SOMOL e bayi pag e m’ar ni ubchiya’ nge yib ngak urngin e pi nam ni yad ma mael ngak yu Jerusalem. Ufin u dowrad e bayi malad nge chuw u nap’an ni kayad bfos; lan owcharad nge balwothrad e ku ra malad nge chuw.

13 Rofen nem e bayi balyang nag SOMOL lanin’rad miyad rus ni yad gubin nra bagyad me cheal nge cham ko en nu charen. 14 Pumo’on nu Judah e bay rcham gad ni ngar yoror gad rok yu Jerusalem. Bay rfeked u fithik’ e yargal gubin e falel’ rok e pi nam ni gol, silber, nge mad ni yo’or.

15 Bay ba liliy ni ubchiya’ ni bayib ngak e pi os, nge mule, nge kamel, nge dongki nge nga daken gubin e gamanman u lan e gin ma par e pi to’ogor riy.

16 Ma aram e gubin e pi’in nra fos gad ko pi nam nu ur chamgad nga Jerusalem e bay ranod ngaram ni yu duw ni ngar liyorgad ngak SOMOL ni Gubin ma Rayag Rok ni ir e pilung miyad madnomnag fare Madnom ko Nochi Naun. 17 Fa’anra siyeg reb e nam ni nge yan nge liyor ngak SOMOL ni Gubin ma Rayag Rok ni ir e pilung, ma aram e dabki aw e n’uw nga daken e nam rorad. 18 Fa’anra siyeg piyu Egypt ni ngar madnom niged e Madnom ko Nochi Naun, ma aram e bayi aw fare liliy ngorad nma pi’ SOMOL nge yan ngak e pi nam ni yad ma siyeg ni ngar uned ko madnom. 19 Irera’ e re gechig nra mul nga daken yu Egypt nge nga daken gubin e nam ni fa’anra dab ra madnom niged e Madnom ko Nochi Naun.

20 Rofen nem e mus ko beal nikan m’ag nga tan l’ugun e os ma kani ker e yu bug i thin ni ba’aray nga daken "Kan og nag ngak SOMOL." Pi th’ib ni yima lum riy u Tempel e ta’reb feni tabgul ko fa yu raba’ i dabiy u mit e altar. 21 Gubin e pi th’ib u lan yu Jerusalem ngu Judah ni ga’ngin yang e ngan fael nga bang ni ngan fanay ko bangbengen e liyor ngak SOMOL ni Gubin ma Rayag Rok. Girdi’ ni yad ma pi’ e maligach e yad ma lum ko pi th’ib nem ngu’ur lith’ed e ufin ni maligach riy. Ra taw ko ngiyal’nem, ma dakriy reb e pi tafalchuway’ u lan e Tempel rok SOMOL ni Gubin ma Rayag Rok.