ZECHARIAH 4

Ba changar ni pilyeg ngan guy ba Tagil’ e Magal

1 Fare engel ni i non ngog e sul ngog bayay ngeb i suwonageg ni gowa ku’ug mol. 2 Me fitheg ni ga’ar, "Ba mang e ga be guy?"

Mug fulweg ni lungug, "Ba tagil’ e magal nni ngongliy ko gol, u daken p’ebugul e bay barba’ i dabiy riy ni fen e gapgep. Ma daken tagil’ e magal e medlip lay e magal ni bay riy, ra balay ma medlip yang e wik ni bay riy. 3 Bay l’agruw ke gek’iy ni olive u charen fare tagil’ e magal, ra baken e gal ke gek’iy nem ma bay nga barba’ fare tagil’ e magal." 4 Ma aram mug fith fare engel ni lungug, "Siro’ ngom, mang e be yip e pin’ey fan?"

5 Me fulweg ni ga’ar, "Damur nang ko mang?"

Me lungug, "Siro’ ngom, dagnang."

6 Fare engel e yog ngog ni nggu pi ngak Zerubbabel e re thin ney rok SOMOL: "Bay mman’og ni gathi gelngin e salthaw rom, ma gathi gelngim, ya gelngig. 7 Tin be magawon nigem nib ga’ ko pi burey e bayi ling u p’eowchem. Bay mu toy bayay fare Tempel, ma nap’an e ga ra ayliy e bin tomur e malang nga gil’, ma bay i tolul e girdi ni yad be ga’ar, ‘Rib fel’usun, rib fel’usun!’"

8 Miki yib reb e thin rok SOMOL ngog bayay. 9 Ni be ga’ar, "I Zerubbabel e yin’ e def ko fare Tempel, ma ra mu’nag fare naun. Nap’an nra yodroy e pin’ey, ma girdi’ rog e bay ra nanged ni rriyul’ ni gag e kug l’oegem ngorad. 10 (a) Bayi kireban’rad ya rib sag’al e maruwel ni be yan. Machane bay ra guyed Zerubbabel ni ka be toy fare Tempel ni dertal, me felan’rad."

(b) Fare engel e ga’ar ngog, "Fa medlip i magal e aram fa medlip i lan owchen SOMOL ni be changar u daken e fayleng."✝4:10 Rev 5:6

11 Ma aram mug fith ngak, "Mang e be yip fa gal ke gek’iy ni olive fan ni yow bayu barba’ i charen fare tagil’ e magal? 12 Ma mangfan fa gal pa’ i pa’angin e gek’iy ni olive u charen fa gal payep nib gol nma map e gapgep ni olive riy?"

13 Miki ga’ar ngog, "Mog, damnang fan?"

Me lungug, "Siro’ ngom, dagnang."

14 Ma aram me ga’ar, "Irera’ fagali pumo’on nike mel’eg row Got ke gapgep nagrow ni ngar pigpiggow ngak, fare SOMOL ko polo’ e fayleng."