1 ኤኪን አይሁድ ስናስ አዉ ኬእንሪንሶ? ሃርኮኒ ኩኑስ ዋግባ ኣምባንሶ? 2 ፉቶሲክ አይሁድ ስና ሾዎ ኡግናክ ኬአርዋ፤ አሪክ ቾዋስ ሀኦሲ ካምባሶን አይሁድኒ ሜያክ አዳራ እምባስዋ። 3 ኤኪን አይሁድኒ ሜያስን እሳ እሳ ሜያ አማንቶቤስ ፎንቶ ስንነፋቴነ ባሶ አማኖ ቤያስ ሀኦሲ አማናምቶኖን ዋግባ ቱሩክሱንሮሶ? 4 እሳንነ ኣፋ ቱሩክሱና ዉዛ!

«ካምኔስታን ካቢ ቾዋ ነ ፉቶ ስናታዋ፤

ጉማኔስን ደይ ማላቴራ ዳዎታዋ።»

ይስቴራ ትቼናስማቶ አሱ ዙቴሬ ኤሽኛ ስንፌናክኑ ሀኦስ ፉቶ ስኑንዋ።

5 ስኑንታኖ እንኖ ማጝሱስ ሀኦሲ ኦኮኖን ቤሱኒር ስንፋናነ አዉ ኡንሪንሶ? ሀኦስ እንኖ ማጝሱሲ ቦርአ እኖትን ኬእፋናነ ባር ፉቶኒ ማጝሱ ኣነ ካርፋ ኡኖሶ? ሀን ባሮን ማኬፋናስ አሱኒ ሳፋራንማቶዋ። 6 እሳንነ ኤካታዋ፤ ኤካ ስንፋናነ ሀኦስ ኣካክ ሀን ዳስታ ማጝሱ ካርኒሪንሶ?

7 ስኑንታኖ ታ ኤሽኛ ስናስ ሀኦሲ ፉቶኖን አምማኖን ቤስራ ኡልፍንባሲ አሪኩኖን ቤሱኒር ስንፋናነ ኤኪን ታ ቦርእኛኒማቶ አዉኒ ቦርአ ታይስታ ማጝሱ ካቶኒሪንሶ? 8 እሳ እሳ አሱኒ ሜያ፦ «ማአ ዉዛ ዳናኒክ ማጙ ዉዛ ዛጉኒዋ» ይራ አስሲናርነ ፋሮን ዛግሬቱ ታን ማላቴሴፌዋ። ኤስ ባሪ ቦርኣ ኤስ ኤፌቴና አሱኒ ሜያስታ ካቶኒ ማጝሱስ ልኪዋ።

9 ኤኪን እንኖ አይሁዲስ አዛብኒ ሜያስታን ደናሎ ስንኒ ኡኖሶ? እሳንነ እንዳነዋ። አሱኒ ሜያ ዙቴሬ አይሁድ ስኖቶ ኣዛብ ስንነፌክኑ ቦርእቤስ ፋናር ስንነቴማቶቱ ዜምማ ንቶክ አስጝዋ። 10 ማፃፋሲ፦

«እሳ ኦኮ አሱኑ ኣፌ፤ እሳርንኑ ኣፌዋ።

11 ያዳትባ ፌናር ኦኑ ኣፌ፤

ሀኦሶን ሾሌፌር እሳርንኑ ኣፌ።

12 ዙታምቤሲሴ ኡግናስታን ሻቴሴቴ።

እሳሪክ ኬእኖር ስንነቴ፤

ማአሮን ዛግፌር ኦኑ ኣፌ፤ እሳርንኑ ኣፌ።

13 አሱኒ ሚርኦኒ ማጙ ካማ ማኮክ፤

ኖኖቤሲስ ጋቼራ ኩኒ ሞጋነ ፋርዋ፤

ቴሩምቤሲሲክቱ ኤሽሴፌዋ፤

ቴሩምቤሲስ ዎላ ደይ ዛዉኒ ኬዋንማቶ አሱኒ ሚርእኤርዋ።

14 ኖኖቤሲስ ኤርውያክናዋ ሱቃሮክና ቱማ ፋር።

15 ዎቾቤሲስ አሱኒን ዎሩክ ታፕቴር።

16 ኡጉቤሲስታ ትሹነዋ ሻንቱነ ፋርዋ።

17 ናጋኒ ኡግናሶን ኣነ አርሴፌ።

18 ሀኦሶን ኣነ ድግሴፌ»

ይስቴራ ትቼናስማቶዋ።

19 ሙሴኒ ቱማሲ አጃጅ ማኬፋናስ ቱማስ ዳካሎ ፌሴ ባሶትን ስንናማቶ አሪፌንዋ። ኤስ ባሪ ቦርኣ አሱኒ ሜያ ኤጴ ማክሶነ ዉዛ ትሽና ቦርአቱ ሻክሴፌዋ። ዳ ዙታምባሴ ሀኦሲ ማጝሱኒ ካርእኒ ስካሎሲቱ ፋዋ። 20 ኤስ ባሪ ቦርኣ ኦኑ ሀኦሲ ስና ቱማሶን ዛጉክ ኣፋ ኦኮ ስናናዉዛ። ቱማስኪ ካሞቱ ቦርኣስ አርቴፋዋ።

21 ስኑንታኖ ሀሽ ሀኦስ አሱኒ ሜያኖን ኦኮ ዛጉና ኡግናስ ቱማስ ሾልሱኖይናሮን አምማኖን ኬስሳ ቤስቴዋ። ኤሲስ ደይ ሙሴኒ ቱማሲናዋ ራጁኒ ሜያክና ዛላ ማክቴዋ። 22 ኤስ ባሪ ቦርኣ ሀኦስ እሳ ኮሩባ ፎንቶኖን የሱስ ክርስቶስኒክ አማነፌ ባሶ ዙቴሬ ኦኮ ስኖነክ ዛጊዋ። 23 አሱኒ ሜያ ዙቴሬ ቦርአ ዎስቴሴቴ፤ ሀኦሲ ኡልፍና ደይ ባሶስታን ዮእ። 24 ኤስ ባሪ ቦርኣ አሱኒ ሜያ ዙቴሬ ክርስቶስ የሱስ ዛግና ፉሪሲኪ ካሞ ሀኦሲ ኦትማክቱ ባክ ኦኮ ስኖነዋ። 25,26 ሀኦስ የሱስ ክርስቶስኒን ማእአ ዛግራ እምናስ ባርክ አማነፌ ባሶ ዙቴሬ ሀርንባሲክ ቦርእቤሲስ ፋክያኖን ዳኖነክዋ። ሀኦስ ኤስ ባሮን ዛግናስ ፋኪባሲክ ዜሞቲ ዛግቴ ቦርኣሶን ኬኡኖይ ቤይናስ ባሪ ፉቶኒ ማጝሱኒ ካርኣሶን አምማኖን ኪሲራ ቤሱናክዋ። ሀን ነያሲክ ደይ ሀኦ ቴትባሲክ ኦኮ ስንባሶን ቤስናስ የሱስ ክርስቶስኒክ አማነፌ ባሶትን ዙትራ ኦኮ ዛጉባሲክዋ። 27 ኤኪን ቴቶኒ ዉዝኒ ፋሮሶ? እሳ ዉዛክኑ ቴቶኒክ ኣፋዋ ችማኒዉዛ። ቴቶ ቤያኒስ አዉኒ ቦርአንሶ? ሙሴኒ ቱማሶን ዛግፌኒ ቦርአኖሶ? እንዳነዋ። ስኑንታኖ አማንቶሲክዋ። 28 ኤስ ባሪ ቦርኣ ሀኦስ አሱ ኦኮ ስናናክ ዛግፋናስ ባሪ ቱማስ አጃጅኖን ዛግና ቦርአ ስኖይናሮን አማንቶክ ስንባሶንቱ ያዳቴፌንዋ። 29 ወደይ ሀኦስ አይሁድኒ ሜኒር ኮእባኖሶ? አዛብኒ ሜያክ ደይ ሀኦታኖሶ? ፉቶሲክ አዛብኒ ሜያክ ደይ ሀኦዋ። 30 ሀኦስ እሳርዋ፤ አይሁድኒ ሜያኖን ስኑን አዛብኒ ሜያኖን አማንቶሲክ ኦኮ ዛጉኒስ ደይ ባርዋ። 31 ኤኪን አማንቶኒ ቦርአ ቱማሶን ሻሮኒር ኡኖሶ? እንዳነዋ፤ ማእሲራ ዛግራቱ ኦዳንዋ።