1 Zigimoosta di basa hoi'ta kushuussi siruknawa tukakna tichcho naafun maatamak kulufto birannani birto matsafa biin.

2 Isa hugnaba faana Ha'oosi wosiya akama kaamak: «Maatamaason gachanaknawa birannani birto matsafaason wowanakna sholsinaas oonso?» yit awasifen biin. 3 Sinuntano samak sinun daasta wedey daasi sikalosi birannani birto matsafaason gachanaknawa sikalobaason biyanakna chimar oonu aafe. 4 Birannani birto matsafaason wowanaknawa siruk fa baron biyanakna sholsinar besto beyna boor'a akamanon waasin. 5 Es kabaasik kur'uni meyaassin isar: «Waasutaatawa; Yuudani zalaassin sina Dawitni koontoosi tuzasin kesa eetoos merewa; bar birannani birto matsafaasonnawa naafun maatamasikitononna gachanak chimarwa» yi. Birannani birto matsafa

6 Esseen orfo zigimoostanawa acheech kaabarere wuzaasikitoni ganeyaassi dey kur'uni meeni ganeyasi dey shukto fantune feer yerefeen biin; es fantuus naafun kalabanawa naafun aafbana faar; es barikito daa zuuttambaase asiista wostera hama Ha'oni naafun ayyanaasikitowa. 7 Fantuus yeere zigimoosta di bari hoi'ta kushuussin birannani birto matsafaason ephi. 8 Birannani birto matsafaason ephfena kabaasik acheech kaabarere wuzaasikitonewa hepasire acheechche kur'uni meena fantuusa sina sinbesiisik gandesete; isarbesi isarbesiis kushubesiissi kama ephere feeseter; esiisimato kortoni meeni shiipho sina ixana kiichchefana warqeni kirqiddaason ephere feeseter. 9 Ora gaamak ekka yit gaamesete:

«Harinneesik asteseriisikitosin;

wolumtefa noonosikitosin;

keena keenaassin, dara daraasasin;

asuni meyanon Ha'oosik furotak ne shukteta boor'a;

Birannani birto matsafaason ephataknawa;

Maatamaasikitonon gachatakna sholsinar sintiwa.

10 Ha'oniisi taatoni maagni meya sinonek zagit;

han daastak dey taattosone.»

11 Estan dey biina zigimoosewa kaabarere wuzaase dey kur'uni meeni biratoosta showo Ha'oni wosini kaama oden; showobesiis dey akama kumaknawa akama miliyonikna faadtonir. 12 Akama kaamak:

«Shukte fantuus;

Hugna, otma, techma, chima;

arkitto, ulfinnewa galatne;

ephphatoonak sholsuwa» yisete.

13 Den samaknawa han daastakna; daasi sikalosinawa baariissina fa testoos zuuttera:

«Zigimoosta di bariknawa fantuusikna

galata, arkitto, ulfinnewa hugnane;

koi'baneen koi'ba foontonon sinun»

yisefeen oden.

14 Acheech kaabarere wuzaasikito dey: «Aamin!» yisete. Hepasire acheechche kur'uni meya dey sinbesiisik kaa'nere sagadesete.