Nlir aEzikyel 21

Ndokchi aYawe

1 Te uYawe là nnap ká̱ mi pa̱, 2 <<Á ya anəm, dər asa̱l aUrushelima na u là nnap ka̱ apal oga atak awuwop ayə́ryər, kang ɓù là anung ka̱ apambin aIsa̱rila. 3 Là nnap ká̱ mbin aIsa̱rila, là pa̱, <Mmami, uYawe kà̱ mmən ìkum ka̱ ɓu. Mi tur ndokchi mi ka̱ ashe avakchi, mi gbá̱ng onəm onəna̱n ka̱ onəm oɓá̱ngɓa̱ng pa̱ kpaktak ka̱ ashe ɓu. 4 Ka̱kul pa̱ mi ga ngbá̱ng onəm onəna̱n ka̱ oɓá̱ngɓa̱ng, te ndokchi mi i fa ka̱ ashe avakchi wò i gbá̱ng nkpaktak onəm i ɓàn ka̱ asa̱l nkwandal i ga i chu asa̱l mpal. 5 Kang nkpaktak onəm i nyi pa̱ mmami na uYawe. N tur ndokchi mi ka̱ ashe avakchivakchi, i le ka̱ ashe avakchi va̱ ta lap ka̱t.>

6 <<Mmaɓu, á ya anəm, shìn ká̱ nlak ìgwak pa̱ gənggəng, kang ɓù nyám nlak ìgwak ɓu pa̱ gənggəng kà̱ mpyal oza̱. 7 Kang a yà pa̱ oza̱ ɓəp ɓu pa̱, <Iza̱ nak kang ɓu shìn yà?> Te wa là ôza̱ pa̱, ka̱kul iya̱m va̱ ka̱ ngga nfa á. Awalang va̱ i fa te nza̱ ìgwak nggo i rusok, oga awó pa̱ kpaktak i lang ìkam, aruhu á danggo i kú, irəng á danggo i rusok wa ndəng. Dər, nɗaktak va̱ ta ka̱ ngga nfa. Mmami, uNəm uga nzhi uYawe, n là.>>

8 UYawe là nnàp ká̱ mi pa̱, 9 <<Á ya anəm, là anung pa̱, Inan là pa̱,

<< <Ndokchi, ndokchi, mmá lulwa,

kang mmá gbəgbàk kpa.

10 Mma lwa na ka̱kul mpà,

mmá gbàk na á məlam pa̱ yələkyələk wa aməlam.

Í nəm nchang izər ɗò?

Ka̱kul ó yəyang ká̱ nka̱m ichən.

11 Mmá na ndokchi va̱ ta pa̱ mmá gbàk, na mmá kpán ka̱ awó.

Mmá lwa na, mmá gbàk na ka̱kul nna ka̱ ashe awó anəm uga ngba̱l unəm.

12 Yə́ng, nə́m ìwar, á ya anəm, ka̱kul ndokchi va̱ ta i yà ka̱ apal onəm mi,

i yà ka̱ apal nkpaktak ovan ponzhi oga aIsa̱rila.

Mmá na oza̱ chit ká̱ onəm mi n̂dokchi va̱ ta.

Ka̱kul nva̱ ta te lə̀p ìsong.

13 << <Mmami kà̱ mma onəm mi. Unəm uga nɗəɗa̱t uwa yà ɗò? Unəm uga nzhi uYawe, à là.>

14 <<Ka̱kul nva̱ ta te, á ya anəm, là anung, lə̀p awó ɓu,

yənggət ndokchi nva̱ng pa̱ mparəm, ka̱t te pa̱ nshatɗing.

Ndokchi ka̱kul ngbá̱ng onəm oɓá̱ngɓa̱ng.

Ndokchi ngga ngbá̱ng onəm pa̱ makmak. I gáng oza̱.

15 I nak ìchəgwak i lə̀p oza̱, kang pa̱ makmak i nə́m ifàng.

Kà̱ nkpaktak oga anung nkəlang oza̱ n na ndokchi mməlamməlam,

mmá nəm na məlam,

ka̱kul ngbá̱ng irirì.

16 Ndokchi va̱ ta i kyen atak kà̱ nri, i ga̱ɓa̱n mpa̱m,

ká̱ nkpaktak ìsu va̱ asa̱l awúwu i ga̱ɓa̱n kà̱.

17 Mi nə́m awó mi kpa, mi nyám mmən ìkum mi lap ka̱t.

Mmami, uYawe, n là.>>

18 Te uYawe là nnap ká̱ mi kà̱ɗi pa̱, 19 <<Mmaɓu, á ya anəm, nyám asa̱l pa̱ parəm va ndokchi aponzhi oga aBabel i wòl kà̱. Nkpaktak oza̱ pa̱ oparəm i fa kà̱ mbin nzəngtəng. Nyám atak kà̱ nggwang asa̱l á ga asa̱l ìtong. 20 Nyám asa̱l n̂dokchi va̱ ta aga ngga aRaba oAmoni, ka̱ asa̱l aga ngga aYahuda, ka̱ aUrushelima ìtong iga akamsəlang. 21 Ka̱kul uponzhi oga aBabel uwa kà̱ nta̱l kà̱ nchak asa̱l, ka̱ atak va̱ asa̱l ɓa chak pa̱ parəm á, uza̱ ka̱ nva̱k iva̱k, ka̱ yənggət iwar, i mwo ichən ka̱ atak ichər, uza̱ ka̱ ndər ka̱ ashe ani iya̱m nkang iga nshì. 22 Ka̱ awúwo ari te iva̱k kà̱ nnyám aUrushelima. Uza̱ i pak oga anung akun ka̱kul nshin akamsəlang, uza̱ i nə́m achu ìkum ka̱kul ngbá̱ng irirì, i pak oga anung akun ka̱kul nshin oga anung nkəlang, uza̱ i ɓut mbin pa̱ na ô me atak nkén akamsəlang ka̱kul ìkum. 23 Ka̱ atak oga aUrushelima te iva̱k va̱ ta̱ akwam kà̱ mpyal oza̱, ka̱kul oza̱ ka̱ sóng anung ûponzhi oga aBabel chit, te uza̱ i rəng ká̱ mpat oza̱ ôza, na á nak mmá kpán oza̱.

24 <<Ka̱kul nva̱ ta te, uNəm uga nzhi uYawe là pa̱, ka̱kul ó nak chit mmá rəng ká̱ oga mpat wó, kang ó nyám nnap mɓá̱ngɓa̱ng wó fa chit kà̱ mbáng, ka̱ ashe nkpaktak nnap nnəm wó, á nyám oga mpat wó chit, ka̱kul ó nak chit mmá rəng ká̱ oga mpat wó, te mí wur wó ó ga izwàl.

25 <<Kang mmaɓu, uponzhi uga aIsa̱rila, uɓá̱ngɓa̱ng, uga nlang nnandər, ìlum ɓu ɓa rwam chit, ka̱kul awalang aga nnáp akwali ɓu á nəm chit. 26 Mmami, uNəm uga nzhi uYawe, n là pa̱ ú tur iya̱m ishi ɓu ká̱ atagya iponzhi ɓu. Oga iya̱m i yà wa mmatmat lap ka̱t. Mí rup ká̱ uva̱ mmá yen ká̱, kang mí yen ká̱ uva̱ mmá rup ká̱. 27 Nzhì, nzhì, mi zhì ìtong va̱ ta, mi re iya̱m iro ka̱t. Ya uga iya̱m i ɓa kang, uva i nap akwali, nna chit te mi na á na ɗak.>>

Mpà akwali ka̱ apal aAmon ká̱ aBabel

28 Kang mmaɓu, á ya anəm, là anung pa̱, iya̱m va ta̱ uNəm uga nzhi uYawe là ka̱ apal oga aAmon, kang ka̱ apal nlang ìwuswa oza̱, va̱ nna oza̱ pwat onəm mi á.

Te ɓu là pa̱, mmá tur ndokchi ka̱kul ngbá̱ng onəm,

mmá gbàk na məlam wa aməlam ka̱kul ngba̱l irirì.

29 Là ôza̱ pa̱, oza̱ ya oga alár aga akwam,

kang oza̱ i nəm iva̱k iga akwam.

Te mi nak ndokchi mi ka̱ apal ìshak onəm oɓá̱ngɓa̱ng va̱ mí pà, ova̱ ìlum oza̱ chu chit.

Iva ta̱ nna ji ka̱ ashe mɓək anung oza̱.

30 <<Le ka̱ ndokchi ɓu ka̱ ashe avakchivakchi.

Mi náp akwali á ɓu ka̱ atak va mmá mar ɓu kà̱,

ka̱ ashe mbin ɓu.

31 Mi fə́r ká̱ mmən ìkum mi ka̱ apal ɓu.

Mi ɓur apər nfə́l ìgwak mi á ɓu,

kang mi na ɓu ka̱ ashe awó onəm oɓá̱ngɓa̱ng,

oga nnyi nzhì.

32 Ɓu nyáng akun apər.

Nchə̀r ɓu i yà kà̱ ìshimshe mbin.

Mí yà ká̱ nrəng ká̱ ɓu lap ka̱t.

Mmami, uYawe, n là.>>