Nlir aZakariya 2

Alár Asang aga mmàl Atak

1 N dər apal kà̱ɗi te, n ya unəm sat ka̱ asang aga mmàl atak ka̱ awo wò. 2 Te n ɓəp pa̱, <<Ɓu ga che yà?>> Te á ma̱n á mi pa̱, <<Mmami ka̱ ngga mmàl na n dər mbal aUrushelima ka̱ ngwuwang.>>

3 Á gba̱ng nva̱ng ka̱t te, uma̱leka va̱ ka̱ yà ka̱ nlà nnàp ká̱ mi te, á re atak mi pa̱ na o gwang uma̱leka uro va ka̱ mɓa atətak à. 4 Kang uma̱leka va̱ ta là á na pa̱, <<Chəchir ga ɓu là uyenza̱m va̱ cho ka̱ asang pa̱, <Nggatək onəm ka̱ iya̱m nkang va̱ i ga ǹya ka̱ aUrushelima te mɓwaka̱n ka̱t. Ka̱kul nva̱ ta te, mí chu nggəgang ka̱ aka̱msəlang ka̱t. 5 UYawe là pa̱, Mi yà aka̱msəlang apər va i gang na pa̱ kpaktak,> kang mi təm ka̱ ichumchum mi ka̱ ashishe.>>

Ma wór Onəm ga ngga Izwal pa̱ uza̱ à le Nzhi

6 UYawe là pa̱, <<O wong o ching o ɓa, o re mbin ngga mpal ka̱kul n lyangshin wo chit ka̱ ashe mbín pa̱ ɗongɗong.>> 7 Re o ching o ɓa aUrushelima , mmawó va̱ o təm izwal ka̱ ashe mbin aBabel a. 8 UYawe uga nggatək là pa̱, <<Ka̱kul ichumchum mi te, uza̱ re mi ka̱ ǹre ka̱ atak mbín va̱ vyat wo. Uza̱ là pa̱, unəm va pa̱ kpaktak dok wo te, ya uza̱ dok ipir iwu wò. 9 Mi ga nnak awo mi ka̱ apal oza̱, ozwal oza̱ i vyat oza̱ i na idumdùm oza̱.>> Nna chit te, o nyi pa̱ uYawe uga nggatək à re mi.

10 UYawe là pa̱, <<Ónəm oga aUrushelima , re o shì nnap-nshì ka̱ nchang ìgwak ka̱kul mi ga mɓa ntəm nzəng ká̱ wo.>> 11 Ka̱ ilum va̱ ta te, onəm oga apambin pa̱ makmak i gwang ishi oza̱ ka̱ uYawe, oza̱ i yà onənəm, te uza̱ i təm ka̱ ashe oza̱, kang o nyi pa̱ uYawe uga nggatək à re mi ka̱ atak wo. 12 UYawe i wur iya̱nkúp ka̱ mbin oYahudi va ka̱ ashe mbin nnəna̱n i ya njiwo, kang i yak aUrushelima kà̱ɗi i sat oga ítong wo ìgorgor. 13 Re nkpaktak onəm á má̱ng pa̱ kwák ka̱ mpyal aYawe, ka̱kul uza̱ wong chit ka̱ atak ntəm wò nnəna̱n.