1 Nnap nlà aYawe uga nggatək ɓa atak mi pa̱, 2 <<Mmami ka̱ ìkpar ka̱ apal aSiyona, ìkpar imakmak, ìkpar iga nshì ìgwak.

3 Mi le aSiyona, mi təm ka̱ ashe aUrushelima , te mí wór aUrushelima pa̱ oga ítong iga nnandər, kang <Aɓam aYawe uga nggatək> nnyi te mí wór pa̱, <Aɓam ayə́ryər.> >>

4 UYawe uga nggatək là pa̱, <<Onəm gbakgbàk ká̱ ochar dúngdung va̱ i chen ká̱ ídari ka̱kul mmák nra oza̱ te, i ga ntəm ka̱ oga ágəntəng aUrushelima kà̱ɗi . 5 Kang ovanza̱m ká̱ ovan ɓyen i yə́l oga ágəntəng aga oga ítong ata i nəm nsal ka̱ ashishe.

6 UYawe uga nggatək là pa̱, <<A yà pa̱ á yà iya̱m iga nɗaktak ka̱ atak aɓo onəm ata̱ ka̱ ashe oga nra va̱ ta te, i ga ǹyà iya̱m iga nɗaktak na ka̱ atak mi kpa ɗò?>>

7 UYawe uga nggatək là pa̱, <<Mmami kà̱ ngga nfa ká̱ onəm mi ka̱ mbín ngga asa̱l awu alum ká̱ ngga asa̱l ntar alum. 8 Kang mi ɓa ká̱ oza̱ i təm ka̱ ashe aUrushelima , oza̱ i yà onəm mi, kang mi yà Inan oza̱ ka̱ ashe nnəm nnandər ká̱ inəna̱n.>>

9 UYawe uga nggatək là pa̱, <<Igwak akam wo, mmawó va̱ ǹyangmata̱ ka̱ nfe oga nnap-nlà va onəm oga nlà ìchu Inan ka̱ là ka̱ ashe oga nra va̱ cho, ya mmá kà̱ mbang akum mme nzhi aYawe kà̱ɗi . 10 Kang nra va̱ ta ì chu te, amwa yà ka̱kul onəm ká̱ oga iya̱m nkang ka̱t. Unəm va̱ fa agbai ká̱ unəm va̱ tar ashe te, nra ìgwak yà á na ka̱ atak ánəm uga nkpàng na ka̱t, ka̱kul n nak nza̱ unəm nggo yáng uwangwò. 11 Kang ǹyangmata̱ te, mi yà ka̱ nnəm ìɓà̱ng aɓo onəm mi wa nva̱ ka̱ n nəm oza̱ lap ka̱t,>> uYawe uga nggatək à là.

12 Oza̱ i suk iya̱m oza̱ ka̱ ashe ikángkáng, ìba̱ngba̱ng i ga nna awár, mbin i na iya̱m-nrì, apaɓur i na ìmimyang. Mi nak aɓo onəm mí wur iya̱nkup ká̱ nkpaktak oga iya̱m va̱ ta̱. 13 Á nzhi aYahudi ka̱ ulsa̱rila, ka̱ o yà onəm ovyapvyap ka̱ ashe mbín, mi ga nka̱mshi wo kang mi nak o tong onəm oga nnap nnəna̱n, kang ayər a nəm wo ka̱t, re ìgwak á kam wo.

14 UYawe uga nggatək là pa̱, <<Wa nva n yar pa̱ mi ɓa ká̱ nɗaktak ka̱ apal wo, nva̱ okəka wo nak ìgwak mi lak te n re ka̱t. 15 Wa nnà ta kpa ka̱ ashe nra ata̱ n yar chit pa̱ mi ga nnəm iya̱m inəna̱n aUrushelima ká̱ nzhi aYahudi, kang ayər a nəm wo ka̱t. 16 ká̱ nnà te, iya̱m va ta̱ nkpak pa̱ o nəm, o là nnandər ńza̱ uwangwo nggo, o nyám nnandər ká̱ nnáp akwali aga nnandər ka̱ ashe nzhi akwali wo, ka̱kul ntəm ikángkáng. 17 Kang o ran iya̱m inga ka̱ apal a nza̱ uwangwo nggo ka̱t, kang o ma̱n nsóng anung ka̱ apal akwam ka̱t. Ka̱kul n yang nkpaktak oga iya̱m va̱ ta̱,>> uYawe à là.

18 Nnap nlà aYawe uga nggatək ɓa atak mi kà̱ɗi pa̱, 19 <<Oga nnap nnəm ngga ǹyar ndeng ngba̱l ngga apye aga neɗing, ká̱ aga atukun, ká̱ aga afangshat, ká̱ aga agba̱pchi te, oza̱ i yà awalang aga nchang izər ká̱ nchang ìgwak ka̱kul nzhi àYahudi. Ka̱kul nva̱ ta te, o ma̱n nnandər ká̱ ntəm ikángkáng.>>

20 UYawe uga nggatək là kà̱ɗi pa̱, <<Awalang nna kà̱ mɓa va onəm i fa kà̱ ítong pa̱ ɗongɗong i ɓa aUrushelima . 21 Onəm oga ítong iro i wong i ga íro i là oza̱ pa̱, <Re i ga mpyal aYawe pa̱ kəlak na i chal nnap nnəna̱n aYawe uga nggatək. Mmami kà̱ ngga.> 22 Kang onəm pa̱ makmak ká̱ mbín nkánkám i ɓa ngwop uYawe uga nggatək ka̱ aUrushelima, na o chal nnap nnəna̱nnəna̱n.>>

23 UYawe uga nggatək là pa̱, <<Ka̱ ashe oga nra va̱ ta te, onəm pa̱ ogba̱pchi ka̱ ashe oga achu oga mbín i kpán unəm oYahudi kà̱ ilùkwan i là pa̱, <Re i ga ká̱ ɓu ka̱kul i fe pa̱, Inan ya yà nzəng ká̱ wo.> >>