1 Askávai vanainaói. "Askárasĩ mato ẽ yoãshoáro txipo anõ mã iyamamísi iinã mato ẽ yoãshoávere. 2 Sinagoga shovõsho mato poshakõkatsavo. Askávaíki neská ivo shavá nokóki yora wetsã mato yamamashõ chinãki ‘Yové Koĩni chinãnevísi nõ ikí’, ikatsaivo. 3 Atõ askáro ẽ papa oĩma, ea oĩma akásho atõ ikí ikatsai. 4 Neskái ẽ vanaro aaivo shavá nokómaĩnõ anosho ‘aská akĩ noke vevo tanamachĩtserã?’ ikĩ mã chinãnõ iinã mato ẽ yoãshoávere. Akĩvísi mato ẽ yoãshoáma ichĩro ‘matonĩse ẽ niátserã?’ iinã ea mato yoãshoáma ichĩa.

5 Ramaro ea yonochnayanamã ẽ kakatsi imaĩnõ, wetsã ea nĩkãki ‘ato mĩ kakatsikírkĩ?’ ea mato akámakarkĩ? 6 Askámẽkĩ, neská akĩ mato ẽ yoãshoatõsho mato onísvarãi taíse. 7 Askámẽkĩ neskávere. Ẽ kaavísiro roaka. Ẽ kaamaro mato vesoshokatsayatõ chinãvarãtĩpá. Askámaĩnõ ẽ kaaro aa mato ẽ yonoshokatsai. 8 Ãatõ oshõro neno mai shavapa yorarasĩ anõ itima ivõ atõ imaĩnõ, aaivorasĩ anõ amai, chinã mekika ivorasĩ meramaí, Yové Koĩni yosta ivo shavá chinãmaí, akatsai. 9 Atõ anõ itima ivoro awesáma, ea anõ amísmavosho atõ ikí iinã oĩmakatsai. 10 Atõ chinã mekika ivo, awesáma, ẽ papanamã ẽ kaatxinĩ ea mato oĩoma ikatsai iinã ikí. 11 Askámaĩnõ yosta ivo shaváro awesámásevi, naaivo mai shavapa niaya kakáya Yové Koĩni ‘ẽ yostanõ’, ikĩ ma chinãshoa.

12 Aská mato ẽ yoãshoti vana itãtĩpa ayamẽkĩ mato tenetĩpá rama. 13 Askámaĩnõ Yové anõpa yosĩya ivo oshõro ãatõse anõpa ivo katseki mato imakatsa. Arí ãwẽ yoãnakatsamarívi, ẽ vana katseki ãwẽ nĩkãvaĩvaĩa ivo, ikatsai ivorasĩ aká mato yoãshokatsai. 14 Ẽ yosĩa ivorasĩ teki akĩ mato yoãshokatsai. Anõsho yorã oĩtati ivo ea shovimakatsai. 15 Ẽ papa katsése ayaro enáserívi. Askáshovísi ‘ẽ yosĩa ivorasĩ teki akĩ mato yoãshokatsai’, iinã ẽ ikírvi.

16 Aská aatishõkamase mato ea oĩoma ikatsai. Askávaíki aatishõkamásevi ea mã meraókatsa", ato akĩ.

17 Ãwẽ askái vanamaĩnõ ãwẽ shokõkenavo arímamẽ vanaketanávo. "‘Aatishõkamase mato ea oĩoma ikatsai’, askávai ‘aatishõkamásevi ea mã meraókatsa’, ikí ‘ẽ papanamã ẽ kakatsaisho ẽ ikí’ ioi ãwẽ akánã awesainã ãwẽ ikírkĩ? 18 ‘Aatishõkamase’, ikí askásevi, noke tanamakatá askái ãwẽ vananã", ikívo.

19 Aská akĩ atõ nĩkãtsiki tanainãse vanainaói. "‘Aatishõkamase mato ea oĩoma ikatsai’, askávai ‘aatishõkamásevi ea mã meraókatsa’, ikí nĩkãinã mã vanaketanaa ivoro 20 neskávere nĩkãtsoma. Ẽ ikatsai ivokiri chinãki, naaivo mai shavapa shokoyavorasĩro mekíkatsavo, askámaĩnõ matoro wai ikí mã onískatsa. Askámẽkĩ txipo rona petxĩsho mã metsái shokokatsa. 21 Aĩvo ãwẽ vake pakékatsa shavá omakaĩmaĩnõ isĩ tanamtsãwã, askámaĩnõ ãwẽ vake pakéa tavákemaĩnõro isĩ tanaósma, anõ mekímtsãwã ‘vake ẽ meraai’, iinã. 22 Aská mato mã aa ikítõsevi mã ioi, onísi shokoi. Askámaĩnõ txiporo aská, mato ẽ oĩomaĩnõ, mã mekíkatsa. Aa metsá yora wetsã mato enématĩpa ikatsai. 23 Aatiã shavaparo txipokiri mato ea yokáoma ikatsai. Neskávere nĩkãtsoma, enõsho ẽ papa mã yokáatõsho ãatõ mato inãkatsa. 24 Enõsho mato yokak ikíma ikaikaina. Yokátsoma. Ramaro mato ashõkatsa, mã metsá anose kesonõ iinã.

25 Vevoro tanáki mato ẽ yoãshovaivaina, askámaĩnõ txiporo tanáki mato ea yoãoshoama ikatsai. Aatiãro roaka akĩ ẽ papa mato yoãshonõ. 26 Aatiãro enõsho mã yokákatsa. ‘Eã ẽ papa mato ẽ yokáshokatsai’, iinã ẽ ikíma. 27 Aaro awesáma, aa ẽ papa matomẽ noíka, enõ mã noíkasho ãwẽ ikí, ‘Yové Koĩmẽsho ẽ oá’ ikĩ mã anõ akí aká. 28 Ẽ papamẽsho oí naaivo mai shavapa ẽ nipái oyãtá. Askámaĩnõ, ramaro mai shavapa yorarasĩ eneníi arimẽse ẽ papanamã ẽ iokaĩókatsa", ato akĩ.

29 Ãwẽ askámaĩnõ ãwẽ shokõkenavõ revínívo. "Ramaro tanáokima meki akĩse mĩ yoãmaĩnõ 30 mia nõ tanaai. Katsése aská tanayasho mĩ yoãmaĩnõ wetsã ano ‘awesárá?’ ikĩ nĩkãtĩpá. Askáshovísi ‘Yové Koĩmẽsho oáserívi’, ikĩ mia nõ anõ aka", akávo.

31 Atõ aská akatõsho ato revíníki. "Ramarvi ea mã anõ aka? 32 Askámẽkĩ nĩkãtsoma, mã anõ peás ikatsai shavá omakaĩma, ma nokóai. Matõ shavátikéki erí nitxĩsho ea mã enekatsa. Askámẽkĩ ea eríchtamarívi. Ẽ papã ea peshót asai. 33 Aská akĩ mato ẽ yoãshoáro anõsho mã chinã matsiyai shokonõ iinã mato ẽ yoãshoávere. Naaivo mai shavapashõ mã onís awekatsa, askámẽkĩ rakétaníma shokotsoma. Naa mai shavá ma ẽ viakea", akĩ ato tanamakĩ.