1 "Takevó, matoro Yora Ivo Jesus Cristo Yové naóya ivomẽ txipoya mato. Askásho yora wetsaro anõ noíkaki oĩi, wetsaro anõ noíkimase oĩi atsomároa. 2 Aská akĩse tanánõ. Mã vanai kãtxívaĩanamã, wetsa yoíka, mevĩ osõti ouro ivo sawei, õpo oraka ivo sawei, akaya ivo tachikaĩaitĩ. Wetsa askásevi, onís awei niayaro õpo sheni ichnáse sawesho tachikaĩóaitĩ. 3 Aská oĩinã, yoíka oaya ivomẽ eséyakĩ roakatõ ‘nãatõ tsaótso’, avaikĩ, awe onísi niaya ivoro ‘miãro nishõse oĩtso’, ioiro ‘ea taváse maĩ mĩ tsaóa roase’, mã akatĩ. 4 Mã aská akáro, atõ tanáti tanakoĩmasho veyóse oĩsho ato mã akamarakĩ? Askáro tanáti roa ivo toĩsho mã ikímarívi. 5 Neská nĩkãtsoma. Naaivo mai shavapashõ yorarasĩni oĩro onís aweyavorasĩrvi, askámaĩnõ atotsikĩ Yové Koĩni kavẽanã. Anõ txiposho atõ shokomaĩnõro, roapa ivo ato ashõyarvi. ‘Kakáyai nishõ ẽ ato vesoa oĩkatsavo’, ikĩ tavámatima ivo vana ato ashõti, anõ noíyavo yoí. 6 Askámẽkĩ matõro awe onísiyavorasĩ mato ichnamtsãwa. Awesái mã ikíra? Yora mãaimai shokoya kakáya ivorasĩnivísikatá, mato ati akayavonã. Anõ kakáyatõ yora meki akánamã mato aki ashõ yonokõmtsãwasevikatá. 7 Jesuski vanaomtsãwavósevi, mã anõ txirísho shokoa ivomẽ.

8 Matxi niaya kakáyatõ eneshoti esé ivoro neská. ‘Mirí mĩ vesótatõsevi ikí wetsamẽ mĩ noíti’, ikí vana neeti. Aaivo anõ ashõ mã shokoro roaka. 9 Askámẽkĩ aská ẽ ikitĩ, wetsa noíkaki oĩi, wetsaro noíkimase oĩi mã akáro, anõ itimatõ ikĩ esé mã tavámáarvi. 10 Aaro awesáma, yora eséyãwa niámẽkĩ, Yové Koĩni Moisés eneshoti esé vana ivo wetsachta kanero neská, keyokíse tavámakãorívi. 11 ‘Aĩyashõ wetsã aĩ meetima. Veneyashõ vene wetsa oĩtima’, ikí Yové Koĩ vanati, chinãtso. Aská ‘yora ati akĩ yamamatima’, ikí vanaóyarvi. Askásho aĩyashõ wetsã aĩ meei, iokiro veneyashõ vene wetsa oĩi akíma mã shokoasmẽkĩ, yora ati akĩ mã yamamáro, esé tavámaorívi. 12 Neská chinãtsoma, keyókaĩa shavapa, Yové Koĩniro ãwẽ vana veí pashamaya ivokiri oĩsho, ‘nĩkãsho mĩ nikaikaina. Miaro ari nĩkãyamai mĩ nikaikaina’, ikĩ ato chinãshokatsai. Askásho aaivokiri chinãsho roai yoranĩ vanai, roa akĩ ato oĩi atsoma. 13 Aaivo keyókaĩa shavapa askásevi, yora onis akíma niaya ivoro yostaki isĩpa akatsai. Askámaĩnõ ato onis akí niaya ivoro, yostátáma ikatsai", iinã ẽ ikí.

14 "Askámaĩnõ wetsaro, yora ‘earo Jesus anõ akí ẽ niá’, ikiyasmẽkĩ ãwẽ yonoatõ ikí nimísma ivonã ãwẽ roasetirá? Askátõ vanayai nishõ awetima ikitáinã ã itirá mã chinãnã? 15 Neská akĩse tanánõ. Matõ take wetsa õpoma, pitima aká ãwẽ nimaĩnõ 16 mato wetsãse yoãshokĩ ‘ase katãtso. Õpo anõ shanati sawei, yanii ashõ mĩ nitikĩ irawẽ’, mã akámẽkĩ ãwẽ anõ mãa ivorasĩni mã onis akámaro, yamã mã ikírvi. 17 Aská keskásevitsikĩ. ‘Jesus anõ akí ẽ niá’, ikiyasmẽkĩ ãwẽ yonoatõ ikí nimísma ivoro chinãsho niárvi.

18 Askámaĩnõ yora wetsã chinãro neská. ‘Yové Koĩni pashamakatsairo neská. Wetsa Jesus ãwẽ chinãnechtase anõ akí nii, akayaro kakatsai. Wetsa askásevi, ãwẽ yonoatõ ikí nii akaya iokaĩókatsasevi, avévakĩa’, imíska. Askámaĩnõ eãpaĩkoro neská akĩ ẽ revíkeãai. ‘Aská akĩ mĩ yoã askákémaro. Neská nĩkãtso. Jesus ãwẽ chinãnechtase anõ akí nismẽinã, ãwẽ yonoa ivo ashõimai nimaĩnõro Yové Koĩni pashamatĩpá. Anõ akí nishõro, ashõtirívi’, ikĩ ẽ revíkeãai. 19 Anoshóse neská akĩ ẽ yoãoshokenkeãai. ‘Yové Koĩ westíkase niá’, ikĩ chinãnechtase mĩ anõ akárá? Ii, askámẽkĩ yochĩ ichnárasĩnivísi, atõ chinãnechtase anõ aosmẽinã rakéshoi tari iki shokovokatá. 20 Tanamavísi mia. Jesus mĩ chinãnechtase anõ akí nismẽinã, ãwẽ yonoa ivo ashõimai mĩ niáro, chinãsho mĩ niárvi.

21 Neská akĩse tanáonõ. Nokẽ sheniwetsa Abraãone, ãwẽ vake Isaque anõ maki ati tapõ rakãnímaĩnõ, Yové Koĩni ‘aaro chinã mekikará’, ikĩ chinãsho oĩti, ãwẽ ati ivomẽsho. 22 Askásho ãwẽ chinãne tanai, ãwẽ yonoarasĩ anõ akí avévakĩti, Abraãone. Ãatõ ãwẽ akárasĩmẽsho ‘anõserívi’, ikĩ Yové Koĩ oĩmati. 23 Vana aská neea ivo nokóti. ‘Abraãone Yové Koĩ anõ akatõsho, yora chinã mekika oĩti’, ikí. ‘Yové Koĩnĩ takéa’, ikí anéoti. 24 Askáinã ẽ ikítsikĩ, Yové Koĩni yora chinã meki oĩro ‘Jesus ẽ chinãnechtase anõ akí ẽ niá’, ikí ivomẽchtasho ikímarívi. Roapa ivo ãwẽ ashõamẽsho aská akĩ ãwẽ oĩrívi.

25 Raabe askáseviti. Aaro vesãkara shavo Jericónamã ãwẽ rakámaĩnõ, Israel yorarasĩ ãwẽ mainamã yosívaĩsho ‘mai nõ verõ anõ’, ikĩ chinãinã tachivaĩaivotĩ. Askái vemaĩnõvo, ãwẽ shovõ ato kawivarãsho, aaparasĩni ato atxikatsiimaĩnõ, ato pashamavaikĩ, vai wetsã roaka akĩ ato yonoti. Ãwẽ aská akamẽsho Yové Koĩni yora chinã meki oĩotísevi, Raabero. 26 Askásho yora chinã yamaro vopiyarvi, chinãtso. Aská keskásevi, yora Jesus ãwẽ chinãnechtase anõ akí nismẽinã, ãwẽ yonoa ivo ashõsma ivoro", ẽ akenkeãai.