1 "Mã shokosa? Earo Tiagovere, Yové Koĩni nitxĩa, Yora Ivo Jesus Cristõ nitxĩa ivo yora aká. Naa wicháro matonávere, Israẽl vake 12 ivomẽsho revoa ivo, Jesusmẽ txipoi shokoya, maitioi peás ishõ shokoyavorasĩná.

2 Ase takevó, ichnárasĩ õsi õsipa oĩsmẽinã metsápai shokotsoma. 3 Aaro awesáma, ichnárasĩ tanai shokosmẽinã, ‘Yové Koĩmẽ txipotashõ enékawãtĩpá’, ikĩ noke chinãya. 4 Askásho enétĩpa ivo chinã keyá atsoma. Mã aská akáro, mã tsasikatsa, Yové Koĩni mato chinãshoa ivorasĩni mãaimai mã shokokatsa aká.

5 Askávai mato wetsase ‘ea yosímarvi, ẽ yosíkoĩkanõ’, ikĩ chinãinãro, Yové Koĩ mã ãtsã ati. Aa ivõ pãté imísma, vatxin imísma aká. Mã ãtsã aka ivorasĩ mato ashõkatsa. 6 Askámaĩnõ, aská akĩ ãtsã avaikĩ anõ atsoma. ‘Ea ashõkatsarmẽ, ea ashõtĩpará’, itsomároa. Yora aská akĩ chinãyaro waka niwẽ shovi aká ãwẽ reshkérasĩ tanatĩpai rakáa keskásho ikí. 7 Aská akĩ chinãi niaya ivoro ‘Yora Ivõ ea ashõkatsa’, ikĩ chinãtĩpá. 8 Chinã ravéya, westíse verõ ashõ meesma aká.

9 Askávaíse wetsaro, Jesustxõya ivorasĩní, onís awei shokoi, yorã ari oĩtanáma mã akásmẽkĩ aakiri chinãtima, mekípakĩka chinãsho shokotsoma. Aaro awesáma, Yové Koĩniro yora roapa akátõ akĩ matomẽ eséyaai. 10 Askámaĩnõ yora mãaimai niaya kakáya* ivoro Yové Koĩni ravĩ awemasmẽkĩ mekíi niti. Wai matxi vimi oarasĩ tsoívaĩi ikítõ ikí makisho niokatsa. 11 Vari tachiináki mestẽináki ãwẽ shanã vaná oa roaka, yoíka ivorasĩ keyoki ãwẽ pei menoatõ ikísevi, aaivo yorarasĩ mee ishõ keyókatsavo", iinã mato ẽ aká.

12 "Askái, ichnárasĩ oĩsmẽinã ‘Jesustxõiro ea enétĩpá’, ikĩ chinãya ivoro Yové Koĩni roapa ivo ashõya. Ãwẽ askái niá oĩinã awetimakĩ nitxĩkatsa. Ãatõ tavámatima ivõ ikí ato ãwẽ vana ati, anõ noípa ivorasĩ yoí.

13 Askámaĩnõ, noke anõ itimatõ ikatsiinã ‘Ii, Yové Koĩni ea yomẽ ashõrívi’, ikĩ chinãtimarvi. Yové Koĩro yora ãwẽ yomẽ ashõa yamarvi, arí anõ itimatõ iokatsi imísmarvi aká. 14 Noke yorarasĩ anõ itimatõ ikatsiinãro noke kẽeyãwasho, nokẽ chinã naki ichná tsaósho, yorã akátõ akĩ noke parãsho ichnák pakeya. 15 Askátõ kẽei nõ tapisro, kawásho, anõ itimatõ noke iyakemíska. Aaivo chinãyai nõ kaniro noke veí akaya. 16 Askásho marí parãnai shokotsomároa. 17 Katsése roapa ivorasĩ nõ anõ ikíro, naĩsho veá ivorvi, nokẽ papa Yové Koĩnamãsho. Aaro naĩ naóya ivorasĩ shovimayãtáya. Askámẽkĩ atõ naó ikítõ ikí tekísma, Yové Koĩni chinãro. 18 Askávaíki, ãwẽ anõpa ivo vanamẽsho ãwẽ vake ayakekĩ noke ãwẽ shovimati. Awe wetsarasĩ keskáma, noke ãwẽ shovimaáro yoraro roapa ivo ave shokonõvo iinã noke ãwẽ ati", iinã ẽ ikívere.

19 "Askámaĩnõ matomẽ ẽ noíatõ neskátõ ẽ vanaavere, tanatsoma. Matsíshopari nĩkãtsoma. Ikívisi vananíma, ichnákémasevi atsoma. 20 Chinã ichnákesho nõ shokoro Yové Koĩni chinã mekika ivõ ishõ noke shokotĩpá. 21 Askásho katsése tanaimai mã anõ ikívorasĩro enetsoma. Marí ravítáimai shokosho Yové Koĩni vana matõ chinãnamã ãwẽ tsaõa ivo anõ atsoma. Aavisirívi mato shavá amaya.

22 Aaivo vana askásevi, nĩkãkastsomároa. Anõ ikí shokotsoma. Pãtxõkase nĩkãsho mã shokoro maríse mã parãnarívi. 23 Aská vana nĩkãsmẽinã anõ ayamai niayaro yora veístĩsho arí oĩnavai 24 kashõ ‘aská ẽ oĩnáitserã’, imísmarvi, inói petxisma. 25 Askámaĩnõ Yové Koĩni esé ichnáma, veí pashamaya ivo toĩyaro neská. Aaivo esé toĩsho, anõ petxitaníma ã nimaĩnõro, ãatõ roapa ivo ashõmtsãwa.

26 Askávaíse, yora ‘eavisi Yové Koĩni vanã eséyairívi’, ikí vanayasmẽkĩ arí ãwẽ vana atxikésma ivoro, arí parãnai niá. Yamã ãwẽ esé ikírvi. 27 Askámaĩnõ esé koĩ, nokẽ Papa Yové Koĩni roa aka ivoro neská. Vake maõrasĩ ato vesoi, aĩvo mekẽyavorasĩ vesoi, naaivo mai shavapa ichnárasĩ ivõ ‘aa keskákemísi’, iinã vesótái ati", iinã mato ẽ aká.