1 Aská txipo, Jerusalémnamãsho judeurasĩ atõ saí imaĩnõ Jesus oĩnõ iinã kaí. 2 Ano Jerusalém naki "Txivõ Ikoti", atõ aká ivonamã orakama waka rakáa, Hebraicõ akáro "Betesda."*5.2 Ane wetsaro Betsaida. Ano paró repã ikitáya 4 iyaketã, naki shatévakĩa. 3 Aská ano isĩ teneyavo kãtxía, veshoyavorasĩ, txãtorasĩ, ma nii enéyavo aká.*5.3 Gregõ vana wetsã teki akĩ wicharo "wakapasha tsĩki ikí manávo", ikí neea. 4 [Askái askatase ano õo õmamẽkĩ, yonótaya yovepa, okĩ aaivo waka tsĩki amíska. Tsĩki ivai ãwẽ enépakémaĩnõ, isĩ teneya wetsase, aapari naki ãwẽ pakékaĩáse, roamtsãwã].*5.4 Naaivo versículonamã, Gregõ vana wetsa teki akĩ wichama itivo, venápáro aya.

5 Aská ano isĩ teneya wetsa ramama ãwẽ rakáináti, 38 vari. 6 Askánamãsho Jesusnẽ vari aatíi isĩ tanai ãwẽ rakáa onãtakĩ oĩinã meratachísho, "mia roakatsiraí?" ãwẽ akátõsho, 7 "Yora Ivó, ẽ roakatsikísmẽkĩ tsoãkata ea ewevaĩkĩ, waka tsĩki imaĩnõ? Ãwẽ tsĩki imaĩnõ kakatsiinã ẽ atimamaĩnõse wetsarasĩni vevo para ivaĩki ea mashkãvaĩvaĩvo", akĩ.

8 Ãwẽ aská akatõsho Jesusnẽ "weníiná. Mĩ anõ vekásho rakáti vivai kochikawãta", 9 iinã ãwẽ aská akanamãshóse, rateise isĩ roavaí, ãwẽ anõ rakáti vivai nivetaníi. Ãwẽ aská atiro sábado shavapa. 10 Askái aaivo yora ãwẽ anõ rakáti vivai ãwẽ nimaĩnõ, judeu vevokerasĩni oĩvaíki aská akávo. "Rama anõ tenea sábado shavásho askátimamẽkĩ, mĩ anõ rakáti mĩ kawivaĩai", 11 atõ akátõsho ato revíi vanai. "Yora ea roakaitõvísi ‘mĩ anõ rakáti vivai kochikawãta’, iinã ea ãwẽ yonorívi", ato akĩ.

12 Ãwẽ askái vanamaĩnõ, "tsoa yorará, mia aská akĩ yonoyanã?" akávo. 13 Askámẽkĩ ãatõ tanaómasevi, aa yora ãwẽ isĩ roa akaya ivo. Aaro awesáma, ano yora ãtsa aya, Jesus ma kaayásevi aká. 14 Askávai txipo Yové Koĩni shovonamãsho Jesusnẽ meratachísho aská akĩ. "Oĩ, mia ma roai. Txipokiri anõ itimatõ ioroa, isĩ wetsa tavákepatõ mia iomísi", akĩ. 15 Ãwẽ aská aka kashõ judeu vevokerasĩ ato yoãshoi kakĩ, "Jesustsikĩ, ea roa avayanã", iinã. 16 Aská sábado shavapa yora ãwẽ aská aka oĩinã judeu vevokerasĩni Jesus meskoi shovivo. 17 Atõ aská akatõsho Jesusnẽ ato tanamakĩ. "Ẽ papa mee iti tenesma, ea askásevi mee iti teneósmasevi", ato akĩ.

18 Jesus askái vanamaĩnõkavísiro judeu vevokerasĩni ranokasmaki yamamakatsíkavo, sábado shavapa yora ãwẽ roa avai westímẽshoma, "Ẽ papa Yové Koĩ", iinã ato ãwẽ yoãoshoatõsho "‘ea aa keskásevi’ iki", ikĩ chinãshoávo.

19 Atõ askámaĩnõ, Jesusnẽ ato aská aoki. "Neskávere nĩkãtsoma. Ãwẽ vakẽ arí akátĩpárvi, ãwẽ papa ikí oĩsho ikiyarívi. Aaro awesáma, ẽ papã aká keskásevi ea aoyarvi. 20 Papa enõ noíkasho, ẽ akárasĩ katseki ea oĩmaiya. Roa tavákepa ivorasĩ ea ãwẽ oĩmamaĩnõ, ‘roakarkĩ’, ikĩ chinãsho mã oĩkatsa. 21 Ẽ Papã vopiyavorasĩ ato wenímatõsevi akĩ ea askásevi aoya, yora erí ẽ kavẽa ivorvi. 22 Aská ẽ paparo anõ itimatõ atõ imaĩnõ ‘awesatiraki oĩnõ’, ikĩ chinãsmarvi. ‘Ẽ vakẽ ato ave aská anõ’, iinã ea ãwẽ nitxĩa. 23 Aaro awesáma, ẽ papamẽ eséyatõsevi ikĩ enõ ave eséyaónõvo. Wetsase enõ eséyama ivoro, askásevi akĩ ẽ papamẽ eséyaóma. Ãatõ yonorívi ea. 24 Neskávere nĩkãtsoma. Neská akĩ ẽ vana nĩkãi, ea yonoya anõ akí akayaro, ma awetima ikitáya, yostáma ikatsai. Veítĩpá, ma awetimaya. 25 Neskávere nĩkãotsoma. Vana nĩkãyamai vopisho ikítõ ikiyavorasĩni Yové Koĩni vakẽ oi atõ nĩkãkatsa shavá omakaĩma, ma nokóai rama. Aská akĩ nĩkãyavorasĩro awetima ikitákatsavo. 26 Ẽ paparo wenímaiyashõ, ‘ẽ vake ẽ ikítõsevi ikí ave nionõ’, iinã ea nitxĩki. 27 Ẽ papã ‘awesatiraki ato ave chinãshonõ’, iinã ea nitxĩoki, ea Yorã Vakesho. 28 Aská nĩkãinã ‘awesárkĩ?’ ikĩ chinãtsomároa. Aaro awesáma, neská ivo shavá omakaĩai. Vopiyavorasĩ ãwẽ oi nĩkãinã 29 weníokatsavo. Anosho roai shokopaóyavorasĩro awetimasho shokokatsavo, Yové Koĩnĩ. Askámaĩnõ ichnái shokopaóyavorasĩro yostákatsavo. 30 Ẽ erí chinãne ikí ‘neskáti roaka’, ikĩ ẽ akámarívi. Ẽ papã chinã nĩkãshovísi ‘yorarasĩ ẽ awesavevakĩtiskárki oĩnõ’, ikĩ ẽ chinãrívi. Aaivoro mekika, erí chinãne ikíma, ẽ papã ea yonoatõ ikísho. 31 Ea erí yoãnai neská vanã ẽ ikíro nokẽ tanátikiri chinãsho ea mã anõ akĩ chinãshoatĩpá. Aaro awesáma, yora ravésho yoãro anõkase, westítõ yoãro anõ akatĩpá. 32 Askámaĩnõ yora wetsã ea yoãki ‘aa aská’, ikĩ anõpakĩse ea ãwẽ yoãrívi. 33 ‘João nĩkãtsoma’, iinã yorarasĩ mã yonoshochĩa. Aaro meki tsakaki ea yoãya. 34 Askámaĩnõ yora ea yoãya ivomẽ ea tsakáma, askámẽkĩ ‘anõ ashõ ave awetima ikitánõvo’, iinã Joãone ea yoãti ivorasĩ mato ẽ yoãshoárvi. 35 Joãoro amo ketimésho naóya ikítõ ikí. Inokamase mã anõ mekíchná. 36 Ea ãwẽ yoãtiro mekikase. Askámaĩnõ ẽ papã ‘askátso’, iinã ea yonomaĩnõ ẽ yové akarasĩ Joãone yoã tavaai. Anõsho yorarasĩni ‘anõse, ẽ papa Yové Koĩni yonoáse’, ikĩ ea chinãshoavo. 37 Ea yonoyatõ ẽ papã meki tsakaki ea yoãomtsãwasevi. Matõro ãwẽ oi nĩkãma, mã oĩmasevi akárvi. 38 Ãwẽ vana mato toĩma, ãwẽ yonoa mã anõ akamashõ. 39 Vana neea ivo vana oĩsho mato yosimtsãwa, ‘anõ awetima ikitáti neetserã’, ikĩ chinãsho. Askámẽkĩ ease ãwẽ yoãrívikatá. 40 Askámẽkĩ ‘awetimai ninosho’, iinã ea mato chinãvarãvarãsma. 41 Yorã raviki ‘roakarkĩ’, ikíkiri ea oĩsma. 42 Mato onãtakĩse ẽ oĩai, Yové Koĩmẽ anõpakĩka noísho mã shokomarvi. 43 Earo ẽ papã chinãneshõ ẽ oámẽkĩ ea mato anõ akáma. Askámaĩnõ wetsa ãwẽ arí chinãne ikí oaya ivoro mã anõ akenkeãai. 44 Yorã mato raviakiríse mato chinãmtsãwa, Yové Koĩniro ‘awesakĩrmẽ’, noke chinãshoĩ imísma mato. Askásho mã ikítsikĩ, ea mato anõ ayakeatĩpánã. 45 Eamarívi ẽ papa veyósho mã anõ itimatõ ikírasĩ yoãkatsaya. Mã anõ txipoa yora Moisésnĩrvi mato akatsai. 46 Aaro awesáma, aa mã anõ akáro, ea askásevi akĩ mã anõ aokeãai. Easerívi ãwẽ wichashoti. 47 Askásho ãwẽ wichatikiri vana mã anõ akámaro, aweshõkata ẽ yoã vana mã anõ aoikĩ?" ato akĩ.