1 Askávai txipo Jesus Galileia iã, ãwẽ ane wetsa Tiberíades atõ akánamã pokevaĩi kaí. 2 Yora westíma atxõvaĩvo, yové akí isĩ teneyavo roa akí ãwẽ aká oĩinã. 3 Askái Jesus ãwẽ shokõkenavorasĩnĩ mató chinãnii voshõ ano kãtxívo. 4 Aatiã judeurasĩ anõ saí ikatsi shavá Páscoa ivo omakaĩchta. 5 Askáki Jesusnẽ patáinásho yora westíma veá oĩinã Filipe tanamakĩ. "Naa yorarasĩ atonamã pão merasho ato nõ pimakatsã?" akĩ. 6 Jesusnẽro ãwẽ akatsai tanasmẽinã "Filipenĩ awesakĩ ea revíkatsíki nĩkãnoshõ", iinã ãwẽ aká. 7 Ãwẽ askámaĩnõ Filipenĩ revíki. "Kopímati 200 prata* noke ayaro pãochta ato nõ inãpakemẽkĩ anõmasevi iokeãai", 8 ãwẽ imaĩnõ ãwẽ shokõkena wetsa Simão Pedrõ take André askái vanai. 9 "Naa vake wetsa, 5 pão cevada, yapa ichtóchta ravévakĩ aká aya. Askámẽkĩ yora naatíika aatíichta anõtĩpá", akĩ. 10 Ãwẽ aská akatõsho Jesusnẽ "‘yorarasĩní, setépakéna’, ato arína", ato akĩ. Aská aaivo matónamãro wasise rakáa. Ano shokoya venerasĩkase tanatáro 5000namãpáchta. 11 Askánamãsho Jesusnẽ pão viakevaikĩ Yové Koĩ tanamavaikĩ kãtxíyavorasĩ ato inãpakevaíki yapa ato ãwẽ askásevi aoa ashkã yanivo. 12 Askái pivai atõ enévãmaĩnõ Jesusnẽ ãwẽ shokõkenavo tanamakĩ. "Ãwẽ teshéarasĩ ichnámísi, roa arína", ato akĩ. 13 Ãwẽ askámaĩnõ 5 pão cevadamẽchtasho teshéa ivo atõ kãtxikéa 12 kokí matá ikí.

14 Aská Jesusnẽ yové aka aská oĩinã, "naatsikĩ ‘Yové Koĩni vana teki akaya naaivo mai shavapa nipái okatsai’, nõ ivaivainanã", akávo, ano shokoyavõ. 15 Atõ askámaĩnõ, Jesus anoshose akirishõ "aa nõ kakáyamanõ", ikĩ chinãshokatsikívo tanainã, arimẽse matopa aríchta iokaĩói.

16 Askávai yãtakawãmaĩnõ Jesusnẽ shokõkenavo Galileia iãnamã voshõ 17 nõtĩ keyónivaí, Cafarnaumkiri voávo. Aská vakíchikawãmẽkĩ Jesusro tachima. 18 Askánamãshóse, niwe mestẽkatõ tachikarãki iã tsĩki avarãki. 19 Atovo winávaĩi voí nakivaĩki 5, 6 quilômetros akánamãpáchtasho atõ oĩa Jesus oí, waka matxi kochikarãi nõti chinãvarãki. Aská ãwẽ shokõkenavo rakévo oĩinã, 20 "rakétsomároa! Eavere", ato akĩ. 21 Askái Jesusmẽ mekívaíki nõtĩ nanenivai voí, inói nokói voáma ikívo, atõ chinãvaĩanamã.

22 Askávai shaváma yorarasĩ iã okiri kesó shokovãyavorasĩni "Jesus aweshõ pokékaĩkĩ? Nõti westísemẽkĩ ãwẽ shokõkenavonĩ kaama, aríse vovaivotserã", ikĩ chinãvo. 23 Atõ askánamãsho yora ravé Tiberíadesnamãsho nõtĩ veayavo nokói veávo, Jesusnẽ Yové Koĩ tanamavaikĩ yora westíma ato ãwẽ pimavai orakama. 24 Aská ano Jesus itimai shokoyavorasĩ aa, ãwẽ shokõkenavo aká yama oĩinã nõtĩ setépakevai iovaĩvo, Cafarnaumnamã Jesus merakatsiinã. 25 Askávaĩi vokĩ iã okiri kesó Jesus niá meratachísho "yosin ikiya, awetiã neno mĩ nokóaikĩ?" akĩ nĩkãvotõsho 26 ato revíki. "Neskávere nĩkãtsoma. Pão mato ẽ pimavaitõsho ea mã itimárvi. Ẽ yové akarasĩ tanaki ea mã akámarívi. 27 Neno aaivo pitiro ichnárvi. Aaivokiri chinãtsomároa. Awetima akaya ivokiri chinãtsoma. Aaivo chinã ‘Yorã Vake’, ikí anéa ivõ mato inãkatsa. Aaro awesáma, ẽ papa Yové Koĩni chinãnevísi ẽ akõvaĩrívi", atõ akĩ.

28 Ãwẽ askámaĩnõ "‘awesátsoma’, iraí Yové Koĩnã?" ikĩ revívotõsho, 29 "aaro aská. Ãwẽ yonoya ivo ea yoí ‘anõ arína’, iki", ato akĩ.

30 Ãwẽ askámaĩnõ atovõ "askáinãro, yové ashõ noke oĩma.* Mĩ aská aka oĩvaikirívi mia nõ anõ anõ. Awesáivo mĩ akatsai? 31 Vana neea ‘naĩsho pão para ashõ ato pimapaóa’, iti vana keskátõ ikí nokẽ shenirasĩni askata wenẽnamãsho maná pipawavo", atõ amaĩnõ, 32 Jesusnẽ ato revíki. "Neskávere nĩkãtsoma. Moisésmarívi aa ivo pão naĩsho ato inãpaóya, ẽ papã atirvi. Rama askásevi, pão koĩ mato inãyaro aasevi. 33 Aaro awesáma, pão ãwẽna ivoro naĩsho nipái oshõ ato awetima akatsaiya yora", akĩ ato yoãshokĩ.

34 Ãwẽ askámaĩnõ, "Yora Ivó, aaivoka noke inãvaĩvaĩtso askáro", atõ akátõsho, 35 Jesusnẽ "easetsikĩ awetima ivo pãonã. Ea chinãvarãya ivoro shopĩ tanaóma, ea anõ akaya ivo txipokiri wakapashã vetsa aoma aká ikatsai. 36 Askámẽkĩ ‘ẽ yové akarasĩ oĩsmẽinã ea anõ ayamai mã tapikasai’, mato ẽ avaitĩ. 37 Askámaĩnõ ẽ papã ea inãa yorarasĩro ea chinãvarãmaĩnõvo, ea ato ichnama ikatsai. 38 Aaro awesáma, naĩsho oshõ ‘erí chinãne inõ’, iinã ẽ oámarívi. Ẽ papã ea yonoa ãwẽ chinã mashtéshonõ iinã ẽ oárvi. 39 Askáinã ea yonoyatõ chinã neská. ‘Ato veímáma, keyókaĩa shavapa ashkã akĩ ato wenímaóti’, ikĩ ea chinãshokĩ. 40 Ãwẽ chinãro awesáma, yorarasĩ ãwẽ vake oĩsho anõ akayavorasĩro awetima ikitákatsavo. Keyókaĩa shavapa ato ẽ wenímaókatsa", ato akĩ.*

41 Ãwẽ askái vanamaĩnõ judeu vevokerasĩ arímamẽ Jesuski vanavo, "ea naĩsho oá ivo pão", ãwẽ ikí vanaa nĩkãinã. 42 "Naa Jesusnã Josepa vakemarívira? Ãwẽ papa ãwẽ ewa aka nõ oĩmarvirá? Awesainã ‘ea naĩsho oárvi’, ikí vanaaikĩ?" 43 atõ imaĩnõ Jesusnẽ "eki mã vanaketanaa enéna. 44 Ẽ papã ea yonorívi. Ãatõ kawivarãma ivoro ea chinãvarãtĩpá ikivo. Enékaĩa shavapa ato ẽ wenímaókatsa. 45 Yové Koĩni vana teki akayavorasĩni nẽeti vana neea aya. ‘Yové Koĩni ashkã akĩ ato yosĩkatsa’, ikí neea. Askásho, ãwẽ yosĩa ivorasĩ nĩkãsho yosisho ea chinãvarãkatsavo. 46 Yorã ẽ papa oĩmarvi. Ea westíse yonótáyasho ẽ oĩrívi. 47 Neskávere nĩkãtsoma. Ea anõ akaya ivoro awetima chinã aya. 48 Eatsikĩ awetima pãonã. 49 Matõ sheni wetsarasĩni askata wenẽnamãsho maná pipawavo askámẽkĩ keyótivo. 50 Askámaĩnõ naaivo pão naĩsho oaya ivo piayaro vopitĩpá. 51 Earvi awetima pão naĩsho oaya ivo. Aa ivo pão piaya ivo yoraro awetimai nikatsai. Aaivo pãoro ẽ kaya. Aaivo ẽ kaya ato ravĩi vopikatsa, ashkã akĩ ato ave awetima anõ iinã", ato akĩ.

52 Ãwẽ askámaĩnõ, judeu vevokerasĩ arímamẽ vanaketanávo. "Awesainã naa yorã ãwẽ nami noke ãwẽ yani amatsikírá?" atõ imaĩnõ, 53 Jesusnẽ ato revíki. "Neskávere nĩkãtsoma. ‘Yorã Vake’, ikí anéa ivo ãwẽ nami mã yani akáma, ãwẽ imi akáma, mã akáro mato awetima ikitatĩpá.* 54 Ẽ nami yani akí, ẽ imi akí akaya ivoro awetima chinã ayasho keyókaĩa shavapa ẽ weníomákatsai. 55 Aaro awesáma, ẽ namiro piti koĩ, ẽ imi enero anõ yaniti koĩ. 56 Ẽ nami yani akí, ẽ imi akí akaya ivoro aa enõ txiwái, ea anõ txiwái nõ avévakĩkatsa. 57 Ẽ awetima papã neno ea yonoatõsho ẽ awetima aorívi. Askásevi akĩ yora wetsa ẽ nami yani akaya ivo enõsho awetima aokatsa. 58 Earvi naĩsho oaya pão koĩ ivo. Aaivo piayaro matõ sheniwetsarasĩni maná pishõ keyótivo keskáma ikatsai, awetimai nikatsai", ato akĩ. 59 Aatiã aská akĩ ato ãwẽ yosĩmtáro Cafarnaum sinagoganamãsho.

60 Ãwẽ askái vana nĩkãinã ãwẽ shokõkenavo arímamẽ vanavo. "Vana aaivo yomãka, anõ ikítĩpá", ikívo.

61 Aská akĩ atõ chinã onãtakĩ oĩi, atõ aki vana nĩkãi avaikĩ ato nĩkãki. "Neskái ẽ vananã ichnáserá mã nĩkãnã? 62 ‘Yorã Vake’, ikí anéa ivo naĩ ãwẽ niánamãsevi iokaĩmaĩnõ mã awesákatsa? 63 Awetima chinã inãya ivoro Yové Koĩ Chinãrvi. Yorãro aská akátĩpá. Naaivo vana ẽ yoãro Yové Koĩni Chinãmẽsho oshõ, awetima akaya ivo vanarvi. 64 Aská nĩkãsmẽinã wetsãchta mato anõ akáma", ato akĩ. (Aaro awesáma, Jesus vevo askái vanaa anõ amísma ivo askákatsa tanasai, aa yomẽ akatsaiya ivo askásevi aoki.) 65 Askái Jesus vanainaói. "Askáinãvísi mato ẽ yoãshovai. Yora wetsase ea chinãvarãyaro ẽ papã chinãmárvi", ato akĩ.

66 Ãwẽ askái vana nĩkãinã ãwẽ shokõkenavo wetsarasĩni enevo. 67 Atõ aská oĩinã Jesusnẽ ãwẽ shokõkenavo 12 yora ato aská akĩ. "Matõ askásevi akĩ ea mã eneókatsa?" ãwẽ imaĩnõ 68 Simão Pedrõ revíki. "Yora Ivó, tsoakata nõ atxõikĩ? Miarvi awetima vanaya. 69 Nokẽro mia anõ akĩ, ‘Yové Koĩna awesá ivorvitserã’, ikĩ mia nõ tanasai", ãwẽ akátõsho 70 "eã mato kavẽrívi, 12 yora, askámẽkĩ matonĩ niá ivo wetsase yochĩ ichnátõ kakáya keská", ato akĩ. 71 Aaro awesáma, Simão Iscariotesnĩ vake Judas yoí ãwẽ ikí. Aa 12 yora kavẽnaya ivo wetsase, Jesus yomẽ akaya.