1 Coríntios 3:9 | Versão YNS

Asyääl a Nzam

1 Akà mɛ, atɔŋ, mɛ in’kwe anki muyäm anà bɛ asànaa akà baar a dweelà, wɛɛ asànaa akà baar a imbuur, asànaa akà baan ambɛy abà amu Klistɔ. 2 Mɛ amàlapà an’bɛɛl munwà, kà isaa a bwoor anki, ntɔn bɛ làlàkwo anki anà bya. Itàkal apanà, bɛ làkwo anki, 3 ntɔn tii lalà bɛ làbà unsà imbuur. Ntɔn uboo a bɛ un’köl anà an’sye mà mwo, nkye nsyääl abɛ kà yà imbuur anki? 4 Mpal ufàtɛn mbuur mwɛy uboo a bɛ naa: « Mɛ in’wà mbuur a Pɔl », wumwɛy naa: « Mɛ in’wà wà Apɔlɔs! », nkye abun bɛ làfàkyer anki unsà imbuur?

Asyääl a Nzam

5 Abun, Apɔlɔs ininà? Pɔl ininà? Asyääl: u mbwo a ba, bɛ làsi làkwikilà. Umwɛy umwɛy kàkyer asànaa an’kab kun’pɛ Mwol. 6 Mɛ, mɛ kàkön, Apɔlɔs waa kàtsüül an’dà, wɛɛ Nzam kàkyer ngyɛɛl. 7 Kyakin, mbuur afàkɔn anà mbuur afàtsuul an’dà, ba ndöŋ yatɛy, Nzam mpɛl awà ndöŋ, ntɔn Nde afàsà ngyɛɛl. 8 Mbuur afàkɔn anà afàtsuul bà mbwo mwɛy, ntɔn mbuur mbuur asàwal làfur ande unsà isii a isal ande ŋakwo. 9 Ntɔn bi ibà mbaay unsà isal a Nzam anà bɛ làbà ywaŋ ande.

Bɛ sye làbà ndwà utɔŋà Nzam. 10 U mbwo a kab a ngway kan’pɛ Nzam, asànaa un’tööŋ aŋàbwaŋ, mɛ kàsi un’bään, mbuur asin an’yàtɔŋ udu a wa. Wɛɛ, wɛy mbuur mbuur ukäl kà igyɛɛŋ unsà ntööŋ ande. 11 Wɛy mbuur asin ukɔ̈ɔ̈n afàsà un’bään asin ukɔl a un’bään awà paa: Yɛsu Klistɔ. 12 Kyekà, itàkal naa ban’tɔŋ udu a un’bään awà anà wɔl, arza, in’kul a ntal, in’te, in’lɛŋ, wɛŋwɛŋ, 13 isal a mbuur mbuur ikyer asàmɛnà. Ilä a nsaŋ isàmɛɛy kya, ntɔn kya ifàmɛnà u mbaa. Mbaa isàsi isal a mbuur mbuur ntɔn muswaŋ ntal a kya. 14 Isàkal naa isal a mbuur kàtöŋ udu a un’bään kyan’tsim u mbaa, nde asàwal làfur. 15 Isàkal naa kya kyan’kuŋà, nde undiir usàwal anki. Nde ŋakwo asàwà mɔ̈ɔ̈, wɛɛ asànaa mbuur kan’sɔrà u mbaa. 16 Nkye bɛ làyöb anki naa bɛ làbà ndwà a Nzam anà Dweelà a Nzam làfàkal uboo a bɛ? 17 Isàkal naa mbuur kan’dwa ndwà a Nzam, Nzam akyer asun’dwa. Ntɔn ndwà a Nzam yà in’kyɛɛl, bɛ làbà ndwà a Nzam ya.

18 Wɛy mbuur ukɔ̈ɔ̈n akur nde ŋàkwo: isàkal naa mbuur mwɛy uboo a bɛ akakyeyà uyɔl naa nde wà ŋayeerà u mɛɛn mà, wɛy nde ubulà ŋukɔŋ, ntɔn mubulà ŋayeerà. 19 Ntɔn an’yeerà a mɛɛn mà, mà ukɔŋ kusà a Nzam. Kyakin, bàsön naa: « Nde afàwal aŋayeerà unsà impeenà aba ŋakwo. » 20 Anà sye naa: « Mwol akyàyöb an’kyän a aŋayeerà, nde akyàyöb naa ma mà bunàbun. » 21 Abun, mbuur taaŋ aswaŋ tɛy ngaal ande udu a baar, ntɔn indiir byanswà byà bɛ: 22 Pɔl, Apɔlɔs itàkal Sɛfas, mɛɛn, mɔ̈ɔ̈ itàkal ukwà, apanà itàkal ungö, bya byanswà byà bɛ, 23 wɛɛ bɛ, bɛ làbà bà Klistɔ, anà Klistɔ wà wà Nzam.

Bíblia Online

1 Coríntios 3

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia