1 In’bää myan’too ntsü yanswà naa ndaa a nswɛn yà uboo a bɛ, ndaa a nswɛn mpa aŋàtàman itàkal uboo a baar mpa abà Ayudà: umwɛy uboo a bɛ afàkal anà un’kyay a taarànde. 2 Wɛɛ bɛ lan’yam a uyɔl! Nkye bɛ làlàkwo anki muwem ngyɛb mbɔɔn anà mulwom uboo a bɛ mbuur kan’kyer undiir awun? 3 Akà mɛ, mɛ paa watɛy u ndür, wɛɛ mɛ in’wà paa u dweelà, mɛ kàtsül itaan nsaŋ a mbuur wa kàkyer undiir awun asànaa mɛ kàkäl paa. 4 Mpal làsàköŋ bɛ, kà ikɔb a Mwol Yɛsu, mɛ in’sàkal paa unsà dweelà uboo a bɛ. 5 Lun’yälà mbuur atub awun akà Satanà ntɔn mudwa ndür ande, waa dweelà làsàwà mɔ̈ɔ̈ kà ilä a Mwol. 6 Undiir akyey uyɔl watɛy! Nkye bɛ làyöb anki naa: « Kindam a ful ifàsɛɛn mfwar yanswà »? 7 Abun, làpɔŋà unsà ful là itaan, ntɔn bɛ làbulà mfwar akün ikɔ̈ɔ̈n ful. Ntɔn Klistɔ, Pak abi, bàpɛɛl ibɔɔn. 8 Abun, wɛy bi ikɔ̈ɔ̈n atà un’kyɔm anà ful itaan, itàkal ful a ube anà lan’kyän an’be, wɛɛ anà mampà ikɔ̈ɔ̈n ful, unsà pɛɛlà anà ndandaa.

9 Mɛ kàlasöön unsà un’kaan amɛ naa twon lan’kal un’tüüb anà baar bàfàkyer ndaa a nswɛn. 10 An’kyän amɛ kà mà ntɔn baar bàfàkyer ndaa a nswɛn u mɛɛn mà anki, itàkal aŋunkaam anà mbüüb, itàkal baar bàfàyamà itɛk, ntɔn, isàkal naa yà abwɛy, bɛ làkyer atoo u mɛɛn. 11 Mɛ kàlasöön apanà naa twon lan’kal un’tüüb anà mbuur afàtɛn naa nde wà « un’tɔŋ », isàkal naa nde, ŋunkaam, itàkal naa afàyamà itɛk, itàkal un’twee, itàkal un’yöör a man, itàkal mbüüb, mbuur atub awà, twon lan’dyà ikal imwɛy anà nde.

12 Ntɔn, nkye ya ndaa amɛ mutsüül baar a nsà nsaŋ? Nkye kà bɛ anki làtsul nsaŋ a baar abà uboo? 13 Baar a nsà Nzam asàtsul nsaŋ aba. Wɛɛ, bàsön naa: « Lun’böŋ mbuur un’be uboo a bɛ. »